Jer. 35 - Bhaibheri Rakachena muChindau

Jeremia neVaRekhabhi

¹ Izwi raMambo Mwari rakauya kunaJeremia rechibva kunaMambo Mwari, ngemazuva amambo Jehoiakimu mukororo waJosia waJudha rechiti,

² “Enda kumhatso yevaRekhabhi, uerekete navo nokuvaunza kumhatso yaMambo Mwari, kunerimwe remakamera, uvape vhini kuti vamwe.”

³ Ndizvo ndakatora Jaazania mukororo waJeremia, mukororo waHabhazinia, nehama dzake nevakororo vake veshe, navo veshe vemhatso yevaRekhabhi.

⁴ Ndakavaunza mumhatso yaMambo Mwari, mukamera revakororo vaHanani, mukororo waIgidharia, munhu waMwari, iro raiya pasinde pekamera revatongi, padera pekamera raMaaseia mukororo waSharumu, mungwariri womusiwo.

⁵ Zvino ndakaisa pamberi pevakororo vevaRekhabhi hari dzakazara ngevhini, netsani, ndikati kwevari, “Imwai vhini.”

⁶ Asi vakati, “Atimwi vhini, ngokuti madzibaba edu Jonadhabhi mukororo waRekhabhi, wakatipanga echiti, ‘Amuzomwi vhini, imwimwi nokuti vana venyu mhera nariini;

⁷ nokuti amuzoaki mhatso nokuti kukusha mbeu, nokuti kunyazwi kusima munda wemivhini, nokuti kunyazwi kuwa nachimwe chazvo; asi munozogara mumatende mazuva enyu eshe, kuti mupone mazuva akawanda munyika yomunogara.’

⁸ Tapurutana kupanga kwezibaba redu Jonadhabhi mukororo waRekhabhi mune izvo zveshe zvaakatipanga, kuti tisamwa vhini mumazuva edu eshe, isusu, nokuti vakadzi vedu, vakororo nokuti vanasikana vedu,

⁹ nokuti kuaka mhatso dzokugaramwo. Atina munda wemivhini, nokuti munda, nokuti mbeu;

¹⁰ asi tagara mumatende, nokupurutana nokuita zveshe zvaakatipanga Jonadhabhi baba edu.

¹¹ Asi apo Nebhukhadhineza mambo weBhabhuroni paakauya koorwisa nyika, takati, ‘Uyai, ngatiende Jerusarema, ngokuti tinotya hondo yevaKharadhea nehondo yevaAramu.’ Ndiyo ndaa techigara muJerusarema.”

¹² Zvino izwi raMambo Mwari rakauya kunaJeremia rechiti,

¹³ “Izvi ndizvo zvinoronza Mambo Mwari wehondo, Mwari waIsuraeri: Enda, wooronza kuvanhu vaJudha nevagari vomuJerusarema kuti, ‘Amukoni kudzidza here chidzidzo nokupurutana mazwi angu?’ Unoronza Mambo Mwari.

¹⁴ ‘Mupango wakazadzisika uwo Jonadhabhi mukororo waRekhabhi waakapanga kumibarirwana yake kuti vasamwa vhini; navo avazi kumwa narimwe metsa nyamashi, ngokuti vakapurutana mupango wababa avo. Asi inini pachangu ndakaangira kuereketa kwomuri, neimwimwi amuzi kupurutana kwendiri.

¹⁵ Ndatumira kwomuri veshe varanda vangu vaprofeti, ndechiangira kuvatumira ndechiti, tenderukai zvino munhu weshe kubva kunjira yake yakashata, munasirise zviito zvenyu, murekere kuteera zvimwari zvimweni kuzvidira, nemwi zvino munozogara muiyi nyika yendakamupa, imwimwi nemadzibaba enyu.’ ” Asi amuzi kutenda kuzwa nokuti kundipurutana.

¹⁶ Mibarirwana yaJonadhabhi mukororo waRekhabhi vakapurutana mupango uwo wevakapuwa ndibaba avo; asi vanhu ava avazi kupurutana kwendiri.

¹⁷ “Ndizvo izvi zvinoronza Mambo Mwari, Mwari wehondo, Mwari waIsuraeri: Ringirai, ndinozounza padera paJudha, nepadera paavo veshe vagari veJerusarema kushata kweshe kwendakaronza kwevari; ngokuti ndakaereketa kwevari, navo avazi kupurutana, ndakadaidza kwevari, navo avazi kupingura.”

¹⁸ Asi kumhatso yevaRekhabhi Jeremia wakati, “Izvi ndizvo zvinoronza Mambo Mwari wehondo, Mwari waIsuraeri: ‘Ngokuti mwakapurutana mupango waJonadhabhi baba enyu, nokungwarira zviemeso zvake zveshe, mukaita zveshe zvaakamupanga,’

¹⁹ Izvi ndizvo zvinoronza Mambo Mwari wehondo, Mwari waIsuraeri: ‘Jonadhabhi mukororo waRekhabhi aazotami mubarirwana wokuema pamberi pangu mhera nariini.’ ”