Jer. 46 - Bhaibheri Rakachena muChindau

Kunyiswa kweEgipite paKharkhemishi

¹ Izwi raMambo Mwari rakauya kunaJeremia muprofeti ngendaa yemadzinza.

² Ngendaa yeEgipite, nendaa yehondo yaFaro-Nekho mambo weEgipite, yaiya parwizi runozwi Yufratesi muKharkhemishi, yaakanyisa mambo Nebhukhadhineza mambo weBhabhuroni, mugore rechirongomuna rokutonga kwaJehoiakimu mukororo waJosia mambo waJudha:

³ “Nasirirai zvihlangu zvikuru nezvidoko, mukwedzere kuenda koorwa hondo!

⁴ Sungirai mahachi, muakwire! Emai mundau dzenyu munezviqoko zvenyu; pukutai mikhondo mwechipfeka mabhachi esimbi.

⁵ Ngenyi ndechivaona vechitya? Vawira sure. Ngwazi dzavo dzapwanyirwa pashi, dzatiza ngokukasira. Avaringiri sure; ngokuti kutya kwakavatendenedza,” unoronza Mambo Mwari.

⁶ “Vanokasira avakoni kutizira kuretu, nokuti ngwazi kukona kupokonyoka; dera pasinde porwizi Yufratesi vapumhunwa nokuwa.

⁷ Ndiani uyu unokwira akadai ngerwizi Naire, urwo mvura yarwo inopopoma kudai ngendambi?

⁸ Egipite rinokwira kudai ngeNaire, nemvura yaro inomiruka kudai ngendambi. Unoti, ‘Ngandikwire ngandizadze nyika; ngandiparadze madhorobha nevagari vawo.

⁹ Kwedzerai, O mahachi, mburumbukai, O ngoro! Ngwazi ngadzibude mberi: vaEthiopia nevaRibhia avo vanokona kubata chihlangu, navaRidhia ngwazi dzokukandira misee ngeuta.’ ”

¹⁰ Zuva iro izuva raMambo Mwari, Mwari wehondo, zuva rokuunzidzira, rokuti adziunzidzire magaa ake. Shoti inozodya, inozoguta nokuradza ngengazi yavo. Ngokuti Mambo Mwari, Mwari wehondo, unemudiro wokubaira ngedera parwizi runozwi Yufratesi.

¹¹ Kwira uende Gireadhi, utore mutombo webharimu, O mhandwe mwanasikana weEgipite! Washandisa mitombo yakawanda inokorera; apana kuponeswa kwako.

¹² Madzinza akazwa ngokutsverudzwa kwako, nokuchema kwako kwakazadza nyika; ngokuti ngwazi dzapumhunwa ngengwazi, nadzo dzeshe dzawa pamwepo.

Kuuya kwaNebhukhadhineza

¹³ Izwi iro raakaereketa Mambo Mwari kunaJeremia muprofeti, ngendaa yokuuya kwaNebhukhadhineza mambo weBhabhuroni, koorwisa nyika yeEgipite:

¹⁴ “Daidzirai muEgipite, teketesai muMigidhori, teketesai muMempfisi, nomuThafanehesi, muti, ‘Emai mundau dzenyu mwakanasirira, ngokuti shoti inozouraya avo vakamutendenedza.

¹⁵ Ngwazi dzako dzakapera ngenyi? Mikono yako aizi kuema ngenyi? Ngokuti Mambo Mwari wakaidzinga.’

¹⁶ Wakaita kuti vazhinji vako vapumhunwe vawe, umwe wakawira padera poumweni; navo vakati, ‘Uyai, ngatipetuke kuvanhu vedu, nokunyika yedu yechibarirwe, ngendaa yeshoti inoparadza.’

¹⁷ Ipai Faro mambo weEgipite zina ‘Bopoto uwo wakatamikirwa ngomukuwo wake.’

¹⁸ Kudai ngezvendinopona,” unoronza Mambo, uwo zina rake rinozwi Mambo Mwari wehondo, Umwe unouya akadai ngeThabhori riri pakati pemitunhu, nokudai ngeKharmeri riri pasinde poruandhle.

¹⁹ Rongedza mitwaro yako kuenda muusungwa, mwanasikana unogara muEgipite, ngokuti Mempfisi richaparadzwa nokuitwa dongo, risina unogaramwo.

²⁰ Egipite rakadai ngetsiru rakanaka, asi mazimha anobva dera anomata padera paro.

²¹ Kunyazwi varwiri varo vari pakati paro vakadai ngamakonyana akakodzwa muchibaya; navowo vakapetuka, vakatiza veshe pamwepo; avazi kuema, ngokuti zuva rokuororwa kwavo kukuru ravagumira; mukuwo wokuororwa kwavo.

²² Rinoita bope rakadai ngerenyoka inotiza; ngokuti magaa anofora, echiuya kurwa naro, anouya koorwa navo ngematemo, kudai ngevatemi vemiti.

²³ Vanozotemera pashi gwasha raro, unoronza Mambo Mwari, “Kunyazwi aripindiki; ngokuti vakapinda kuwanda kune ndongwe, avaerengeki.

²⁴ Mwanasikana weEgipite unozotsverudzwa; unozopirwa munyara yavanhu vedera.”

²⁵ Mambo Mwari wehondo, Mwari waIsuraeri, unoti, “Ringirai, ndinounza kuororwa padera paAmoni weThebhesi, naFaro, neEgipite, pamwepo nezvimwari zvayo nemadzimambo ayo; nepadera paFaro navo veshe vanogonda mwaari.

²⁶ Ndinozovapira munyara dzaavo vanotsvaka kuvauraya, kunamambo Nebhukhadhineza weBhabhuroni nevatongi vake. Ngesure kweizvi Egipite inozogarwa kudai ngekaretu,” unoronza Mambo Mwari.

Mambo Mwari Unozoponesa Vanhu vake

²⁷ “Asi iwewe, usatya, muranda wangu Jakobe, newe usapera simba, O Isuraeri; ngokuti, ringira, ndinozomuponesa kubva kuretu, nemibarirwana yenyu kubva munyika youbatwa hwavo. Jakobe unozopetuka, echizorora nokugarisika; akuna naumwe unozoita kuti atye.

²⁸ Asi iwewe, usatya, O Jakobe muranda wangu,” unoronza Mambo Mwari “Ngokuti ndinewe. Ndinozopedza yaamho madzinza eshe pakati peavo vendakamudzingira kwevari, asi andizomupedzi yaamho imwimwi! Ndinozomuorora kwakapimwa; asi andizomusii musikazi kuororwa.”