Jer. 28 - Bhaibheri Rakachena muChindau

Jeremia noMuprofeti Hanania

¹ Mugore rimwero, mukutanga kutonga kwaZedhekia mambo waJudha, ngegore rechirongomuna, ngomwedzi wechishanu waro, Hanania mukororo waAzuri muprofeti uwo waibva Gibheoni, wakaereketa kwendiri mumhatso yaMambo Mwari pamberi pevapristi nevanhu veshe echiti,

² “Izvi ndizvo zvinoronza Mambo Mwari wehondo, Mwari waIsuraeri echiti, ‘Ndagura joka ramambo weBhabhuroni.

³ Mumakore mairi ndinozopetudza kundau iyi zvidziyo zveshe zvemhatso yaMambo Mwari, zvaakatora Nebhukhadhineza mambo weBhabhuroni, aakaenda nazvo Bhabhuroni kubva kundau iyi.

⁴ Ndinozopetudza kundau iyi Jekhonia mukororo waJehoiakimu mambo waJudha, pamwepo nevabatwa veshe vaJudha, avo vakatorwa kuenda Bhabhuroni, ngokuti ndinozogura joka ramambo weBhabhuroni,’ unoronza Mambo Mwari.”

⁵ Zvino muprofeti Jeremia wakati kunomuprofeti Hanania pamberi pevapristi nepamberi pavanhu veshe, avo vaiya vakaema mumhatso yaMambo Mwari.

⁶ Nomuprofeti Jeremia wakati, “Ameni, Mambo Mwari ngaadaro; Mambo Mwari ngaaite kudai ngamazwi ewaprofeta, nokupetudza kubva Bhabhuroni zvidziyo zvemhatso yaMambo Mwari, nevabatwa veshe, kuzviunza kundau iyi.

⁷ Asi purutana izwi iri zvino iwewe, rendinoereketa mukuzwa kwako, nomukuzwa kwevanhu veshe.

⁸ Vaprofeti vekare vaiya pamberi pangu nepamberi pako, vakaprofetera kunyika dzakawanda nokuumambo hukuru, ngendaa yokurwa hondo, nzara, nenhenda.

⁹ Asi ngendaa yomuprofeti uwo unoprofeta ngendaa yokunyarara, apo izwi rouwo muprofeti raitika, muprofeti uwo unozoziikanwa, kuti ngegwinyiso Mambo Mwari wakamutuma.”

¹⁰ Zvino Hanania muprofeti wakadusa joka kubva pamutsipa womuprofeti Jeremia, akarigura.

¹¹ NaHanania wakaereketa pamberi pevanhu veshe echiti, “Izvi ndizvo zvinoronza Mambo Mwari: Iyi ndiyo njira yendinozogura ndiyo joka raNebhukhadhineza mambo weBhabhuroni kubva kumitsipa yemadzinza eshe, mumakore mairi.” Nomuprofeti Jeremia wakaenda.

¹² Pasure penguva muprofeti Hanania agura joka kubva pamutsipa waJeremia muprofeti, izwi raMambo Mwari rakauya kunaJeremia rechiti,

¹³ “Enda, uronzere Hanania kuti, ‘Izvi ndizvo zvinoronza Mambo Mwari: Wagura majoka emiti kwega, kuti uvanasirire majoka esimbi pandau yawo.

¹⁴ Ngokuti izvi ndizvo zvinoronza Mambo Mwari wehondo, Mwari waIsuraeri: Ndaisa joka resimbi pamitsipa yemadzinza aya eshe, kuti ashandire Nebhukhadhineza mambo weBhabhuroni,’ navo vanozomushandira yaamho; neni ndatomupazve mhuka dzomushango.”

¹⁵ Zvino muprofeti Jeremia wakati kunaHanania muprofeti, “Purutana, Hanania, Mambo Mwari aazi kukutuma, newe waita kuti vanhu ava vagonde manyepo.

¹⁶ Ndizvo izvi zvinoronza Mambo Mwari: Ringira, ndinozokurasha kubva kuhope yenyika. Mugore iri unozofa, ngokuti waereketa kurwisa Mambo Mwari.”

¹⁷ Mugore rimwero, mumwedzi wechinomwe Hanania muprofeti wakafa.