Jer. 27 - Bhaibheri Rakachena muChindau

Jeremia Unopfeka Joka reN'ombe

¹ Mukutanga kwokutonga kwaZedhekia mukororo waJosia mambo waJudha, rakauya izwi iri kunaJeremia, rechibva kunaMambo Mwari rechiti,

² “Izvi ndizvo zvinoronza Mambo Mwari kwendiri: Dzinasirire tambo nejoka, uzvisungire pamutsipa wako.

³ Utumire izwi kunamambo weEdhomu, kunamambo weMoabhi, kunamambo wevaAmoni, kunamambo weThire, nokunamambo weSidhoni, ngenyara dzevatumwa vauya Jerusarema kunaZedhekia mambo waJudha.

⁴ Wechivapanga izwi iri kuti varonzere madzimambo avo kuti, ‘Izvi ndizvo zvinoronza Mambo Mwari wehondo, Mwari waIsuraeri, ndizvo zvomunozoereketa kunemadzimambo enyu.

⁵ Ndakasika nyika, nevanhu nemhuka dziri padera penyika, ngesimba rangu guru, nokutambanudzwa kwenyara yangu, neni ndinoipa kunyazwi kunaani wendinodakara ndiye.

⁶ Zvino ndapa nyika idzi dzeshe munyara yaNebhukhadhineza mambo weBhabhuroni, muranda wangu; kunyazwi nemhuka dzomushango ndakamupa kuti dzimushandire.

⁷ Madzinza eshe anozomushandira nomukororo wake, nomukororo womukororo wake, metsa mukuwo wenyika yake ugume; zvino madzinza akawanda nemadzimambo makuru anozomuita hloko yavo.’

⁸ “Asi, kuti kunyazwi ngeriri dzinza, nokuti umambo vasikazoshandiri uyu mambo Nebhukhadhineza weBhabhuroni, vasikazoisi mitsipa yavo pashi pejoka ramambo weBhabhuroni, zvino ndinozoriorora iro dzinza ngeshoti nzara, nenhenda, unoronza Mambo Mwari, metsa ndapedza kuparadzwa kwavo ngenyara yake.

⁹ Ndizvo imwimwi musapurutana kuvaprofeti venyu, vafemberi venyu, varoti venyu, nevaroyi venyu, nokuti kuman'anga enyu, avo vanoereketa kwomuri vechiti, ‘Amuzoshandiri mambo weBhabhuroni.’

¹⁰ Ngokuti vanoprofeta manyepo kwomuri nokugumisira kwazvo munozobviswa munyika yenyu; ndinozomudzinga kubvemwo, nemwi munozoparadzwa.

¹¹ Asi kunyazwi ngeriri dzinza rinoisa mutsipa waro pashi pejoka ramambo weBhabhuroni nokumushandira, ndiro ndinozotendera kuti risare munyika yaro, unoronza Mambo Mwari; naro rinozoirima nokugara mweiri.”

¹² Ndakaereketa kunaZedhekia mambo waJudha ngenjira imweyo ndechiti, “Unzai mitsipa yenyu pashi pejoka ramambo weBhabhuroni, mumushandire nevanhu vake kuti mupone.

¹³ Ngenyi iwewe navanhu vako mwechisisira kufa ngeshoti, ngenzara, ngenhenda, kudai ngezvaakaereketa Mambo Mwari ngendaa yedzinza risikazoshandiri mambo weBhabhuroni?

¹⁴ Musapurutana kumazwi evaprofeti vanoereketa kwomuri, vechimuronzera kuti, amusashandira mambo weBhabhuroni, ngokuti vanoprofeta manyepo kwomuri.

¹⁵ ‘Andizi kuvatuma,’ unoronza Mambo Mwari, ‘Asi vanoprofeta manyepo ngezina rangu; nokugumisira kwazvo ndinozomudzingamwo, nemwi munozoparadzwa, imwimwi nevaprofeti vanoprofeta kwomuri.’ ”

¹⁶ Zvino ndakaereketa kuvapristi nokuvanhu ava veshe ndechiti, “Izvi ndizvo zvinoronza Mambo Mwari: Musapurutana kumazwi evaprofeti venyu vanoprofeta kwomuri vechiti, ‘Ringira, zvidziyo zvemhatso yaMambo Mwari zvinozopetudzwa zvinopano kubva Bhabhuroni,’ ngokuti vanoprofeta manyepo kwomuri.

¹⁷ Musavapurutana; shandirai mambo weBhabhuroni, kuti mupone. Ngenyi dhorobha iri rechisisira kuita matongo?

¹⁸ Kudai ngegwinyiso vari vaprofeti, nokuti kudai izwi raMambo Mwari rinavo, ngavapote zvino kunaMambo Mwari wehondo, kuti zvidziyo zvakasiiwa mumhatso yaMambo Mwari, nomumhatso yamambo waJudha, nomuJerusarema, zvisaenda Bhabhuroni.

¹⁹ Ngokuti izvi ndizvo zvinoronza Mambo Mwari wehondo ngendaa yesika, nendaa yoruandhle, ngendaa yezvigadzikiro, nendaa yezvidziyo zvakasara mudhorobha iri,

²⁰ izvo zvisikazi kutorwa ndiNebhukhadhineza mambo weBhabhuroni, apo paakatora Jekhonia mukororo waJehoiakimu mambo waJudha nevakuru vaJudha neveJerusarema, kubva Jerusarema kuenda Bhabhuroni kuvaita vabatwa.

²¹ Izvi ndizvo zvinoronza Mambo Mwari wehondo, Mwari waIsuraeri, ngendaa yezvidziyo zvakasara mumhatso yaMambo Mwari, nomumhatso mwamambo waJudha, nomuJerusarema:

²² ‘Zvinozotwarwa kuenda Bhabhuroni, zvinozogara apo metsa zuva rendinozovahambira,’ unoronza Mambo Mwari. ‘Zvino ndinozozviunza ndechizvihwirinza kundau iyi.’ ”