Jer. 37 - Bhaibheri Rakachena muChindau

Chikumbiro chaZedhekia kunaJeremia

¹ Zedhekia mukororo waJosia wakaitwa mambo munyika yaJudha ndimamboNebhukadhineza mambo weBhabhuroni pandau yaKhonia mukororo waJehoiakimu.

² Asi kunyazwi iye nokuti varanda vake, nokuti vanhu venyika iyi avazi kupurutana mazwi aMambo Mwari, aakaereketa ngomuromo womuprofeti Jeremia.

³ Zedhekia mambo wakatuma Jehukari mukororo waSheremia, nomupristi Zefania mukororo waMaaseia, kunaJeremia muprofeti echiti, “Tapota tikumbirire kunaMambo Mwari, Mwari wedu.”

⁴ Zvino Jeremia waiya achapinda nokubuda pakati pevanhu, ngokuti waiya asati aiswa mutirongo.

⁵ Panguva iyo hondo yaFaro yaiya yabuda kubva Egipite; naapo vaKharadhea vaiya vakomba Jerusarema vazwa mashoko ndivo, vakaenda kubva Jerusarema.

⁶ Zvino izwi raMambo Mwari rakauya kunomuprofeti Jeremia rechiti,

⁷ “Izvi ndizvo zvinoronza Mambo Mwari, Mwari waIsuraeri: Izvi ndizvo zvomunozoronza imwimwi vairi kuna mambo waJudha uwo wakamutuma kwendiri kundibvunza; ringirai, hondo yaFaro iyo yakabuda kumudetsera inozopetuka kunyika yayo Egipite.

⁸ NevaKharadhea vanozopetuka nokurwisa iri dhorobha; vanozorinyisa nokuripisha ngomuriro.

⁹ Izvi ndizvo zvinoronza Mambo Mwari: Musadzichengedzera mwechiti, ‘VaKharadhea vanozobva kwetiri ngegwinyiso,’ ngokuti avazobvi akadi.

¹⁰ Kunyazwi mukanyisa hondo yeshe yevaKharadhea, iyo inorwa nemwi, apo panozosara vamweni vavo vakaremadzwa mumatende avo, vanozomiruka umwe ngaumwe kubva kutende rake, nokupisha dhorobha iri ngomuriro.”

Jeremia Unosungwa noKuiswa muTirongo

¹¹ Zvino apo hondo yevaKharadhea yaduswa kubva Jerusarema, pakuguma kwehondo yaFaro,

¹² Jeremia wakabuda kubva Jerusarema, akaenda kunyika yaBhenjamini, kuti aashire chikoaniswa chake kubva pakati pevanhu.

¹³ Naapo aguma paMusiwo Bhenjamini, nduna yokurinda yaiyapo, zina rake ndiIrija, mukororo waSheremia, mukororo waHanania, wakabata Jeremia muprofeti echiti, “Iwewe unotizira kuvaKharadhea.”

¹⁴ Ndizvo Jeremia wakati, “Awo manyepo, andiendi kooiyana nevaKharadhea.” Asi Irija aazi kumupurutana, naye wakabata Jeremia, akamuunza kuvatongi.

¹⁵ Vatongi vakamutsenekera Jeremia, vakamuchaya, vakamukonyera mutirongo mumhatso yaJonathani munyori; ngokuti vaiya vaiita tirongo.

¹⁶ Ndizvo Jeremia wakapinzwa mutirongo mukamera rakatsiwa pashi, wakagaramwo mazuva mazhinji.

¹⁷ Zvino Zedhekia mambo wakatumira izwi kuti abudiswe nokumuashira. Mambo wakamubvunza ngokufishika mumhatso echiti, “Riripo here izwi rabva kunaMambo Mwari?” Jeremia wakati, “Riripo.” Zvino wakati, “Unozopirwa munyara yamambo weBhabhuroni.”

¹⁸ Jeremia wakatiwo kunamambo Zedhekia, “Chiinyi chendakakushaishira iwewe nokuti varanda vako, nokuti ava vanhu kuti undikonyere mutirongo?

¹⁹ Vari pari zvino vaprofeti venyu vakaprofeta kwomuri vechiti, ‘Mambo weBhabhuroni aazouyi koorwa nemwi, nokuti kurwa neiyi nyika?’

²⁰ Zvino, ndapota, ndizwei, O mambo wangu; kupota kwangu ngakuashirike pamberi penyu, ndapota, kuti musaita kuti ndihwirire kumhatso yaJonathani munyori, kuti ndifireyo.”

²¹ Ndizvo Zedhekia mambo wakapanga kuti vaunze Jeremia muruwanze rwevarindi, nokumupa mazuva eshe chingwa kubva kumhatso dzevabiki, metsa zvingwa zveshe zvomudhorobha zvapera. Ndizvo Jeremia wakagara muruwanze rwevarindi.