Jer. 32 - Bhaibheri Rakachena muChindau

Jeremia Unotenga Munda

¹ Izwi rakauya kunaJeremia kubva kunaMambo Mwari mugore rechigumi raZedhekia mambo waJudha, iro raiya gore regumi nemasere raNebhukhadhineza.

² Ngouwo mukuwo hondo yamambo weBhabhuroni yaitendenedza Jerusarema, naJeremia muprofeti wakakonyerwa muruwanze rwevarindi, rwaiya mungome yamambo waJudha,

³ apo Zedhekia mambo waJudha paaiya amukonyera. Zedhekia waiya ati, “Unoprofeterenyi wechiti, ‘Izvi ndizvo zvinoronza Mambo Mwari Mwari: Ringira, ndinozopa iri dhorobha munyara yamambo weBhabhuroni, naye unozoritora.

⁴ Zedhekia mambo waJudha aazopokonyoki kubva kunyara yevaKharadhea, asi ngegwinyiso unozopirwa munyara yamambo weBhabhuroni, echizoereketa naye hope kuhope, nokumuona dziso kudziso;

⁵ naye unozotora Zedhekia kuenda Bhabhuroni, unozogara apo metsa ndamuhambira, unoronza Mambo Mwari. Kunyazwi wechirwisana nevaKharadhea amuzobudiriri?’ ”

⁶ NaJeremia wakati, “Izwi raMambo Mwari rakauya kwendiri rechiti:

⁷ Ringira, Hanameri mukororo waSharumu sekuru ako unozouya kwouri echiti, ‘Tenga munda wangu uri muAnathothi, ngokuti ndiwe unemaruramiro okuutenga.’ ”

⁸ Ndizvo Hanameri mukororo wasekuru angu wakauya kwendiri muruwanze rwevarindi, kudai ngezverakatonga izwi raMambo Mwari, akati kwendiri, “Tenga munda wangu uri muAnathothi munyika yaBhenjamini, ngokuti maruramiro okugara nhaka nokuusunhura ngezvako; dzitengere pachako.” Zvino ndakazia kuti izwi raMambo Mwari.

⁹ Ndakatenga munda waHanameri mukororo wasekuru angu waiya muAnathothi, ndikamupimira mare yaiya zvigurwa zvesirivha gumi nazvinomwe.

¹⁰ Ndakanyora zina rangu mutsamba, ndikaikonya ngechidhindo; ndakadaidza zvapupu, ndikamupimira mare pazvipimo.

¹¹ Zvino ndakatora tsamba yakanamwa yechitenderano chokutanga yaiya nechitenderano nenjira yokutenga ndiyo netsamba yakabeuka;

¹² neni ndakapa tsamba yomutengo kunaBharukhi mukororo waNeria, mukororo waMahiseia, mukuona kwomuzukuru wangu Hanameri, mukuona kwezvapupu zvakanyora mazina mutsamba yechitenderano chomutengo, pamberi pevaJudha veshe vaiya vakagara muruwanze rwevarindi.

¹³ Mukuona kwavo ndakapangisisa Bharukhi pamberi pavo ndechiti,

¹⁴ “Izvi ndizvo zvinoronza Mambo Mwari wehondo, Mwari waIsuraeri, ‘Tora tsamba idzi dzeshe, iyo yakanamirwa ngechidhindo neiyo yakabeuka; udziise mujomeya redongo, kuti dzigare mukuwo wakareba.’

¹⁵ Ngokuti izvi ndizvo zvinoronza Mambo wehondo, Mwari waIsuraeri, ‘Mhatso neminda, neminda yemivhini ichazotengwazve munyika iyi.’ ”

Mukumbiro waJeremia

¹⁶ Naapo ndapedza kupa tsamba dzomutengo kunaBharukhi mukororo waNeria, ndakakumbira kunaMambo Mwari ndechiti,

¹⁷ “A Mambo Mwari! Ndiwe wakaita denga nenyika ngesimba rako guru, ngomuoko wako wakatambanudzwa. Akuna chakanyanya kukonza kwouri.

¹⁸ Unoonisa rudo runenyasha kumakumi emazana emibarirwana, nokuunzidzira kushata kwemadzibaba padera pevana vavo vanoteera sure kwavo, O mukuru nounesimba Mwari, uwo zina rake ndiMambo Mwari wehondo,

¹⁹ mukuru mukupanga, nesimba mukushanda, uwo madziso ake akabeuka kunjira dzeshe dzevakororo vevanhu; kupa veshe umwe ngaumwe kudai ngenjira dzake nokudai ngemichero yezviito zvake.

²⁰ Iwewe wakaonesa zvioniso nemishamiso munyika yeEgipite, metsa nanyamashi muIsuraeri nepakati pevanhu vemarudzi amweni; newe wakadziitira zina rinoangira kugara riripo metsa nyamashi.

²¹ Ukabudisa vanhu vako Isuraeri kubva munyika yeEgipite ngezvioniso nemishamiso ngenyara inesimba, nomuoko wakatambanudzwa nokutyisa kukurutu;

²² newe wakavapa iyi nyika yowakapika kumadzibaba avo kuvapa, nyika inoerera mukaka nouchi,

²³ navo vakapotera, vakaigara nhaka. Asi avazi kupurutana izwi rako, nokuti kuteera mipango yako; pane zveshe zvewakavapanga kuti vaite apana nachimwe chevakaita. Ndizvo wakaita uku kushata kweshe kuti kuuye padera pavo.

²⁴ Ringira, mirwi yamavhu yakandirwa kutendenedza kurwisa dhorobha, kuti varinyise; nedhorobha raringirana neshoti, nzara nenhenda, naro rapirwa kunyara yevaKharadhea, avo vanorwa naro. Izvo zvowakaereketa zvaitika kudai ngezveungaona iwewe pachako.

²⁵ Asi iwewe, O Mambo Mwari, Mwari, wakati kwendiri, ‘Tenga uyu munda ngemare, wechitora zvapupu;’ kunyazwi dhorobha rapirwa munyara dzevaKharadhea.”

²⁶ Izwi raMambo Mwari rakaunya kunaJeremia rechiti,

²⁷ “Ringira, ndini Mambo Mwari, Mwari wenyama yeshe; pane chakanyanya kundikonzera here?”

²⁸ Ndizvo izvi zvinoronza Mambo Mwari: “Ringira, ndinopa iri dhorobha munyara dzevaKharadhea, nomunyara yaNebhukhadhineza naye unozoritora.

²⁹ VaKharadhea vanorwa nedhorobha iri vanozouya, vabase muriro padera paro nokuripisha, nemhatso idzo dzevakapishira mutombo unegwema padera pamatenga adzo kunaBhaari, vakadurura midiro yokumwa kunezvimwari zvimweni kunditsenesa.

³⁰ Ngokuti vanhu vaIsuraeri nevanhu vaJudha avana chevakaita, asi vakaita zvakashata zvega pamberi pangu kubvira muutsva hwavo; vanhu vaIsuraeri avana chevakaita, asi vakanditsenesa kwega ngemishando yenyara dzavo, unoronza Mambo Mwari.

³¹ Dhorobha iri rakamusa kutsamwa kwangu noushungu hwangu kubvira pazuva revakaamba kuriaka metsa nyamashi, zvinoita kuti ndiribvise kubva pamberi pehope yangu,

³² ngendaa yokushata kweshe kwevanhu vaIsuraeri nekwevanhu vaJudha, kwevakaita kumusa kutseneka kwangu, ivo namadzibaba avo, vatongi vavo, vapristi vavo nevaprofeti vavo, vanhu vaJudha, naavo vanogara muJerusarema.

³³ Vakandifuratira, avazi kundiringira; kunyazwi ndakaangira kuvadzidzisa, asi avazi kupurutana nokuashira kudzidziswa.

³⁴ Vakaisa zvinyangadzo zvavo mumhatso inodaidzwa ngezina rangu kuisvipisa.

³⁵ Vakaaka ndau dzakakwirira dzaBhaari mubani romukororo waHinomu, pekupira vakororo nevanasikana vavo kuita mudiro kunaMorekhi, kunyazwi andizi kuvapanga, nokuti kutongopinimidza kuti vaite kunyangadza uku, kuita kuti Judha ashaishe.

Chigondiso choKugonda

³⁶ “Ndizvo zvino izvi ndizvo zvinoronza Mambo Mwari, Mwari waIsuraeri ngendaa yeiri dhorobha, romunoti ndiro, ‘Rinozopirwa munyara yamambo weBhabhuroni, ngeshoti, nzara, nenhenda.’

³⁷ Ringira, ndinozovaunganidza kubva kunyika dzeshe dzendakavadzingira mukutseneka kwangu nomuushungu hwangu nomukushishwa kwangu kunotyisa; ndinozovaunzazve kuiyi ndau, nokuita kuti vagare vakangwaririka.

³⁸ Vanozoita vanhu vangu, neni ndinozoita Mwari wavo.

³⁹ Ndinozovapa mwoyo umwe nenjira imwe, kuti vanditye mhera nariini, kuti zvivanakire nemibarirwana yavo inoteera sure kwavo.

⁴⁰ Ndinozoita chitenderano chemhera nariini navo, kuvaitira zvakanaka, andichazovafuratiri, asi ndinozoisa kutyisa kwangu mumwoyo mwavo kuti vasazobva kwendiri.

⁴¹ Ndinozodakara ndivo kuvaitira zvakanaka, mukugondeka ndinozovasima munyika iyi, ngomwoyo wangu weshe nomweya wangu weshe.”

⁴² Ngokuti izvi ndizvo zvinoronza Mambo Mwari: “Kudai ngezvendakaunza uku kushata kweshe padera paava vanhu, ngokudarozve ndinozounza uku kunaka kweshe padera paava vanhu, kwendinovagondisa zvino.

⁴³ Minda inozotengwa munyika iyi, iyo yomunoti, ‘Iri matongo isina munhu nokuti mhuka; yapirwa munyara dzavaKharadhea.’

⁴⁴ Vanhu vanozotenga minda ngemare, nokunyora mutsamba, nokuinama ngechidhindo, nokutora zvapupu munyika yaBhenjamini, nomundau dzinotendenedza Jerusarema, nomumadhorobha aJudha, neenyika yezvimitunhu, neeShefera neokubani; ngokuti ndinozopetudza vakabatwa vavo,” unoronza Mambo Mwari.