Jer. 29 - Bhaibheri Rakachena muChindau

Tsamba yaJeremia kuVaJudha Vari muBhabhuroni

¹ Aya ndiwo mazwi etsamba yaakatumira Jeremia muprofeti kubva Jerusarema kunevakasara vevakuru pakati pevakatorwa kuitwa vabatwa, kuvapristi, kuvaprofeti, nokuvanhu veshe vaiya vatorwa kuitwa vabatwa ndiNebhukhadhineza, kubva Jerusarema kuenda Bhabhuroni,

² ngesure kwokubva kwavo Jerusarema, Jekhonia mambo, namai ake, vakuru voruwanze, vatungamiriri vaJudha neveJerusarema, vatsetsi nevapfuri.

³ Tsamba yakatumirwa ngenyara yaErasa mukororo waShafani, naGemaria mukororo waHirikia vaakatuma Zedekia mambo waJudha, kunyika yeBhabhuroni kunaNebhukhadhineza mambo weBhabhuroni yechiti,

⁴ “Izvi ndizvo zvinoronza Mambo Mwari wehondo, Mwari waIsuraeri, kuneveshe vakatorwa kuitwa vabatwa, vendakaita kuti vatorwe kubva Jerusarema kuenda Bhabhuroni;

⁵ Dziakirei mhatso, mugaremwo; musime minda mwechidya michero yayo.

⁶ Roorai vakadzi, mubare vakororo nevanasikana; roodzai vakororo venyu, muchadhise vanasikana venyu, kuti vabare vanasikana nevakororo, kuti muwande, musaita vashomani.

⁷ Asi tsvakai kunyarara kweiro dhorobha, umwo mwendakaita kuti mutorwe kuenda kooitwa vabatwa, murikumbirire kunaMambo Mwari, ngokuti mukunyarara kwaro munozoona kunyarara kwenyu.

⁸ Ngokuti izvi ndizvo zvinoronza Mambo Mwari wehondo, Mwari waIsuraeri: ‘Musatenda kuchengedzerwa ngavaprofeti venyu neman'anga enyu ari pakati penyu, musapurutana kurota kwenyu kwomunoda kuti murote.

⁹ Ngokuti vanoprofeta kunyepa kwomuri ngezina rangu; andizi kuvatuma,’ Mambo Mwari unoronza.

¹⁰ “Ngokuti izvi ndizvo zvinoronza Mambo Mwari: ‘Kwega apo Bhabhuroni rapedza makore aro makumi manomwe ndinozouya kwemuri, ndechizadzisa chigondiso changu kwemuri, ngokumupetudza kundau iyi.

¹¹ Ngokuti ngegwinyiso ndinozia urongwa hwendinahwo ndimwi,’ unoronza Mambo Mwari, ‘Urongwa hwokugara kwenyu mukunyarara, haiwa wokuremadzwa, kumupa gonda rezvichauya kumagumisiro enyu.

¹² Zvino apo munozodaidza kwendiri, munozouya nokukumbira kwendiri, neni ndinozomuzwa.

¹³ Naapo pemunozonditsvaka munozondiona, kudai mwechizonditsvaka ngomwoyo wenyu weshe.

¹⁴ Ndinozoonekwa ndimwi,’ unoronza Mambo Mwari; ‘Ndinozobvisa ubatwa hwenyu nokumuunganidza kubva kumadzinza eshe, nokubva kundau dzeshe kwendakamudzingira,’ unoronza Mambo Mwari, ‘Neni ndinozomupetudza kundau kwandakaita kuti mutorwe kuitwa vabatwa.’

¹⁵ “Ngokuti mwakati, ‘Mambo Mwari wakatimirudzira vaprofeti muBhabhuroni,’

¹⁶ izvi ndizvo ndizvo zvinoronza Mambo Mwari ngendaa yamambo uwo unogara padendemaro raDhavhidha, nendaa yevanhu veshe vanogara mudhorobha iri, nendaa yehama dzenyu dzisikazi kuenda nemwi muubatwa:

¹⁷ Izvi ndizvo zvinoronza Mambo Mwari wehondo: ‘Ringira, ndinozovatumira shoti, nzara, nhenda, nokuvaita kudai nemaonde awora ashata yaamho, asikachadyiki.

¹⁸ Ndinozovateera ngeshoti, ngenzara nenhenda, nokuvaita chiro chinotyisa kuumambo hweshe hwenyika, kuti vaite vakatukwa, nechishamiso, nevanoridzirwa murudzi, nevanotsverudzwa, pakati pemadzinza eshe endakavadzingira kwaari,

¹⁹ ngokuti avazi kupurutana mazwi angu,’ unoronza Mambo Mwari, ‘Apo pendakaangira kutumira kwemuri varanda vangu vaprofeti, asi amuzi kupurutana,’ unoronza Mambo Mwari.

²⁰ “Asi zvino, imwimwi mweshe voubatwa, avo vendakadzinga kubva Jerusarema kuenda Bhabhuroni, izwai izwi raMambo Mwari.

²¹ Izvi ndizvo zvinoronza Mambo Mwari wehondo, Mwari waIsuraeri, ngendaa yaAhabhi mukororo waKoraia, naZedhekia mukororo waMaaseia, avo vanoprofeta manyepo kwomuri ngezina rangu: Ringira, ndinozovapira munyara yaNebhukhadhineza mambo weBhabhuroni, naye unozovauraya mukuona kwenyu.

²² Ngendaa yavo izwi rechituko rinozoamba kushandiswa ngevoubatwa veshe vanobva kwaJudha, vari muBhabhuroni, rokuti, ‘Mambo Mwari ngaakuite kudai ndiZedhekia naAhabhi, avo vaakapisha ngomuriro mambo weBhabhuroni,’

²³ ngokuti vakaita zvakashata muIsuraeri, vakaomba navakadzi vevaakirwana vavo, nokuereketa mazwi okunyepa ngezina rangu, endisikazi kuvapanga; ndini ndinozvizia, ndiri chapupu cheizvi,” unoronza Mambo Mwari.

Tsamba yaShemaia

²⁴ Unozoronza kunaShemaia muNeheramu wechiti,

²⁵ “Izvi ndizvo zvinoronza Mambo Mwari wehondo, Mwari waIsuraeri, echiti: Muzina rako wakatumira tsamba kuvanhu veshe avo vari muJerusarema, nokumupristi Zefania mukororo waMaaseia, nokuvapristi veshe wechiti,

²⁶ ‘Mambo Mwari emene wakakuita mupristi pandau yeJehoiadha mupristi, kuitira kuti uite mutongi mumhatso yaMambo Mwari, kuti uise mutirongo nomumanguri munhu weshe unopenga, echidziita muprofeti.

²⁷ Ndizvo zvino amuzi kurambidza ngenyi Jeremia weAnathothi, uwo unodziita muprofeti kwomuri?’

²⁸ Ngokuti wakatumira izwi kwetiri muBhabhuroni echiti, Uhwu ubatwa ngohwemukuwo wakareba; akai mhatso, mugaremwo; simai minda mudye michero yayo.”

²⁹ Zefania mupristi wakadzidza tsamba iyi munzee dzaJeremia muprofeti.

³⁰ Zvino izwi raMambo Mwari rakauya kunaJeremia rechiti,

³¹ “Tumira izwi kwevari veshe voubatwa wechiti, ‘Izvi ndizvo zvinoronza Mambo Mwari ngendaa yaShemaia muNeheramu: Ngokuti Shemaia wakaprofeta kwomuri kunyazwi ndisikazi kumutuma, naye wakaita kuti mugonde manyepo,

³² ndizvo izvi ndizvo zvinoronza Mambo Mwari: Ringira, ndinozoorora Shemaia muNeheramu, nevorudzi rwake; aazowipo munhu wokugara pakati peava vanhu; aazooni zvakanaka zvendinozoitira vanhu vangu,’ unoronza Mambo Mwari, ‘Ngokuti wakaereketa kumukira Mambo Mwari.’ ”