Jer. 43 - Bhaibheri Rakachena muChindau

Jeremia Unotorwa Kuenda Egipite

¹ Naapo Jeremia apedza kuereketa kunevanhu veshe mazwi aya eshe aMambo Mwari, Mwari wavo, awo Mambo Mwari, Mwari wavo aakamutuma nawo kwevari,

² Azaria mukororo waHoshaia naJohanani mukororo waKarea, nevanhu veshe vamweni vokudzikudza, vakati kunaJeremia, “Unotironzera manyepo. Mambo Mwari wedu aazi kukutuma kutironzera kuti, ‘Musaenda koogarayo Egipite,’

³ Asi Bharukhi mukororo waNeria ndiye unokuchengedzera kurwisana nesu kuti tipirwe munyara dzevaKharadhea, kuti vatiuraye nokuti kutitora kuenda Bhabhuroni kooitwa vabatwa.”

⁴ Ndizvo Johanani mukororo waKarea nadzo dzeshe nduna dzehondo nevanhu veshe avazi kupurutana izwi raMambo Mwari, rokuti vagare munyika yaJudha.

⁵ Asi Johanani mukororo waKarea nadzo dzeshe nduna dzehondo vakatora veshe vakasara vaJudha, avo vakapetudzwa kubva kumadzinza eshe kwevaiya vadzingirwa, kuti vagare munyika yaJudha,

⁶ vamuna, vakadzi, vana, vanasikana vamambo, nomunhu weshe waakaisa Nebhuzaradhani nduna yevarindi, vaakasiya naGedharia mukororo waAhikamu mukororo waShafani; Jeremiawo muprofeti naBharukhi mukororo waNeria.

⁷ Navo vakapotera munyika yeEgipite; avazi kupurutana izwi raMambo Mwari. Ndizvo vakaguma Thafanehesi.

⁸ Zvino izwi raMambo Mwari rakauya kunaJeremia ari muThafanehesi rechiti,

⁹ “Tora mapuwe makuru ngenyara dzako, uatsire mumatope pandau yezvidhina, iri pokupotera mungome yaFaro muThafanehesi mukuona kwevanhu vaJudha.

¹⁰ Unozoti kwevari, ‘Izvi ndizvo zvinoronza Mambo Mwari wehondo, Mwari waIsuraeri: Ringira, ndinozotumira vanhu kootora muranda wangu Nebhukhadhineza, mambo weBhabhuroni, ndinozoemesa dendemaro rake padera pemapuwe aya endatsira; naye unozoemesa tende rake roumambo padera pawo.

¹¹ Unozouya, echiparadza nyika yeEgipite, echipa avo vakaemeserwa kufa ngenhenda, kuti vafe ngenhenda; naavo vakaemeserwa ubatwa, kuti vapotere muubatwa; naavo vakaemeserwa kuurawa ngeshoti, kushoti.

¹² Ndinozobasira muriro mumhatso dzezvimwari zveEgipite; naye unozozvipisha nokuzvitora muubatwa; naye unozochenesa nyika yeEgipite, kudai ngomuushi unotora bhachi rake rakachena risina inda, unozobvapo zvakanaka.

¹³ Unozopwanya miedzaniso yeHerioporisi, iri munyika yeEgipite; nemhatso dzezvimwari zvevaEgipite unozopisha ngomuriro.’ ”