Jer. 34 - Bhaibheri Rakachena muChindau

Izwi kunaZedhekia

¹ Izwi rakauya kunaJeremia kubva kunaMambo Mwari, apo Nebhukhadhineza mambo weBhabhuroni, nehondo yake yeshe, noumambo hweshe hwenyika nevanhu veshe pashi poumambo hwake, vairwisana neJerusarema namadhorobha aro eshe.

² “Izvi ndizvo zvinoronza Mambo Mwari, Mwari waIsuraeri echiti, ‘Enda uerekete kunaZedhekia mambo waJudha, wechimuronzera kuti, izvi ndizvo zvinoronza Mambo Mwari: Ringira, ndinozopa iri dhorobha munyara yamambo weBhabhuroni, naye unozoripisha ngomuriro.’

³ Newe pachako auzopokonyoki kubva munyara yake, asi ngegwinyiso unozobatwa nokupirwa munyara yake; unozoona mambo weBhabhuroni dziso kudziso, nokuereketa naye hope kuhope; newe unozoenda Bhabhuroni.

⁴ Asi izwa izwi raMambo Mwari, O Zedhekia mambo waJudha; izvi ndizvo zvinoronza Mambo Mwari ngendaa yako: Auzofi ngeshoti,

⁵ unozofa mukunyarara. Kudai ngezvekwaiya nokupishwa kwomutombo unegwema rakanaka kupishira madzibaba ako, madzimambo okutanga pamberi pako, ndizvo vanozoupishira iwewe; navo vanozokuchema vechiti, ‘Yoowe! Mambowee!’ Ngokuti ndaereketa izwi, unoronza Mambo Mwari.”

⁶ Zvino Jeremia muprofeti wakaereketa mazwi aya eshe kunaZedhekia mambo waJudha muJerusarema,

⁷ naapo hondo yamambo weBhabhuroni yechirwa neJerusarema, nemadhorobha eshe aJudha akasara, Rakhishi naAzeka; ngokuti aya ndiwo madhorobha aJudha akasara akashosherwa.

Vakabata Hloko ngoKuchengedzera

⁸ Izwi iro rakauya kunaJeremia rechibva kunaMambo Mwari ngesure apo mambo Zedhekia aita chitenderano nevanhu veshe vomuJerusarema, kuronza kwevari ngokusunhurika,

⁹ kuti munhu weshe asunhure hloko dzake vamuna nevakadzi vecheHebheru, kuti kusazoapo naumwe unozobatazve hama yake muJudha kumuita hloko.

¹⁰ Navo vakapurutana vakuru veshe nevanhu veshe avo vakatenda chitenderano kuti munhu weshe umwe ngaumwe kuti vasunhure hloko dzavo, mwamuna nokuti mukadzi, kuti vachazoitazve hloko; vakapurutana, vakavasunhura.

¹¹ Asi ngesureni vakakunukuka, vakavatorazve vamuna nevakadzi kuvaita hloko avo vevaiya vasunhura nokuvaunzazve muuhloko.

¹² Izwi raMambo Mwari rakaguma kunaJeremia kubva kunaMambo Mwari:

¹³ Izvi ndizvo zvinoronza Mambo Mwari, Mwari waIsuraeri: “Inini pachangu ndakaita chitenderano nemadzibaba enyu apo pendakavabudisa kubva munyika yeEgipite, kubva mumhatso youhloko ndecheti,

¹⁴ ‘Reshe gore rechinomwe umwe ngaumwe wenyu unosisira kusunhura kunyazwi ngeuri muHebheru, uwo wakatengeswa kwomuri, naye akushandira makore matanhatu; unosisira kumusunhura kubva kumishando yako.’ Asi madzibaba enyu aazi kundipurutana nokuti kundizwa.

¹⁵ Imwimwi pachenyu mwakatenderuka zvinopano, nemwi mwakaita zvakarurama mukuona kwangu, ngokudaidzira kusunhurika umwe kuneumweni wake; mwakaita chitenderano pamberi pangu mumhatso inodaidzwa ngezina rangu;

¹⁶ asi zvino mwakapetuka sure nokusvipisa zina rangu, apo umwe ngaumwe wenyu paakatorazve mwamuna nomukadzi kuvaita hloko, avo vemwaiya mwasunhura kudai ngokudisisa kwavo, mukavaunzazve pashi pouhloko.

¹⁷ Ndizvo izvi ndizvo zvinoronza Mambo Mwari: Amuzi kundipurutana ngokuisa kusunhurwa, umwe ngaumwe kuhama yake nokumungani wake; ringira, ndinozoisa kusunhurwa kwomuri, unoronza Mambo Mwari, kusunhurwa kweshoti, kwedenda, nokwenzara. Ndinozomuita chiro chinotyisa kuumambo hweshe hwenyika.

¹⁸ Naavo vanhu vakagura chitenderano changu, avo vasikazi kuita mazwi echitenderano chevakaita pamberi pangu, ndinozovaita kudai ngekonyana apo pevakariita zvigurwa zviiri, nokuhamba ngepakati pezvigurwa zvaro.

¹⁹ Vakuru vaJudha, vakuru veJerusarema, vathenwa, vapristi, nevanhu veshe venyika, avo vakapinda ngepakati pezvigurwa zvekonyana,

²⁰ ndinozovapira munyara dzemagaa avo, nomunyara yaavo vanotsvaka kuvauraya. Miiri yavo yakafa inozodyiwa ngeshiri dzomudenga nezvikara zvenyika.

²¹ Ndinozopira Zedhekia mambo waJudha nevatongi vake munyara dzemagaa avo nomunyara dzaavo vanotsvaka kuvauraya, nomunyara dzehondo yamambo weBhabhuroni, avo vabva kwomuri.

²² Ringira, ndinozopanga, unoronza Mambo Mwari, naye unozovapetudza kuiri dhorobha; navo vanozorirwisa nokuritora, nokuripisha ngomuriro. Madhorobha aJudha ndinozoaita matongo, asina unogaremwo.”