Jer. 30 - Bhaibheri Rakachena muChindau

Zvigondiso zvaMambo Mwari kuVanhu vake

¹ Izwi iro rakauya kunaJeremia kubva kunaMambo Mwari rechiti,

² “Izvi ndizvo zvinoronza Mambo Mwari, Mwari waIsuraeri: ‘Nyora mazwi eshe endakaereketa kwomuri mubhuku.

³ Ngokuti, ringira, ngegwinyiso mazuva anouya,’ Mambo Mwari unoronza, ‘Apo pendinozopetudza voubatwa vevanhu vangu, Isuraeri naJudha; ndinozovapetudza kunyika yendakapa madzibaba avo, navo vanozoigara nhaka,’ unoronza Mambo Mwari.”

⁴ Naaya ndiwo mazwi aakaereketa Mambo Mwari ngendaa yaIsuraeri naJudha.

⁵ “Izvi ndizvo zvinoronza Mambo Mwari: ‘Tazwa izwi rinokarudza, rokutyisa, risiri rokunyarara.

⁶ Bvunzai zvino, muone kuti uripo munhu womwamuna unorwadziwa ngokubereka mwana here? Ngenyi zvino ndechiona vamuna veshe vechibata zviunu zvavo, kudai ngomukadzi uri mukurwadziwa kwokubereka? Ngenyi hope yeshe yatsandudzwa kucheneruka?

⁷ Ihehe! Zuva iro iguru, akunazve rakadai ndiro; inguva yokutambudzika kwaJakobe, asi unozonunurwa kubva kweriri.’

⁸ “Pazuva iro, unoronza Mambo Mwari wehondo, ‘Ndinozogura joka rake kubva pamutsipa wako, nokudambura zvisungo zvako, nevapara avachazoshandirwi ndiye.

⁹ Asi vanozoshandira Mambo Mwari, Mwari wavo, naDhavhidha mambo wavo, uwo wendinozovamirudzira.’ ”

¹⁰ “Asi ngendaa yako usatya, iwewe muranda wangu Jakobe, unoronza Mambo Mwari, usapera simba, O Isuraeri; ngokuti, ringira ndinozokuponesa kubva kuretu, nevorudzi rwako kubva kunyika youbatwa hwavo. Jakobe unozopetuka mukuzorora, echigarisika, apana naumwe unozomutyisa.

¹¹ Ngokuti ndinemwi, unoronza Mambo Mwari, kumuponesa; ndinozoita magumo emadzinza eshe endakamuparadzira pakati pawo, asi imwimwi andizomuparadzi. Asi ndinozomuorora ngechipimo chakanaka, andizoreki kumuorora.”

¹² Ngokuti izvi ndizvo zvinoronza Mambo Mwari, “Kuremadzwa kwako akurapiki, nebonje rako rakashata.

¹³ Apana wokurwira ndaa yako, kuti urapiwe, amuna mutombo wokukuporesa.

¹⁴ Vadikani vako veshe vakuriyarwa; avakutsvaki; ngokuti ndakakuremadza ngebonje regaa, kuororwa kwouwo usina nyasha, ngendaa youwandu hwokushata kwako, ngokuti zvishaishi zvako zvakawandisa.

¹⁵ Unochema ngenyi ngendaa yokuremadzwa kwako? Kurwadziwa kwako akurapiki. Ngokuti kushaisha kwako kwakakura, ngokuti zvishaishi zvako zvanyanya kuwanda, ndizvo ndaita izvi kwouri.

¹⁶ Ndizvo avo veshe vanokudya vachadyiwawo, nemagaa ako eshe, rimwe ngarimwe anozopinda muubatwa; naavo vanokuchakata vanozochakatwawo, naavo vanokuparadza vanozoparadzwawo.

¹⁷ Ngokuti ndinozomutambisa, ndinozorapa maonje enyu, unoronza MamboMwari, ‘Ngokuti vakamududza kuti varashwa’ vechiti, ‘Ndiro Zioni; akuna naumwe unendaa naro.’ ”

¹⁸ “Izvi ndizvo zvinoronza Mambo Mwari, ‘Ringira, ndinozopetudza vakabatwa vematende aJakobe, ndechionisa nyasha kundau dzake dzokugara; dhorobha rinozoakiswa padera pematongo aro, nengome yaro inozoapozve pandau payo pemene.

¹⁹ Kubva mukati mwaro munozobuda kubonga neizwi rokudakara. Ndinozovawanza, avazoiti vashomani akadi; ndinozovakurisazve, navo avazoiti vadoko.

²⁰ Vana vavo vanozodai ngevekaretu, mushongano wavo unozoemeswa pamberi pangu, neni ndinozovaorora veshe avo vanovatambudza.

²¹ Mutongi wavo unozoita umwe wevanhu vavo emene, mambo wavo unozoita umwe unobva pakati pavo; ndinozomuunza pasinde, naye unozokwedzera kwendiri, ngokuti ndiani uwo wakaemesa mumwoyo mwake kukwedzera kwendiri?’ Unoronza Mambo Mwari.

²² ‘Nemwi munozoita vanhu vangu, neni ndinozoita Mwari wenyu.’ ”

²³ Ringira, chipupuri chaMambo Mwari! Ushungu hwabuda, chipupuri chisikaperi; chinozoputikira padera pemasoro evakashata.

²⁴ Ushungu hwaMambo Mwari hunotyisa ahuzopetuki sure, metsa azviita nokuzvipedza zvaakaemesa mumwoyo mwake. Mumazuva okugumisira munozozvizwisisa.