Jer. 36 - Bhaibheri Rakachena muChindau

Bharukhi Unofunda Bhuku Rinopetwa muMhatso yaMwari

¹ Mugore rechirongomuna Jehoiakimu mukororo waJosia raaiya mambo waJudha, izwi iri rakauya kunaJeremia rechibva kunaMambo Mwari rechiti,

² “Tora bhuku rinopetwa, unyore mukati mwaro eshe mazwi endakaereketa kwouri ndiIsuraeri naJudha, nemadzinza eshe kubvira pazuva rendakaereketa kwouri, kubvira pamazuva aJosia metsa nyamashi.

³ Pamweni vemhatso yaJudha pevanozwa kweshe kushata kwendakaronga kuita kwevari, veshe umwe ngaumwe wavo ungatenderuka kubva kunjira yake yakashata, kuti ndikone kurekerera kushata kwavo nezvishaishi zvavo.”

⁴ Zvino Jeremia wakadaidza Bharukhi mukororo waNeria, naBharukhi wakanyora pabhuku rinopetwa mazwi eshe aMambo Mwari kubva kumuromo waJeremia.

⁵ NaJeremia wakapanga Bharukhi echiti, “Ndakakonyerwa, kuti ndisakona kupotera mumhatso yaMambo Mwari.

⁶ Ndizvo iwewe pachako enda, nepazuva rokuyera kudya, udaidzire mazwi aMambo Mwari munzee dzavanhu, mumhatso yaMambo Mwari, kubva pabhuku rinopetwa pewanyora, mazwi anobva pamuromo wangu. Unozoadzidza mukuzwa kwevanhu veshe vaJudha, avo vakwira kubva kumadhorobha avo.

⁷ Pamweni vanozouya koopota kunaMambo Mwari nokutenderuka, umwe ngaumwe kubva kunjira yake yakashata, ngokuti kutseneka noushungu hwakashata zvaakaronza Mambo Mwari kunevanhu ava zvikuru.”

⁸ NaBharukhi mukororo waNeria wakaita zveshe izvo zvaakamupanga Jeremia muprofeti, kudzidza kubva mubhuku rinopetwa mazwi aMambo Mwari mumhatso yaMambo Mwari.

⁹ Mugore rechishanu ramambo Jehoiakimu, mukororo waJosia, mambo waJudha, mumwedzi wechipfumbamwe, vanhu veshe vomuJerusarema nevevanhu veshe avo vakauya kubva kumadhorobha aJudha vechiuya Jerusarema vakadaidzira zuva rokuera kudya pamberi paMambo Mwari.

¹⁰ Zvino mukuzwa kwevanhu veshe, Bharukhi wakafunda mazwi aJeremia kubva mubhuku rinopetwa, mumhatso yaMambo Mwari, mukamera raGemaria mukororo waShafani munyori, iro raiya paruwanze rwepadera pokupinda ndipo paMusiwo Mutsva wemhatso yaMambo Mwari.

Bhuku Rinopetwa Rinodzidzirwa Vatongi

¹¹ Naapo Mikhaia mukororo waGemaria, mukororo waShafani, azwa mazwi eshe aMambo Mwari kubva mubhuku rinopetwa,

¹² wakadzaka kumhatso yamambo mukamera romunyori; ringira, vatongi veshe vaiya vakagaramwo, Erishama munyori, naDheraia mukororo waShemaia, naErinathani mukororo waAkhebhori, Gemaria mukororo waShafani, Zedhekia mukororo waHanania, nevatongi veshe.

¹³ NaMikhaia wakavaronzera mazwi eshe awo aakazwa, apo Bharukhi paakafunda bhuku rinopetwa mukuzwa kwevanhu veshe.

¹⁴ Zvino vatongi veshe vakatuma Jehudhi mukororo waNethania, mukororo waSheremia, mukororo waKhushi kunaBharukhi vechiti, “Tora munyara yako iri bhuku rinopetwa iro rewakafunda mukuzwa kwevanhu veshe, uuye.” Ndizvo Bharukhi mukororo waNeria wakatora bhuku iro munyara yake, akauya kwevari.

¹⁵ Navo vakati kwaari, “Gara pashi, urifunde kwetiri tizwe.” Ndizvo Bharukhi wakarifunda kwevari.

¹⁶ Naapo vazwa mazwi eshe, vakakunukira umwe kunoumweni vechikaruka, vorovoti kunaBharukhi, “Ngegwinyiso tinozoronzera mambo ngaaya mazwi eshe.”

¹⁷ Zvino vakabvunza Bharukhi kuti, “Tironzere zvino, wakaita manyorerenyi mazwi aya eshe? Kubva kumuromo wake here?”

¹⁸ Bharukhi wakavapingura echiti, “Iye wakaereketa mazwi aya eshe kwendiri, neni ndakaanyora ngeinki mubhuku rinopetwa.”

¹⁹ Zvino vatongi vakati kunaBharukhi, “Enda, woohwara, iwewe naJeremia; musazoronzera nomunhu ngepomuri.”

Mambo Unopisha Bhuku Rinopetwa

²⁰ Vatongi vakaisa bhuku rinopetwa mukamera raErishama munyori, vakapotera muruwanze rwamambo; vakaronza mazwi eshe munzee dzamambo.

²¹ Zvino mambo wakatuma Jehudhi kootora bhuku rinopetwa, naye wakaritora kubva mukamera raErishama munyori; naJehudhi wakarifunda munzee dzamambo, nomunzee dzevatongi veshe vaiya vakaema namambo.

²² Zvino mambo waiya akagara mumhatso yepachando ngomwedzi wechipfumbamwe, nomuriro waiya wechibaka pachoto pamberi pake.

²³ Naapo Jehudhi afunda marupande matatu nokuti marongomuna, mambo wairicheka ngechipanga, echikandira mumuriro pachoto, metsa bhuku reshe rakatsva ngomuriro waiya muchiwenda.

²⁴ Asi apana naumwe wavo, mambo nokuti umwe wevaranda vake wakazwa mazwi aya eshe wakashamiswa nokuti wakatatura zvokusimira zvake.

²⁵ Kunyazwi Erinathani, Dheraia, naGemaria vakapota mambo, kuti asapisha bhuku, asaizoda kuvapurutana.

²⁶ Namambo wakapanga Jerameeri mukororo wamambo, Seraia mukororo waAzirieri, naSheremia mukororo waAbhidheeri, kubata Bharukhi munyori nomuprofeti Jeremia. Asi Mambo Mwari wakavafisha.

Jeremia Unonyora Bhuku Rinopetwa Rimweni

²⁷ Zvino Mambo apedza kupisha bhuku, nemazwi akanyorwa ndiBharukhi kubva pamuromo waJeremia, izwi raMambo Mwari rakauya kunaJeremia rechiti,

²⁸ “Torazve bhuku rinopetwa, unyore mukati mwaro mazwi eshe okutanga aiya mubhuku rinopetwa rokutanga, raakapisha Jehoiakimu mambo waJudha.

²⁹ Newe unozoti kunaJehoiakimu, ‘Mambo Mwari unoronza izvi: Washinga kupisha bhuku iri wechiti, wainyora ngenyi, kuti mambo weBhabhuroni ngegwinyiso unozouya nokuparadza nyika iyi, unozoita kuti iteme munhu nemhuka?’

³⁰ Ndizvo izvi ndizvo zvinoronza Mambo Mwari ngendaa yaJehoiakimu mambo waJudha: Aazowi naumwe unozogara padendemaro raDhavhidha, nomuiri wake wakafa unozokandirwa kubanze mukupisha kwemasikati nomuchando usiku.

³¹ Neni ndinozomuorora, nemibarirwana yake nevaranda vake ngendaa yokushata kwavo; ndinozounza padera pavo, nepadera pevagari vomuJerusarema, nepadera pevanhu vaJudha, kushata kweshe kwendakaronza kwevari; asi avazi kupurutana.”

³² Zvino Jeremia wakatora bhuku rinopetwa rimweni akaripa kunaBharukhi munyori, mukororo waNeria; uwo wakanyora mukati mwaro, kubva kumuromo waJeremia, mazwi eshe ebhuku iro rakapishwa mumuriro ndiJehoiakimu mambo waJudha; kwakatutsirwa kwaari mazwi amweni mazhinji akadai ngokutanga.