Jer. 38 - Bhaibheri Rakachena muChindau

Jeremia Ari muRindi Rakaoma

¹ Zvino Shefatia mukororo waMatani, naGedharia mukororo waPhashuri, Jukari mukororo waSheremia, naPhashuri mukororo waMarikhia vakazwa mazwi eshe aakaereketa Jeremia kuvanhu veshe vechiti,

² “Izvi ndizvo zvinoronza Mambo Mwari: Avo vanogara mudhorobha iri vanozofa ngeshoti, ngenzara, nedenda: asi avo vanobuda kuenda kuvaKharadhea vanozopona; nokupona kwavo kunozoitwa kudai ngechakapambwa kuhondo, navo vanozopona.

³ Izvi ndizvo zvinoronza Mambo Mwari: ‘Ngechokwadi dhorobha iri rinozopuwa munyara yehondo yamambo weBhabhuroni, nayo inozorinyisa.’ ”

⁴ Zvino vatongi vakati kunamambo, “Munhu uyu unosisira kuti aurawe, ngokuti unopedza simba renyara dzevamuna vokurwa vanosiyiwa mudhorobha iri, nenyara dzavanhu veshe, ngokuereketa mazwi akadai kwevari. Ngokuti munhu uyu aatsvaki kugarisika kwavanhu ava, asi kuremadzwa kwavo.”

⁵ Mambo Zedhekia wakati, “Ringirai, uri munyara dzenyu; ngokuti mambo aana simba rokuphikisana nemwi.”

⁶ Ndizvo vakatora Jeremia, vakamukandira murindi rakaoma raMarikhia mukororo wamambo, raiya muruwanze rwevarindi; navo vakadzasa Jeremia ngetambo. Murindi mwaiya musina mvura, asi matope ega; ndizvo Jeremia wakanzvaira mumatope.

⁷ Ebhedhimerekhi muEthiopia, mutenwa mumhatso yamambo, azwa kuti Jeremia waiswa murindi. Mambo ngouwo mukuwo waiya akagara paMusiwo Bhenjamini.

⁸ Ndizvo Ebhedhimerekhi wakabuda kubva kumhatso yamambo, akaereketa kunamambo echiti,

⁹ “Mambo wangu, mambo, vanhu ava vaita zveshe zvakashata kunaJeremia muprofeti ngokumukandira murindi, kuti afiremwo ngenzara, ngokuti akuchina kudya mudhorobha.”

¹⁰ Zvino mambo wakapanga Ebhedhimerekhi muEthiopia echiti, “Tora vamuna vatatu kubva panapa, uende navo mubudise muprofeti Jeremia kubva murindi, asati afa.”

¹¹ Ndizvo Ebhedhimerekhi wakatora vamuna kuenda navo, vakaenda kumhatso yamambo pashi pendau youpfumi, vakatorapo matembwe nematsoto, akaadzasa ngetambo murindi munaJeremia.

¹² Zvino Ebhedhimerekhi muEthiopia wakati kunaJeremia, “Isa matembwe nematsoto pakati pemagwapa ako netambo.” NaJeremia wakaita kudaro.

¹³ Zvino vakakweya Jeremia ngetambo, vakamubudisa kubva murindi. Jeremia wakagara muruwanze rwevarindi.

Zedhekia Unotsvaka Kupanga kwaJeremia

¹⁴ Mambo Zedhekia wakatumira kootora Jeremia muprofeti naye wakamuashira pamusiwo wechitatu, uwo uri mumhatso yaMambo Mwari. Mambo wakati kunaJeremia, “Ndine chiro chokubvunza; usandifishira chiro nachimwe.”

¹⁵ Jeremia wakati kunaZedhekia, “Kuti ndikakuronzera, unozondiuraya, andizvopi here? Nokuti ndikakupanga, auzondipurutani.”

¹⁶ Ndizvo mambo Zedhekia wakapika ngokufishika kunaJeremia echiti, “Kudai ngezvaanopona Mambo Mwari, uwo wakatisika unotipa kupona kwedu, andizokuurayi nokuti kukupa munyara mwevanhu avo vanotsvaka kukuuraya.”

¹⁷ Zvino Jeremia wakati kunaZedhekia, “Izvi ndizvo zvinoronza Mambo Mwari, Mwari wehondo, Mwari waIsuraeri: Kudai wechizodzipira kwega kuvatongi vamambo weBhabhuroni, unozopona, nedhorobha iri arizopishwi ngomuriro; iwewe unozopona nevemhatso yako.

¹⁸ Asi kudai usikazodzipiri kuvatongi vamambo weBhabhuroni, dhorobha iri rinozopirwa munyara yevaKharadhea, navo vanozoripisha ngomuriro, newe auzopokonyoki kubva munyara yavo.”

¹⁹ Mambo Zedhekia wakati kunaJeremia, “Ndinotya vaJudha avo vakadzipira kuvaKharadhea, kuti vanozondipira munyara dzavo, navo vanozondiitira zvakashata.”

²⁰ Jeremia wakati, “Izvo azvizoitiki. Purutana izwi raMambo Mwari muneizvo zvendinokuronzera, nazvo zvinozokunakira, newe unozopona.

²¹ Asi kudai wechiramba kudzipira, izvi ndizvo zvaakandionisa Mambo Mwari:

²² Ringira, chioniso chevakadzi veshe vakasara mumhatso yamambo waJudha vanozotorwa kuenda kuvatongi vamambo weBhabhuroni, vanozoti, ‘Vangani vako vakagondeka vakuchengedzera, vakunyisa; ndizvo tsoka dzako dzanzvaira mumatope, navo vakufuratira.’

²³ Vakadzi vako veshe navana vako vanozotungamirirwa kuenda kuvaKharadhea, newe auzobudi kubva munyara dzavo, asi unozobatwa ngenyara dzamambo weBhabhuroni, nedhorobha iri rinozopishwa ngomuriro.”

²⁴ Zvino Zedhekia wakati kunaJeremia, “Usaronzera munhu naumwe mazwi aya, newe auzofi.

²⁵ Kuti vatongi vakazwa kuti ndaereketa newe, vakauya kwouri vechiti, ‘Tiziise zvewaronza kunamambo, nezvaakuronzera mambo; usatifishira, nesu atizokuurayi,’

²⁶ zvino unozoti kwevari, ‘Ndapota kunamambo kuti asandihwirinza kumhasto yaJonathani, kuti ndifireyo.’ ”

²⁷ Vatongi veshe vakauya kunaJeremia, vakamubvunza; naye wakavapingura kudai ngamazwi eshe aakapangwa ndimambo. Ndizvo vakanyarara kumubvunza, ngokuti indaa isaiziikanwa.

²⁸ NaJeremia wakagara muruwanze rwevarindi metsa zuva rerakatorwa Jerusarema.