Jer. 47 - Bhaibheri Rakachena muChindau

Izwi raMambo Mwari ngendaa yeVaFiristia

¹ Izwi raMambo Mwari rakauya kunaJeremia muprofeti ngendaa yevaFiristia, apo Faro asati arwisa Gaza.

² Izvi ndizvo zvinoronza Mambo Mwari, “Ringira, mvura inokwira yechibva dera, nayo inozoita ndambi inopopoma, inozokukuza nyika nazvo zveshe zviri mukati mwayo, dhorobha, naavo vanogara mukati mwaro. Vanhu vanozochema yaamho, nevagari venyika vanozoboorera.

³ Pabope retsoka rokuhamba kwemahachi ake akagwinya, pakurira kwokuhambiswa kwengoro dzake, nepakutinhira kwemavhiri, madzibaba aazoringiri sure kunevana vavo, ngendaa yokupera simba kwenyara dzavo,

⁴ ngendaa yezuva iro rinouya rokuparadza vaFiristia veshe, kugura kubva Thire neSidhoni weshe mudetseri unosara. Ngokuti Mambo Mwari uchaparadza vaFiristia, vakasara vomuhumbikumbi venyika yeKafithori.

⁵ Mhanza yauya padera peGaza, Ashikeroni yanyaradzwa. O vakasara vebani raro! Munozodzipara mhanza kwomukuwo wakadini?

⁶ A shoti yaMambo Mwari! Unozonyarara metsa riini? Hwirira mumakara ako; zorora unyarare.

⁷ Ungaita manyararirenyi, apo Mambo Mwari akupanga kurwisa Ashikeroni, nemahumbikumbi oruandhle? Apo paakakuemesera.”