Jer. 3 - Bhaibheri Rakachena muChindau

Isuraeri Usikagondeki

¹ “Kudai munhu echiramba mukadzi wake, naye akaenda kubva kwaari nokuita mukadzi woumweni munhu, unozohwirira kwaari here? Iyo nyika aizosvipiswi kakurutu here? Iwewe wakaita uhure nevadikani vazhinji, newe ungapetuka kwendiri here? Unoronza Mambo Mwari.

² Mirudza madziso ako kundau dzakakwirira dzisina chiro, uone! Iripo here ndau pousikazi kuatwa newe? Pasinde penjira wakavagarira vadiwa kudai ngavaArabia mushango. Newe wasvipisa nyika ngouhure hwako nokushata kwako.

³ Ndizvo mvura yarambidzwa kunaya, akuzi kuapo mvura yokupedzisira; asi waiya nehope yehure, wakaramba kutsverudzwa.

⁴ “Auzi zvino kudaidza kwendiri kuti, ‘Baba angu, mungani woutsva hwangu?

⁵ Unozogara anoushungu hwake mhera nariini here? Unozogara akatseneka metsa kumagumo here?’ Aya ndiwo maereketere ewaita, asi waita kushata kweshe kudai ngezvewaikona.”

Isuraeri naJudha Vanosisira Kutenderuka

⁶ Mambo Mwari wakati kwendiri ngamazuva aJosia mambo, “Wakaona here izvo zvaakaita uwo usikagondeki Isuraeri, kukwira kwaakaita padera pemitunhu yeshe napashi pemiti yeshe yakasvipirika, apo paakaita uhure?

⁷ Neni ndakapinimidza, apo aita izvi zveshe, kuti unozopetuka kwendiri. Asi aazi kupetuka, naJudha munun'una wake unochengedzera wakazviona.

⁸ Inini ndakaona, apo ndakamurasha nokumupa tsamba yokuparadzana, ngendaa dzeshe dzokuomba dzaakaita Isuraeri echipetuka sure; asi Judha munun'una wake unochengedzera aazi kutya, asi wakaenda kooita hure.

⁹ Ngendaa yokurerusa kuhura kwake wakasvipisa nyika, wakahura nebuwe nomiti.

¹⁰ Asi ngeizvi zveshe munun'una wake unochengedzera aazi kupetuka kwendiri ngomwoyo wake weshe, asi ngokudziitisa,” unoronza Mambo Mwari.

¹¹ Zvino Mambo Mwari wakati kwendiri, “Isuraeri usikagondeki wakadzionesa kuitanane kupinda Judha unochengedzera.

¹² Enda udaidzire dera mazwi aya wechiti, petukai, imwimwi vaIsuraeri vasikagondi unoronza Mambo Mwari; andizoringiri kwemuri muushungu ngokuti ndine nyasha, unoronza Mambo Mwari, andizogari ndakanyangadzwa mhera nariini.

¹³ Tendai kwega kushaisha kwenyu, kuti mwamukira Mambo Mwari, Mwari wenyu, kuti nemwi mwaparadzira rudo rwenyu pakati pevapara pashi pemiti yeshe yakasvipirika, amuzi kupurutana izwi rangu, unoronza Mambo Mwari.

¹⁴ “Petukai, imwimwi vana vasikagondi, unoronza Mambo Mwari, ngokuti ndini mambo wenyu; ndizomutora, umwe kubva mudhorobha, nevairi kubva mumhuri, neni ndinozomuunza Zioni.

¹⁵ Ndinozomupa vaushi vanodakadza mwoyo wangu, vanozogutisa ngokuzia nokuzwisisa.

¹⁶ Naapo mwawanda nokuzadza nyika, mumazuva awo, unoronza Mambo Mwari, avachazoronzi kuti, ‘Bhokisi reChitenderano chaMambo Mwari!’ Arichazopinimidzwizve; avachazorikarakadzi nokuti kuritama, avachazoitizve rimweni.

¹⁷ Ngouwo mukuwo vanozodudza Jerusarema kuti, ‘Dendemaro raMambo Mwari’ nemadzinza eshe anozounganidzwa kweriri, mukuapo kwaMambo Mwari muJerusarema; avachazohambi kuteera mikarakadzo yomwoyo yavo yakashata.

¹⁸ Mumazuva awo vemhatso yaJudha vanozobatana pamwepo nevemhatso yaIsuraeri, navo vanozobuda pamwepo kubva munyika yedera kuenda kunyika yendakapa madzibaba enyu kuita nhaka yavo.”

Kuhura kweVanhu vaMwari

¹⁹ Ndakapinimidza ngenjira yendaizokuemesa. “Ndiyo pakati pevana vangu, nokukupa nyika yakanaka, nhaka yakanaka kakurutu yemadzinza eshe. Neni ndapinimidza, kuti unozondidaidza kuti, Baba angu, nokusikakunukuka kubva kwendiri.

²⁰ Asi, kudai ngomukadzi usikagondeki unosiya mwamuna wake, ndizvo wakaita usikagondeki kwendiri, iwewe mhatso yaIsuraeri,” unoronza Mambo Mwari.

²¹ Izwi rinozwika pandau dzakakwirira dzisina chiro, kuchema nokupota kwevana veIsuraeri, ngokuti vakapauka kubva munjira yavo, vakariyarwa Mambo Mwari, Mwari wavo.

²² Petukai, imwimwi vana vasikagondeki, ndinozorapa kusikagondeka kwenyu. “Ringira, tinouya kwouri; ngokuti iwewe uri Mambo Mwari, Mwari wedu.

²³ “Ngegwinyiso akudetseri kugonda ruponeso kuti runobva kumitunhu, madhiri epamitunhu. Ngegwinyiso ruponeso rwaIsuraeri ruri munaMambo Mwari, Mwari wedu.

²⁴ Asi kubvira pautsva hwedu kutsveruka kwakapedza mushando wemadzibaba edu, zvifuyo zvavo, n'ombe nemakwai, vakororo vavo nevanasikana vavo.

²⁵ Ngatiate pashi mukutsveruka kwedu, nokutsveruka kwedu kutifukidze; ngokuti takashaisha kunaMambo Mwari, Mwari wedu, isusu nemadzibaba edu, kubvira muutsva hwedu metsa nanyamashi; atizikupurutana izwi raMambo Mwari, Mwari wedu.”