Jer. 48 - Bhaibheri Rakachena muChindau

Kuparadzwa kweMoabhi

¹ Izvi ndizvo zvinoronza Mambo Mwari wehondo, Mwari waIsuraeri, ngendaa yaMoabhi: “Ihehe kuneNebho, raparadzwa! VaKiriathiaimu vatsverudzwa, vatorwa; marukumbati akagwinya atsverudzwa nokuputsirwa pashi.

² Kukudzwa kweMoabhi akuchazoapopi; muHeshibhoni vakaronga zvakashata kweriri vechiti, ‘Uyai, ngatiriparadze kuti risachaita dzinza.’ Newewo, O Madhimeni, uchaunzwa mukunyaradzwa; shoti ichakurumbirira.

³ Izwai! Kuchema kubva Horonaimu, ‘Hohoho nokuparadzwa kukuru.’

⁴ ‘Moabhi yaparadzwa!’ ‘Vana varo vadoko vanozwika kuchema.’

⁵ Ngokuti pamukwidzwa weRuhithi, vachapakwira vechichema kakurutu; ngokuti pakudzaka kwavo kuenda Horonaimu vazwa chiriro chokuparadzwa kukurutu.

⁶ ‘Tizai! Mudziponese; mudai ngepfiba riri murubaya.’

⁷ Ngegwinyiso ngokuti mwakagonda kumishando yenyu nokupfuma yenyu, nemwi muchabatwa; Khemoshi unozoenda muubatwa, nevapristi vake, pamwepo nevatongi vake.

⁸ Muparadzi unozouya padera pemadhorobha eshe, akuna dhorobha rinozopokonyoka; bani rinozopera norubaya runozoparadzwa, kudai ngezvaaereketa Mambo Mwari.

⁹ Ipai maphaphiro Moabhi kuti amburuke; ngokuti madhorobha ake anozoita matongo, asina unogaramwo.”

¹⁰ Ngaatukwe uwo unorekeredza mushando waMambo Mwari, ngaatukwe uwo unokonyera shoti kubva kungazi.

Madhorobha eMoabhi Anoparadzwa

¹¹ Moabhi rakagarisika kubvira muudoko hwaro, rakagara padera pemasese aro, arizi kumbodururwa kubva kuchidziyo kuiswa muchidziyo chimweni, arizi kumbopindazve muubatwa; ndizvo kunuhwira kwaro kuchakandodaro, negwema raro arizi kupinduka.

¹² “Ndizvo, ngegwinyiso nguva inouya,” unoronza Mambo Mwari, “Apo ndinozotuma kweriri vanodurura navo vanozodurura zvidziyo zvaro, nokuputsa kuita zvigurwa majomeya.

¹³ Zvino Moabhi rinozotsveruka ngendaa yeKhemoshi, kudai ngevemhatso yaIsuraeri vakatsveruka ngendaa yeBhetheri gonda ravo.

¹⁴ Munoronza ngenyi kuti, ‘Tiri ngwazi nevarwi vanesimba?’

¹⁵ Muparadzi weMoabhi nemadhorobha wauya, nemajaha akatsanangurwa adzaka koourawa,” unoronza Mambo, uwo zina rake ndiMambo Mwari wehondo.

¹⁶ “Kutambudzika kukuru kwevaMoabhi kuri pasinde kuguma, nokuparadzwa kwaro kunouya pasinde ngokukasira.

¹⁷ Imwimwi mweshe vaakirwana varo, chemai; nemwi mweshe munozia zina rake, muti, ‘Wakaita magukirenyi mudondoro wakagwinya, ndonga yakanaka!’

¹⁸ Dzaka kubva muutende, ugare pashi pakaoma, O vagari vemwanasikana weDhibhoni, ngokuti uwo muparadzi weMoabhi waguma kurwa newe, wapwanya bako rako.

¹⁹ Ema pasinde pepato, uringire, iwewe mugari weAroeri. Bvunza mwamuna unotiza, nomukadzi unopokonyoka, wechiti, ‘Kwaitikenyi?’

²⁰ Moabhi rinotsverudzwa, ngokuti raputsirwa pashi; boorera wechichema! Zvironze muArinoni kuti Moabhi raitwa dongo.

²¹ “Kutongwa kwaguma munyika yorubaya; padera peHoroni, nepaJahiza, Mefaathi,

²² Dhibhoni, Nebho, Bhethidhibhurathaimu,

²³ Kiriathaimu, Bhethigamuri, Bhethi-meoni,

²⁴ Keriothi, Bhozira, nokumadhorobha eshe aMoabhi, ari kuretu naari pasinde.

²⁵ Runyanga rwaMoabhi rwagurwa, nomuoko warozve wagurwa,” unoronza Mambo Mwari.

Moabhi Rinozopfaiswa

²⁶ “Muitei kuti aradze, ngokuti wakadzikurisa pamberi paMambo Mwari; Moabhi ngariumburuke mumarutso aro, narowo richashekwa.

²⁷ Isuraeri aazi kuita chishekedzo kweuri here kunyazwi asikazi kubatwa pakati pembavha? Asi peshe pounoereketa ndiye unodzungudza soro rako.

²⁸ Budai mumadhorobha, mugare mumawere emapuwe, O vagari veMoabhi. Mudai ngenjia inoaka chisaki chayo kumarutii emawere.

²⁹ Tazwa ngokudzikudza kweMoabhi, rinodzikudza kakurutu, manyau aro, nokudzikurisa kwaro nokudada kwaro, nemanyau omwoyo waro.

³⁰ Inini pachangu ndinozia hasha dzaro, unoronza Mambo Mwari,” kuganza kwaro akuzodetseri, zviito zvaro azvidetseri chiro.

³¹ Ndizvo ndinoboorera ngendaa yeMoabhi, ndicharidza chiriro ngendaa yeMoabhi reshe; mwoyo wangu unotsumba ngendaa yevanhu veKirheresi.

³² Ndinokuchema iwewe kupinda Jaza, O muvhini weSibhima. Matai ako akaambuka ruandhle, metsa kuguma kuruandhle rweJaza. Muparadzi wawira padera pemichero yako yezienza, nepadera pemavhini ako.

³³ Kudakara nokudakadzwa kwabviswa kubva muminda inobereka zvakawanda munyika yeMoabhi; ndarambidza kuti pokukamura vhini pasabuda vhini; apana naumwe unozoatsikatsika echipururidza; kupururidza kwavo akuchaiti kupururidza kwokudakara.

³⁴ “Kuchema kwakabva Heshibhoni, kukaguma Ereare, kwakazwika kuguma Jahazi, vaidaidzira mazwi avo kubvira Zoa kuguma Horonaimu, nokuEgirathisherishiya. Ngokuti kunyazwi nemvura dzeNimirimu dzinozoomeswa.

³⁵ Ndinozounza magumo muMoabhi,” unoronza Mambo Mwari, “Kuneavo vanopira mudiro pandau dzakakwirira, nokupisha mutombo unegwema kunezvimwari zvavo.

³⁶ Ndizvo mwoyo wangu unorira kudai ngomunanzi ngendaa yeMoabhi, nomwoyo wangu unorira kudai ngomunanzi ngendaa yevanhu veKirheresi; ngokuti upfumi uhwo hwevakawona hwapera.

³⁷ Ngokuti soro reshe rinoparwa, nomurebvu weshe unoparwa; nepadera penyara dzeshe panozochekwa nyora, nepadera pezviunu panopfekeswa machira emasaka.

³⁸ Padera pemhatso dzeshe dzeMoabhi, nomundau dzokuungana amuna chiro asi kuchema; ngokuti ndaputsa Moabhi kudai ngechidziyo chisina naumwe unochida,” unoronza Mambo Mwari.

³⁹ “Raputswa ngenjiranyi! Raita maboorerenyi! Moabhi raita makunukukirenyi mushana waro mukutsverudzwa! Ndizvo Moabhi raitwa chishekedzo nechinotyisa kuvaakirwana varo.”

Akuna Kupokonyoka kunaMoabhi

⁴⁰ Ngokuti izvi ndizvo zvinoronza Mambo Mwari: “Ringira, unozombururuka kudai ngegodzi, nokutambanudza maphaphiro ake kurwa neMoabhi.

⁴¹ Madhorobha anozotorwa, nekamba dzinozobatwa. Mwoyo yengwazi dzeMoabhi ngezuvaro inozodai ngomwoyo womukadzi uri mukurwadziwa kwake kwokubereka.

⁴² Moabhi rinozoparadzwa kuti risachazoita dzinza, ngokuti rakadzikudza pacharo pamberi paMambo Mwari.

⁴³ Kutyisa, hunza, nomurau zviri pamberi penyu, O vagari veMoabhi,” unoronza Mambo Mwari.

⁴⁴ “Weshe unotiza kutyisa unozowira muhunza; nouwo unokwira kubuda muhunza unozobatwa mumurau. Ngokuti ndinozounza zviro izvi padera paro Moabhi, mugore rokuororwa kwaro,” unoronza Mambo Mwari.

⁴⁵ “Mubvute reHeshibhoni vanotiza vanoemamwo varemba, ngokuti muriro wabaka wechibva muHeshibhoni, murazvu wechibva mumhatso yaSihoni; waparadza huma yeMoabhi, nemisoro yevanhu vanoda kurwa.

⁴⁶ Hezvo kwouri, O Moabhi! Vanhu veKhemoshi vapera, ngokuti vakororo vako vabatwa muuhloko nevanasikana vako vaizwa hloko.

⁴⁷ Asi ngamazuva okugumisira ndinozopetudzazve vakabatwa veMoabhi,” unoronza Mambo Mwari. Uku ndikwo kutongwa kweMoabhi.