Jer. 4 - Bhaibheri Rakachena muChindau

Kukokwa kuRutenderudzo

¹ “Kudai wechipetuka, O Isuraeri,” unoronza Mambo Mwari, “Kudai wechipetuka kwendiri, kudai wechirasha zvinyangadzo zvako kubva mukuona kwangu, ndizvo auzokutukuswi,

² nokudai wechipika, ‘Kudai ngezvaanopona Mambo Mwari,’ mugwinyiso, mukutonga kwakanaka, nomukururama, zvino madzinza anozofumiswa ndiye mwaari, vanozoganza kwaari.”

³ Ngokuti izvi ndizvo zvinoronza Mambo Mwari kunevanhu vaJudha nokune vagari veJerusarema, “Rimai minda yenyu, musakusha pakati peminzwa.

⁴ Dzichekerenyi pachenyu kunaMambo Mwari, muduse ganda romwoyo yenyu, O vanhu vaJudha nevagari vomuJerusarema, nokuti ushungu hwangu hungabuda kudai ngomuriro, unopisha pasina naumwe ungaudzima ngendaa yezvakashata zvomunoita.”

Judha Unotyisidzirwa kuti Ucharwiswa

⁵ Daidzira muJudha, uziise vari muJerusarema wechiti, “Ridzai gwama munyika; mudaidzire ngeizwi guru mwechiti, unganai pamwepo, tipotere mumadhorobha akashosherwa.

⁶ Emesai mujeki muringire Zioni; tizai kuti mupone, musanonoka, ngokuti ndinounza kushata kunobva ngedera nokuparadzwa kukurutu.”

⁷ Mhondoro yabuda kubva mugwasha; muparadzi wemadzinza wabuda munjira kuuya; wabuda kubva kundau yake kuti aparadze nyika yenyu; madhorobha enyu anozoita matongo asina unogaramwo.

⁸ Ngendaa yeizvi dzisimidzei ngemachira emasaka, mucheme muboorere: ushungu hunotyisa hwaMambo Mwari ahuzi kupera kubva kwetiri.

⁹ “Ngeiro zuva,” unoronza Mambo Mwari, “Mwoyo wamambo unozopera simba, nemwoyo yevatongi; vapristi vanozokangaidzwa nevaprofeti vanozoshama.”

¹⁰ Zvino ndakati, “A Mambo Mwari, Mwari! Ngechokwadi kuchengedzeranyi kwakakura kudai kwewakaitira vanhu ava neJerusarema wechiti, ‘Zvinozomunakira’ kunyazwi shoti apo yaiswa pahuro.”

¹¹ Ngouwo mukuwo kunozoronzwa kunevanhu ava nokuneJerusarema, kuti dutu rinopisha rinouya rechibva kwendiri kubuda ngomundau dzomushango dzakakwirira dzisina chiro rinoguma kuvanhu vangu varombo, haiwa kurudza nokuti kupepeta,

¹² dutu rinesimba kuzvikurira. Zvino ndini uwo unoereketa mukutongwa kwavo.

Judha Rinotendenedzwa ngeMagaa

¹³ Ringira, unouya kudai ngemakore, nengoro dzake dzinodai ngechipupuri; mahachi ake anorumbisa kupinda madorambudzi. Ihehe kwetiri, ngokuti taparadzwa.

¹⁴ O Jerusarema, shambidza mwoyo wako uchene kubva kunezvakashata, kuti uponeswe. Mipinimidzo yako youpenzi inozogara mukati mwako mukuwo wakadini?

¹⁵ Ngokuti izwi rinodaidzira rinobva Dhani, nerinodaidzira kutambudzika kunobva kuMutunhu Efuremu.

¹⁶ “Ronzerai madzinza, ‘Aya ari pano!’ Ringirai, daidzirai kuneJerusarema kuti magaa anouya anobva munyika irikuretu, anoridza mhere kurwisana nemadhorobha aJudha.

¹⁷ Avakomberedza mukati kudai ngevarindi vemunda, ngokuti wakandimukira,” unoronza Mambo Mwari.

¹⁸ “Njira yako nemishando yako zvakuunzira izvi padera pako; uku kuri kushata kwako, kuvavanyi kwekunoita! Zvabaya mumwoyo mwako.”

Jeremia Unosvipa Mwoyo ngendaa yeVanhu vake

¹⁹ Ndarwadziwa, mwoyo wangu! Ndarwadziwa, mwoyo wangu! Ndinorwadziwa mumwoyo wangu; mwoyo wangu unochema mukati mwangu; andikoni kunyarara, ngokuti mweya wangu wazwa kuridzwa kwegwama, nokurira kwemhere yehondo.

²⁰ Kuparadzwa kunoteera kuparadzwa, nyika yeshe yaparadzwa. Matende angu anoparadzwa ngokukasira, machira angu omukati mwematende ngomukuwo mudoko.

²¹ Ndinozoona chioniso, ndizwe kurira kwegwama mukuwo wakadini kureba?

²² Ngokuti vanhu vangu mapenzi, avazi kundizia; vakadai ngevana vane upenzi, avazwisisi. Ingwazi mukuita zvakashata, avazii kuita zvakanaka.

Chioniso chaJeremia choKuparadzwa Kuchauya

²³ Ndakaringira nyika, ringira, yaiya isina muemo wakanaka, isina chiro, nokumatenga nawo aiya asina kujeka.

²⁴ Ndakaringira mitunhu, wona, yaihuta, nezvitunhu zvaizungunyika kakurutu kuenda mberi nesure.

²⁵ Ndakaringira, wona, paiya pasina munhu, neshiri dzeshe dzomudenga dzaiya dzatiza.

²⁶ Ndakaringira, wona, ndau yakavundira yakaita rubaya nemadhorobha ayo eshe akapwanyirwa pashi pamberi paMambo Mwari, pamberi peushungu hwake hunotyisa.

²⁷ Ngokuti izvi ndizvo zvinoronza Mambo Mwari, nyika yeshe inozoparadzwa, asi andizoipedzi yaamho.

²⁸ Ngendaa yeizvi nyika inozotsumba nematenga anozosvipa; ngokuti ndakazviereketa, ndakazviemesa, andizopinduki akadi, andizokunukuki kubva kwezviri.

²⁹ Pakuzwa ngebope revagadhi vemahachi nevaposhi vemisee dhorobha reshe rinotiza; vanopotera mumakwasha, nokukwira padera pemapuwe; madhorobha eshe anosiiwa, asina munhu unogaramwo.

³⁰ Newe, O wakaparadzwa, unoitenyi kuti udzipfekedze ngamachira akatsvuka, kuti udzinemese ngezvinemeso zvomukore, kuti ukurise madziso ako ngepende? Unodzinemesa kuti unake kusina shwiro. Vadikani vako vanokushoora, vanotsvaka kukuuraya.

³¹ Ngokuti ndakazwa izwi rakadai ngeromukadzi unorwadziwa ngokubereka, unorwadziwa kwakadai ngouwo unobereka mwana wedangwe, kuchema kwemwanasikana weZioni, unofemurika echitambanudza nyara dzake echiti, “Ihehe kwendiri zvino! Inini mweya wangu unopera simba pamberi pevaurayi.”