Jer. 40 - Bhaibheri Rakachena muChindau

Jeremia Unogara naGedharia

¹ Izwi rakauya kunaJeremia rechibva kunaMambo Mwari, ngesure kwokusunungurwa kwake kuti aende kubva Rama ndiNebhuzaradhani nduna yevarindi, apo akamutora akasungwa ngemanguri pakati paavo veshe vakatorwa kuitwa vabatwa veJerusarema neveJudha, avo vakatorwa kuenda Bhabhuroni kooizwa vabatwa.

² Nduna yevarindi yakatora Jeremia, ikati kwaari, “Mambo Mwari, Mwari wako, wakaronza uku kushata ngendau iyi;

³ nazvino Mambo Mwari wakuunza pano, naye waita kudai ngezvaakaronza, ngokuti imwimwi mweshe mwakashaisha kunaMambo Mwari, nemwi amuzi kupurutana izwi rake. Ndizvo izvi zviro zvawira padera penyu.

⁴ Zvino ringirai, ndakusunhura nyamashi maketani aiya panyara dzako. Kudai wechida kuenda neni kuBhabhuroni, uya, neni ndinozokungwarira; asi kuti usikadi kuenda neni Bhabhuroni, usauya. Ringira, nyika yeshe iripo pamberi pako, enda kunyazwi ngokuri kwounoona kwakanaka nokururama, endeyo.

⁵ Kuti wasara, zvino petuka kunaGedharia mukororo waAhikamu mukororo waShafani, uwo wakaizwa mutongi padera pemadhorobha aJudha ndimambo weBhabhuroni, ugare naye pakati pevanhu; nokuti uende kwounopinimidza kuti kwakakunakira kuti uende.” Ndizvo nduna yevarindi yakamupa chikoaniswa chezvokudya nechipo, ikamutendera kuti aende.

⁶ Zvino Jeremia wakaenda kunaGedharia mukororo waAhikamu paMizipha, akagara naye pakati paavo vanhu vakasiiwa munyikamwo.

Gedharia, Mutongi waJudha

⁷ Naapo nduna dzeshe dzehondo dzaiya murubaya, nezvikwata zvadzo, dzazwa kuti mambo weBhabhuroni waiya aemesa Gedharia mukororo waAhikamu kuti aite mutongi munyika, naye wakaemesa kwaari vamuna, vakadzi nevana, varombo venyikeyo, avo vasikazi kutorwa kuitwa vabatwa kuBhabhuroni,

⁸ vakaenda kunaGedharia paMizipha, ndivo ava: Ishumaeri mukororo waNethania, naJohanani mukororo waKarea, Seraia mukororo waThanhumethi, vakororo vaEfai muNetofa, naJezania mukororo wamuMaakathi, ivo nezvikwata zvavo.

⁹ Gedharia mukororo waAhikamu mukororo waShafani wakapika kwevari nokune zvikwata zvavo echiti, “Musatya kushandira vaKharadhea. Garai munyika muno, mwechishandira mambo weBhabhuroni, nemwi munozogarisika.

¹⁰ Asi inini, ringira, ndinozogara Mizipha kuemerera imwimwi pamberi pevaKharadhea avo vanouya kwetiri; asi imwimwi unganidzai mavhini nemichero yezienza nemafuta, mwechizvingwarira muzvidziyo zvenyu, mwechigara mumadhorobha enyu emwakatora.”

¹¹ Zvakadarawo, apo vaJudha veshe vaiya muMoabhi nepakati pevaAmoni, naavo vaiya muEdhomu nomunyika dzimweni, vazwa kuti mambo weBhabhuroni wakasiya rupande rwevanhu vaJudha, nokuti waiya aemesa padera pavo Gedharia mukororo waAhikamu mukororo waShafani kuita mutongi wavo,

¹² zvino vaJudha veshe vakahwirira kubva kundau dzeshe dzevakadzingirwa, vakauya kunyika yaJudha, kunaGedaria, paMizipha, navo vakaunganidza mavhini nemichero yezienza zvakawanda.

Gedharia Unourawa

¹³ Zvino Johanani mukororo waKarea nenduna dzeshe dzehondo dzaiya murubaya dzakauya kunaGedharia paMizipha,

¹⁴ dzikati kwaari, “Ngegwinyiso munonasa kuzia here kuti Bhaarisi mambo wevaAmoni wakatuma Ishumaeri mukororo waNethania kukuuraya?” Asi Gedharia mukororo waAhikamu aazi kuvagonda.

¹⁵ Zvino Johanani mukororo waKarea wakaereketa ngokufishika kunaGedharia paMizipha echiti, “Nditendere ndiende, ndapota, kuti ndiuraye Ishumaeri mukororo waNethania, apana naumwe unozozvizia. Ngenyi echida kukuuraya, kuti vaJudha veshe vakaungana kwouri vaparadzwe, naavo vakasara vevaJudha vapere?”

¹⁶ Asi Gedharia mukororo waAhikamu wakati kunaJohanani mukororo waKarea, “Usaita ichi chiro, ngokuti unoereketa manyepo ndiIshumaeri.”