Jer. 31 - Bhaibheri Rakachena muChindau

Kupetuka kwaIsuraeri Kanyi

¹ Mambo Mwari unoronza, “Panguva iyo ndinozoita Mwari wamarudzi eshe aIsuraeri, navo vanozoita vanhu vangu.

² Izvi ndizvo zvinoronza Mambo Mwari: Vanhu vakasiiwa ngeshoti vakaona nyasha mushango; apo vaIsuraeri pevakatsvaka kuti vazorore,

³ Mambo Mwari wakaoneka kwendiri ngomukuwo wekaretu. Ndakuda ngorudo rwemhera nariini; ndizvo ndaangira kuita kugondeka kwangu kwouri.

⁴ Ndinozokuakazve, newe unozoakwa, O mhandwe Isuraeri! Unozonemeswazve ngemakandira, wechizoenda mukuzvina kwaavo vanodakara.

⁵ Unozosimirazve minda yemivhini padera pemitunhu yeSamaria; vasimi vanozosima, navo vanozodya michero.

⁶ Ngokuti rinozoapo zuva apo varindi pevanozodaidza vari munyika yezvimitunhu yaEfuremu vechiti, ‘Uyai, tikwire Zioni, kunaMambo Mwari, Mwari wedu.’ ”

⁷ Ngokuti izvi ndizvo zvinoronza Mambo Mwari: “Emberai Jakobe ngokudakara, mudaidzire mazwi mukuru wemadzinza; teketesai, kudzai, mwechiti, ‘O Mambo Mwari, ponesa vanhu vako vakasara vaIsuraeri!’

⁸ Ringira, ndinozovaunza kubva kunyika yedera, nokuvaunganidza kubva kumiganu yenyika iri kuretu yaamho, pakati pavo pane mapofu nezvirema, madzimai anemimba, naavo vanorwadziwa ngokuda kubereka, veshe pamwepo; vanhu vazhinji vanozopetuka pano.

⁹ Vanozouya vechichema, vechikumbira ndinozovatungamira kupetuka sure; ndinozoita kuti vahambe ngepasinde pendwizi dzemvura, munjira yakarurama, umwo mwevasikazopumhunwi; ngokuti ndaita baba kunaIsuraeri, naEfuremu idangwe rangu.

¹⁰ Izwai izwi raMambo Mwari, O madzinza, muridaidzire kuzviwi zviri kuretu mwechiti, ‘Iye wakaparadzira Isuraeri unozomuunganidza, nokumungwarira, kudai ngezvinoita muushi womutanga wake.’

¹¹ Ngokuti Mambo Mwari wakaripira Jakobe, akamusunhura kubva kunyara youwo waiya akagwinya kumupinda.

¹² Vanozouya nokuemba vechidaidzira muurebu hweZioni, navo vanozojeka padera pounaku hwaMambo Mwari, padera pekoroni, pevhini, nemafuta, nepadera pemakonyana emitanga yen'ombe nemakwai; kupona kwavo kunozodai ngomunda wakadiridzirwa, avazoperizve simba.

¹³ Naapo mhandwe dzinozodakara mukuzvina, veshe majaha nevasharuka vanozodakara. Ndinozopindura kubonda kwavo kuita kudakara, ndinozovaembedzera, ndechiita kuti vadakare pandau pokusvipa mwoyo.

¹⁴ Ndinozogutisa mweya yevapristi ngamafuta, nevanhu vangu vanozogutiswa ngokunaka kwangu,” unoronza Mambo Mwari.

Nyasha dzaMambo Mwari kunaIsuraeri

¹⁵ Izvi ndizvo zvinoronza Mambo Mwari: “Izwi rinozwika muRama, kuchema nokutsumba kukurutu. Racheri unochemera vana vake; unoramba kuemberedzerwa ngendaa yevana vake, ngokuti apachina.

¹⁶ Izvi ndizvo zvinoronza Mambo Mwari: Nyarara izwi rako kubva mukuchema, nemadziso ako asachema masodzi; ngokuti mushando wako unozoripirwa, unoronza Mambo Mwari. Vanozopetuka kubva kunyika yemagaa.

¹⁷ Riripo gonda kumagumo ako, unoronza Mambo Mwari, vana vako vanozopetuka kunyika yavo.

¹⁸ Ngegwinyiso ndakazwa Efuremu echidzichemera: ‘Wakandiorora, neni ndakaashira kuororwa, ndakadai ngekonyana risina kudzidziswa risati razia joka. Ndipetudze sure ngandipetuke, ngokuti iwewe uri Mambo Mwari, Mwari wangu.

¹⁹ Ngesure apo ndapauka, ndakatenderuka; ngesure apo ndaonwa, ndakachaya chizva changu; ndakatsveruka, ndakapera simba ngokuti ndakatwara kutsverudzwa kwoutsva hwangu.’

²⁰ Efuremu mukororo wangu unodikanwa here? Mwana wendinodakara mwaari ndiye here? Nguva dzeshe dzendinoereketa kumuitira ndaa, ndinomukarakadza. Ndizvo mwoyo wangu unomutambudzikira; ngegwinyiso ndinozomuitira nyasha, unoronza Mambo Mwari.

²¹ Emesa zvioniso zvepato pachako, udziitire pachako sika dzechioniso mupato; ukarakadze zvakanaka mapato makuru, pato iro rowakahamba ndiro. Petuka, O mhandwe Isuraeri, petuka kumadhorobha ako aya.

²² Unozohamba hamba mukuwo wakadini, O mwanasikana usina gonda? Ngokuti Mambo Mwari wakasika chiro chitsva munyika, mukadzi unozofungatira mwamuna.”

Kubudirira Kuchauya kweVanhu vaMwari

²³ Izvi ndizvo zvinoronza Mambo Mwari wehondo, Mwari waIsuraeri: Vachazoereketazve mazwi aya munyika yaJudha, nomumadhorobha ayo, apo ndinozovapetudza kubva muubatwa hwavo, “Mambo Mwari ngaakufumise, O ugaro hwokururama, O mutunhu wakacheneswa.

²⁴ Judha nemadhorobha aro anozogara apo pamwepo, varimi neavo vaushi vanozohamba kweshe nezvifuyo zvavo.

²⁵ Ndinozogutisa mweya yakaremba, naavo veshe vanodemera ndinozovagutisa.”

²⁶ Apapo ndakamuka, ndikaringira, hope dzangu dzainaka kwendiri.

²⁷ “Ringira, ngegwinyiso mazuva anouya,” unoronza Mambo Mwari, “Apo pendinozosima mhatso yaIsuraeri nemhatso yaJudha ngembeu yevanhu nembeu yemhuka.

²⁸ Kudai ngezvendakaringira padera pavo, kubvita, nokuvaputsira pashi, kubvisa, kuparadza, nokuunza kushata, ndizvo ndinozovaringira kuaka nokusima,” unoronza Mambo Mwari.

²⁹ “Mumazuva awo avachazoronzi kuti, ‘Vabari vakadya mavhini anozhazha, nemazino evana vavo akaita hwadzira.’

³⁰ Asi veshe umwe ngaumwe unozofa ngendaa yezvishaishi zvake; weshe munhu unodya mavhini anozhazha, mazino ake anozoita hwadzira.”

³¹ “Ringira, ngegwinyiso mazuva anouya,” unoronza Mambo Mwari, “Apo pendinozoita chitenderano chitsva nemhatso yaIsuraeri, nemhatso yaJudha,

³² chisikazi kudai ngechitenderano chendakaita nemadzibaba avo, pendakavatora ngenyara kuvabudisa kubva munyika yeEgipite; chitenderano icho changu chevakagura, kunyazwi ndaiya mwamuna wavo,” unoronza Mambo Mwari.

³³ “Asi ichi ndicho chitenderano chendinozoita nemhatso yaIsuraeri, ngesure kweawo mazuva, unoronza Mambo Mwari; ‘Ndinozoisa mupango wangu mukati mwavo, nokuunyora mumwoyo mwavo; neni ndinozoita Mwari wavo, navo vanozoita vanhu vangu.’

³⁴ Avachazodzidzisani umwe neumweni muakirwana wake, nehama yake, echiti, ‘Zia Mambo Mwari, ngokuti veshe vanozondizia, kubvira kumudoko wavo kuguma kumukuru wavo,’ unoronza Mambo Mwari; ‘Ngokuti ndinozokungurira kushata kwavo, nezvishaishi zvavo andichazozvikarakadzi nakamwe.’ ”

³⁵ Izvi ndizvo zvinoronza Mambo Mwari, uwo unopa zuva kuti riite kujeka kwemasikati, nokuemesa mwedzi nenyeredzi kuita kujeka kwousiku, uwo unomusa ruandhle apo mafungu arwo anoungumira; Mambo Mwari wehondo, ndiro zina rake:

³⁶ “Kudai urongwa hwakaemeswa hukarekera kubva mukuona kwangu,” unoronza Mambo Mwari, “Ndizvo rudzi rwaIsuraeri runozorekera kuita dzinza kwendiri mhera nariini.”

³⁷ Izvi ndizvo zvinoronza Mambo Mwari: “Kudai matenga ari padera angapimwa, nematsikiro enyika angatsvakisiswa ngepashi, zvino ndinozoramba veshe vorudzi rwaIsuraeri ngendaa yezveshe zvevakaita,” unoronza Mambo Mwari.

³⁸ “Ringira, mazuva anouya,” unoronza Mambo Mwari, “Apo dhorobha rinozoakirwa Mambo Mwari kubva paRusvingo rwaHananeri kuguma paMusiwo wepaKhona.

³⁹ Netambo yokupima ichazotambanudzwa kubva apo kuguma kuretu yakarurama kuenda kumutunhu Garebhi, nayo inozotenderukira kuenda Goa.

⁴⁰ Bani reshe remiiri yakafa neremarota, neminda yeshe metsa kuguma kuRwizi rweKidroni, kuguma pakhona reMusiwo Mahachi, wakaringira kumabvazuva, zvichaita zvakacheneswa kunaMambo Mwari. Aizobvitwizve nokuti kuparadzwa mhera nariini.”