Jer. 33 - Bhaibheri Rakachena muChindau

Chigondiso Chimweni choKugonda

¹ Izwi raMambo Mwari rakauya kunaJeremia ngokwechipiri, achakakonyerwa muruwanze rwevarindi rechiti,

² “Izvi ndizvo zvinoronza Mambo Mwari muiti wenyika, Mambo Mwari, uwo wakaiita nokugwinyisa; Mambo Mwari ndiro zina rake:

³ Daidzai kwendiri, neni ndinozomupingura, nokumuronzera zviro zvikuru nezvakafishika zvomusaizia.

⁴ Ngokuti izvi ndizvo zvinoronza Mambo Mwari, Mwari waIsuraeri, ngendaa yemhatso dzedhorobha iri, nemhatso dzemadzimambo aJudha, idzo dzakaputsirwa pashi kudzirwira naavo vakaaka mirwi yamavhu, pamberi peshoti.

⁵ VaKharadhea vanouya koorwa nokuazadza ngemiiri yakafa, yeavo vendichauraya mukutseneka kwangu nomuushungu hwangu, ngokuti ndafisha hope yangu kubva kudhorobha iri, ngendaa yokushata kwavo kweshe.

⁶ Ringira, ndinozoriponesa nokurirapa, ndinozovarapa nokuvaonisa kukura kwokunyarara nokwokungwaririka.

⁷ Ndinozopetudza vakabatwa vaJudha, nevaIsuraeri, nokuvaaka kudai ngezvevaiya vakaita pakutanga.

⁸ Ndinozovachenesa kubva mukusvipiswa kwavo kweshe kwevakaitwa ngokushaisha nokumukira kwavo neni ndinozovakungurira kushata kweshe kwezvishaishi zvavo nokumukira kwevakaita kwendiri.

⁹ Dhorobha iri rinozoita kwendiri zina rokudakara, kukudzwa nokuremeredzwa mukuona kwemadzinza eshe enyika, awo anozozwa ngezvakanaka zveshe zvendinovaitira; anozotya nokuhuta ngendaa yokunaka uku kweshe, kubudirira nokunyarara kweshe kwendinozoriunzira.”

¹⁰ Izvi ndizvo zvinoronza Mambo Mwari; “Mundau iyi yomunoronza kuti, yaita matongo, isina munhu nokuti mhuka, mumadhorobha aJudha, nomumapato eJerusarema, awo aita matongo, asina munhu unogaremwo nokuti mhuka

¹¹ kunozozwikazve, izwi rokudakara, nerokudakadzwa, izwi romukwambo, neramakhoti, nemazwi eavo vanoemba, apo vanounza mudiro wokubonga kumhatso yaMambo Mwari, “ ‘Kubonga Mambo Mwari wehondo, ngokuti Mambo Mwari wakanaka; ngokuti nyasha dzake dzinorudo dzinogara mhera nariini!’ Ngokuti ndinozounza avo vakabatwa venyika iyi kuti vaite kudai ngepakutanga,” unoronza Mambo Mwari.

¹² Izvi ndizvo zvinoronza Mambo Mwari wehondo: “Mundau iyi yaita matongo isina munhu nokuti mhuka, nomumadhorobha ayo eshe, kunozoapo nemafuro vaushi, vechiita kuti zvifuyo zvavo zvizorore pashi.

¹³ Mumadhorobha omunyika yezvimitunhu, neemubani, nomumadhorobha okubani, nomunyika yaBhenjamini, nomundau dzinotendenedza Jerusarema, nomumadhorobha aJudha, zvifuyo zvinozopinda ngepashi penyara youwo unodzierenga,” unoronza Mambo Mwari.

¹⁴ “Ringira, ngegwinyiso mazuva anouya, unoronza Mambo Mwari, apo pendinozozadzisa chigondiso chendakagondisa mhatso yaIsuraeri nemhatso yaJudha.

¹⁵ Mumazuva awo, nouwo mukuwo ndinozoita kuti Dai rokururama rikure kunaDhavhidha; naye unozotonga zvakanaka, nokururamisa munyika iyi.

¹⁶ Mumazuva awo Judha unozoponeswa neJerusarema rinozogarisika mukungwaririka. Neiri ndiro zina raanozodaidzwa ndiro rokuti, ‘Mambo Mwari Ndiye Kururama kwedu.’

¹⁷ Ngokuti izvi ndizvo zvinoronza Mambo Mwari: Dhavhidha aatongozotami munhu wokugara padendemaro remhatso yaIsuraeri,

¹⁸ nevapristi vaRevhi avatongozotami munhu wokuema pamberi pangu kupira midiro yokupira, nokupisha midiro yezviyo, nokupira midiro yokubaira nguva dzeshe.”

¹⁹ Izwi raMambo Mwari rakauya kunaJeremia rechiti,

²⁰ “Izvi ndizvo zvinoronza Mambo Mwari: Kudai mwechikona kugura chitenderano changu chemasikati nechousiku, nokuita kuti kusaapo masikati nousiku ngomukuwo wazvo,

²¹ zvino ndipo pega apo chitenderano changu nomuranda wangu Dhavhidha, chingaguka kuti asaano mukororo wokutonga padendemaro rake nechitenderano changu nevaRevhi, vevapristi, avo vanondishandira.

²² Kudai ngehondo dzomudenga dzisikaerengeki, nejecha romuruandhle risikapimiki, ndizvo ndinozowanza mibarirwana yaDhavhidha muranda wangu neyevaRevhi avo vanondishandira.”

²³ Izwi raMambo Mwari rakauya kunaJeremia rechiti,

²⁴ “Auzi kunasa kuringira here zvevanoronza ava vanhu, apo pevanoti, ‘Madzinza mairi akatsanangurwa ndiMambo Mwari akarambwa ndiye,’ ndizvo vanoshoora vanhu vangu ngenjiranyi kuti vasachaita dzinza mukuona kwavo?

²⁵ Izvi ndizvo zvinoronza Mambo Mwari: Kwega kudai ndisikazi kuemesa chitenderano changu chemasikati nechousiku nezviemeso zvomudenga nezvomunyika,

²⁶ ndingazoramba mibarirwana yaJakobe, neyeDhavhidha muranda wangu, ndisatsanangura naumwe wemibarirwana yake kutonga padera pemibarirwana yaAbrahama, Isaka, naJakobe. Ngokuti ndinozopetudza vabatwa vavo nokuvaitira nyasha.”