Jer. 44 - Bhaibheri Rakachena muChindau

Izwi raMambo Mwari kuVaIsuraeri muEgipite

¹ Izwi iro rakaguma kunaJeremia revaJudha veshe vaigara munyika yeEgipite, paMigidhori, paThafanehesi, paMempfisi, nomunyika yePhathrosi rechiti,

² “Izvi ndizvo zvinoronza Mambo Mwari wehondo, Mwari waIsuraeri: Imwimwi pachenyu mwakaona kushata kweshe kwendakaunza padera peJerusarema nepadera pemadhorobha eshe aJudha. Ringira kwaari; nyamashi aa matongo, akuna munhu unogaremwo,

³ ngendaa yokushata kwavo kwevakaita kunditsenesa, ngokuti vakaenda koopisha mutombo unegwema nokudira zvimwari zvimweni zvevasikazii, ivo nokuti imwimwi, nokuti madzibaba enyu.

⁴ Asi ndakaangira kumutumira varanda vangu veshe vaprofeti ndechiti, ‘Ndinomupota kuti musaita ichi chiro chinonyangadza chendinonyenya.’

⁵ Asi avazi kupurutana nokuti kukotamisa nzee dzavo, kuti vatenderuke kubva mukushata kwavo nokurekera kupisha mutombo unegwema kunezvimwari zvimweni.

⁶ Ndizvo ushungu hwangu nokunyangadzwa kwangu zvakadururwa, zvikabaka mumadhorobha aJudha nomumapato eJerusarema; nawo akaparadzwa akaita matongo, kudai ngezvaakaita nyamashi.

⁷ “Neizvi ndizvo zvinoronza Mambo Mwari, Mwari wehondo, Mwari waIsuraeri: ‘Ngenyi mwechidziitira kuremadzwa kwakakura kudaro pachenyu, kugura vamuna, vakadzi, vana nechiya, kubva pakati paJudha mwechisara pachenyu musina naumwe unosara?

⁸ Ngenyi mwechindinyangadza kumusa ushungu hwangu ngemishando yenyara dzenyu, ngokupisha mutombo unegwema kunezvimwari zvimweni munyika yeEgipite, iyo kwemwakaenda koogara? Munozogurwa nokuitwa chiro chinotukwa nokushoorwa pakati pemadzinza eshe enyika here?

⁹ Mwariyarwa kushata kwemadzibaba enyu here, kushata kwemadzimambo aJudha, kushata kwevakadzi vavo, nokushata kwenyu nokwevakadzi venyu, kwevakaita munyika yaJudha, nomumapato eJerusarema?

¹⁰ Avazi kuonisa kupfaiswa nokuti kutya metsa nanyamashi, nokuti kupurutana mipango yangu nokuti zviemeso zvangu, zvendakaisa pamberi penyu nepamberi pemadzibaba enyu.’

¹¹ “Ndizvo izvi zvinoronza Mambo Mwari, Mwari waIsuraeri: Ringirai, ndadziemesera kuunza kushata padera penyu, kuuraya veshe Judha.

¹² Ndinozotora veshe vakasara vaJudha, avo vakadziemesera kuenda kunyika yeEgipite koogareyo, navo vanozourawa veshe, nokuwa munyika yeEgipite; vanozowa ngeshoti, ngenzara; vanozofa kubvira pamudoko metsa pamukuru, vanozofa ngeshoti nenzara; vanozoita chiro chinotukwa, chinoshamisa, chinoshoorwa, nechinotsverudza.

¹³ Ndinozoorora avo vanogara munyika yeEgipite, kudai ngezvendakaorora Jerusarema, ngeshoti, ngenzara, nedenda,

¹⁴ kuitira kuti pasaa naumwe wevakasara waJudha, waavo vakauya munyika yeEgipite koogaremwo, unozopona nokuti kusara, nokuti kupetuka munyika yaJudha. Kunyazwi vanodisisa kupetuka koogarayo, apana unozopetuka ngokubanze kwaavo vanozopokonyoka.”

¹⁵ Zvino vamuna veshe vaizia kuti vakadzi vavo vaipisha mutombo unegwema kuzvimwari zvimweni, nevakadzi veshe vaiema pasinde, mbungano huru, vanhu veshe vakagara munyika yeEgipite muPhathrosi, vakapingura Jeremia vechiti,

¹⁶ “Ngendaa yeizwi iro rewaereketa kwetiri muzina raMambo Mwari, atizokupurutani.

¹⁷ Asi ngegwinyiso tinozoita chiro cheshe chetakapika kuita, kupisha mutombo unegwema kunavahosi vomudenga nokudurura kwaari mudiro wokumwa, kudai ngezvatakaita, isusu nemadzibaba edu, nemadzimambo edu nevatongi vedu, mumadhorobha aJudha nomumapato eJerusarema. Taigara tinokudya kwakawanda, techigara zvakanaka, atizi kuona chakashata.

¹⁸ Asi kubvira mukuwo wetakarekera kupisha mutombo unegwema kunavahosi vomudenga, nokurekera kudurura mudiro wokumwa kwaari, tinondotama zviro zveshe, tinopedzwa ngeshoti nenzara.”

¹⁹ Nevakadzi vakati, “Ngegwinyiso tinozoangira kupisha mutombo kunavahosi vomudenga nokudurura mudiro wokumwa kwaari. Munopinimidza kuti takavanasirira zvingwa zvine muedzaniso wavo kuvadira nokudurura mudiro wokumwa kwevari, taiya tisina vamuna vedu here?”

²⁰ Zvino Jeremia wakati kuvanhu veshe, vamuna nevakadzi, vanhu veshe avo vaimupingura kudaro echiti,

²¹ “Asi ngendaa yomitombo yemwakapishira mumadhorobha aJudha nomumapato eJerusarema, imwimwi nemadzibaba enyu, madzimambo enyu nevatongi venyu, nevanhu venyika, Mambo Mwari aazi kuikarakadza here? Azvizi kupinda mumukarakadzo wake here?

²² Naapo Mambo Mwari asikachakoni kuringira kushata kwezviito zvenyu, zvinyangadzo zvemwakaita; ndizvo nyika yenyu yakaita dongo nokuparadzwa neyakatukwa, isina unogaramwo, kudai ngezveyakaita nyamashi.

²³ Indaa yokuti mwakapisha mutombo unegwema, nendaa yokuti mwakashaisha kunaMambo Mwari, amuzi kupurutana izwi raMambo Mwari nokuti kuhamba mumipango yake nomuzviemeso zvake nokuti mumitemo yake; ndizvo kushata uku kwawira padera penyu kudai ngezvezvakaita nyamashi.”

²⁴ Jeremia wakati kuvanhu veshe nokuvakadzi veshe, “Izwai izwi raMambo Mwari, imwimwi mweshe vokwaJudha vari munyika yeEgipite.

²⁵ Izvi ndizvo zvinoronza Mambo Mwari wehondo, Mwari waIsuraeri: Imwimwi nevakadzi venyu mwapedzera mukuita izvo zvemwakaereketa mumazwi mwechiti, ‘Ngegwinyiso tinozozarisa mhiko dzedu dzetakapika, kupisha mutombo unegwema kunavahosi vomudenga nokudurura midiro yokumwa kwevari. Ngepomunokona peshe zarisai mhiko dzenyu, mudurure mudiro wokumwa.’

²⁶ Ndizvo izwai izwi raMambo Mwari, imwimwi mweshe vaJudha vanogara munyika yeEgipite: Ringirai, ndinopika ngezina rangu guru, unoronza Mambo Mwari, kuti zina rangu arichazodaidzwi pamiromo yomunhu naumwe waJudha uri munyika yeshe yeEgipite echiti, ‘Kudai ngezvaanopona Mambo Mwari, Mwari.’

²⁷ Ringira, ndinozovarinda kuvaitira zvakashata, haiwa zvakanaka; vanhu veshe vaJudha vari munyika yeEgipite vanozopera ngeshoti nenzara, metsa kutamike naumwe wavo unosara.

²⁸ Naavo vanopokonyoka shoti, nokupetuka kunyika yaJudha kubva munyika yeEgipite, vanozoita vashomani; zvino veshe vakasara vaJudha avo vakauya koogara munyika yeEgipite vanozozia kuti mazwi anesimba ngaani, angu nokuti avo.

²⁹ Neichi chinozoita chioniso kwomuri, unoronza Mambo Mwari, chokuti ndinozomuorora mundau iyi, kuitira kuti muzie kuti mazwi angu anorwisana nemwi kumuitira zvakashata ngegwinyiso anozoitika.

³⁰ Izvi ndizvo zvinoronza Mambo Mwari: ‘Ringirai, ndinozopira Faro-Hofura mambo weEgipite munyara yemagaa ake, yaavo vanotsvaka kumuuraya; kudai ngezvendakapira Zedhekia mambo waJudha munyara dzaNebhukhadhineza mambo weBhabhuroni, gaa rake uwo waitsvaka kumuuraya.’ ”