Jer. 45 - Bhaibheri Rakachena muChindau

Chigondiso chaMwari kunaBharukhi

¹ Izwi raakaereketa Jeremia muprofeti kunaBharukhi mukororo waNeria, apo aiya apedza kunyora mazwi aya mubhuku rinopetwa kubva kumuromo waJeremia, mugore rechirongomuna rokutonga kwaJehoiakimu mukororo waJosia mambo waJudha rechiti,

² “Izvi ndizvo zvinoronza Mambo Mwari, Mwari waIsuraeri, kunewe, O Bharukhi.

³ Wakati, ‘Ihehe kwendiri! Mambo Mwari wakatutsira kusvipa mwoyo kunekurwadziwa kwangu; ndaremba ngokugwimba kwangu, neni andioni kuzorora.’

⁴ “Izvi ndizvo zvounozoronza kwaari kuti, ‘Izvi ndizvo zvinoronza Mambo Mwari: Ringira, ndinozoputsira pashi icho chendakaaka, kubvita icho chendakasima, ndiyo nyika yeshe.

⁵ Newe unotsvaka zviro zvikuru kudziitira here? Usazvitsvaka; ngokuti, ringira, ndinounza kushata padera pevanhu veshe, unoronza Mambo Mwari; asi ndinozokupa kupona kwako kuti kuite kudai ngechiro chakachakatwa muhondo kundau dzeshe dzounoenda.’ ”