Jer. 42 - Bhaibheri Rakachena muChindau

Vanhu Vanokumbira Jeremia kuti Avakumbirire

¹ Zvino nduna dzeshe dzehondo, naJohanani mukororo waKarea, naJezania mukororo waHoshaia, nevanhu veshe kubvira pamudoko kuguma kumukuru, vakauya pasinde,

² vakati kunaJeremia muprofeti, “Ita wakanaka, upurutane kupota kwedu, newe utikumbirire kunaMambo Mwari, Mwari wako, kukumbirira veshe vakasara. Ngokuti takasiiwa tiri vashomani pavazhinji vedu, kudai ngezvinoona madziso ako.

³ Mambo Mwari, Mwari wako, ngaationese kwetinosisira kuenda nezvetinosisira kuita.”

⁴ Jeremia muprofeti wakati kwevari, “Ndamuzwa; ringirai, ndinozokumbira kunaMambo Mwari, Mwari wenyu, kudai ngamazwi enyu; kunyazwi chiinyi chaanozomupingura Mambo Mwari, ndinozochironza kwomuri; andizomufishiri chiro.”

⁵ Naapo mukupingura kwavo vakati kunaJeremia, “Mambo Mwari ngaaite chapupu chegwinyiso nechinogondeka pakati pedu, kuti tikarekera kuita kudai ndizvo zveshe izvo zvaanozotitumira kubudikidza ndiwe Mambo Mwari, Mwari wako.

⁶ Kunyazwi zvakanaka nokuti zvakashata, tinozopurutana izwi raMambo Mwari, Mwari wedu, uwo wetinokutuma kwaari, kuti zvitinakire, apo petinozopurutana izwi raMambo Mwari, Mwari wedu.”

Kupingura kwaMambo Mwari kuMukumbiro waJeremia

⁷ Pamagumo emazuva gumi, izwi raMambo Mwari rakauya kunaJeremia.

⁸ Zvino wakadaidza Johanani mukororo waKarea, nenduna dzeshe dzehondo dzaiya naye, nevanhu veshe kubvira kumudoko metsa kumukuru,

⁹ naye wakati kwevari, “Izvi ndizvo zvinoronza Mambo Mwari, Mwari waIsuraeri, uwo wemwakandituma kwaari kuisa mikumbiro yenyu pamberi pake.

¹⁰ ‘Kuti mwechizoangirira kwega kugara munyika iyi, zvino ndinozomuaka, andizomupwanyiri pashi; ndinozomusima, andizomubviti; ngokuti ndineurombo ngedambudziko rendakaunza padera penyu.

¹¹ Musatya mambo weBhabhuroni kudai ngezvemwaimutya; musamutya, unoronza Mambo Mwari, ngokuti ndinemwi kumuponesa nokumusunhura kubva kunyara yake.

¹² Ndinozomuitira nyasha, naye unozomuitira nyasha, nokuita kuti muhwirire kunyika yenyu.’

¹³ Asi kuti mwechiangira kuti, ‘Atizogari munyika iyi,’ ndikwo kusikapurutana izwi raMambo Mwari, Mwari wenyu,

¹⁴ mwechiti, ‘Haiwa; tinozoenda munyika yeEgipite, umwo mwetisikazooni hondo, nokuti kuzwa kurira kwegwama nokuti nzara yechokudya; neumwo tinozogaramwo,’

¹⁵ zvino izwai izwi raMambo Mwari, O vakasara vaJudha. Izvi ndizvo zvinoronza Mambo Mwari wehondo, Mwari waIsuraeri: ‘Kuti mwechidziemesera kupinda Egipite nokugaremwo,

¹⁶ zvino shoti iyo yomunotya inozomugumira muri munyika yeEgipite; nenzara yomunotya inozomuteera iri pasinde kupinda muEgipite, naapo munozofa.

¹⁷ Vanhu veshe vadziemesera kuenda muEgipite koogaremwo vanozofa ngeshoti, ngenzara, ngedenda; akuna naumwe wavo unozosara nokuti kupona kubva kudambudziko rendinozounza padera pavo.’

¹⁸ “Ngokuti izvi ndizvo zvinoronza Mambo Mwari wehondo, Mwari waIsuraeri: ‘Kudai ngokutseneka kwangu noushungu hwangu zvakadururwa padera pevagari veJerusarema, ndizvo ushungu hwangu hunozodururwa padera penyu, apo pomunozoenda Egipite. Munozoita chiro chakadai ngemahundi nechishamiso, nokuita vakatukwa nevanoshoorwa. Amuchazoonizve ndau iyi.’ ”

¹⁹ “Mambo Mwari wati kwemuri, O vakasara vaJudha, ‘Musaenda Egipite.’ Nasai kuzia kuti ndamupanga nyamashi kuti mwakakorera kakurutu.

²⁰ Ngokuti imwimwi pachenyu mwakandituma kunaMambo Mwari, Mwari wenyu, mwechiti, Tikumbirire kunaMambo Mwari, Mwari wedu. Kunyazwi chiinyi chaanoronza Mambo Mwari wedu tironzere, nesu tinozochiita.

²¹ Ndizvo ndamuronzera nyamashi, asi amuzi kupurutana izwi raMambo Mwari, Mwari wenyu, kunyazwi ngechiri chaanonditumira kuti ndironze kwomuri.

²² Nasai kuzia zvino kuti munozofa ngeshoti, ngenzara, ngedenda, kundau iyo yomunoda kuenda.”