Jer. 26 - Bhaibheri Rakachena muChindau

Jeremia Unounzwa paKutongwa

¹ Mukutanga kwokutonga kwaJehoiakimu, mukororo waJosia mambo waJudha, izwi iri rakauya kubva kunaMambo Mwari rechiti,

² “Izvi ndizvo zvinoronza Mambo Mwari: Ema muruwanze rwemhatso yaMambo Mwari, uerekete kumadhorobha eshe aJudha, anouya koodira kumhatso yaMambo Mwari, uerekete kwevari mazwi eshe endinokupanga; usasiya narimwe izwi.

³ Pamweni vanozopurutana veshe, nokutenderuka umwe ngaumwe kubva kunjira yake yakashata, kuti ndirekere kushata kwendinoronga kuunza padera pavo ngendaa yezviito zvavo zvakashata.

⁴ Unozoti kwevari, ‘Izvi ndizvo zvinoronza Mambo Mwari: Kudai musikazopurutani kwendiri, nokuhamba mumipango yangu yendakaisa pamberi penyu,

⁵ nokupurutana kumazwi evaranda vangu vaprofeti, vendinotuma kwomuri ngokukasira, kunyazwi imwimwi amuzi kupurutana,

⁶ zvino ndinozoita kuti mhatso iyi idai ngeShiro, neni ndinozoita kuti dhorobha iri riite chituko kumadzinza eshe enyika.’ ”

⁷ Vapristi nevaprofeti nevanhu veshe vakazwa Jeremia echiereketa aya mazwi mumhatso mwaMambo Mwari.

⁸ Naapo Jeremia apedza kuereketa zveshe izvo zvaakapangwa ndiMambo Mwari kuereketa kuvanhu veshe, zvino vapristi nevaprofeti nevanhu veshe vakamubata vechiti, “Ngegwinyiso unozofa.

⁹ Waprofeta ngenyi ngezina raMambo Mwari wechiti, ‘Mhatso iyi inozodai ngeShiro, nedhorobha iri rinozoita dongo risikazogarwi?’ ” Nevanhu veshe vakaungana kurwisa Jeremia mumhatso yaMambo Mwari.

¹⁰ Naapo vatongi vaJudha vazwa izvi, vakauya kubva kumhatso yamambo kuenda kumhatso yaMambo Mwari, vakagara pashi pokupinda ndipo paMusiwo Mutsva wemhatso yaMambo Mwari.

¹¹ Zvino vapristi nevaprofeti vakaereketa kuvatongi nokuvanhu veshe vechiti, “Uyu munhu unosisa kufa, ngokuti waprofeta zvinorwisana nedhorobha iri, kudai ngezvamwadzizwira ngenzee dzenyu.”

¹² Zvino Jeremia wakaereketa kuvatongi veshe nokuvanhu veshe echiti, “NdiMambo Mwari wakandituma kuprofeta ngendaa yemhatso iyi nendaa yedhorobha iri mazwi eshe emwazwa.

¹³ Ndizvo zvino nasirirai njira dzenyu nezviito zvenyu, mupurutane izwi raMambo Mwari, Mwari wenyu; naMambo Mwari unozorekera kushata ukwo kwaakamurongera.

¹⁴ Asi inini, ringirai, ndiri pano munyara mwenyu. Itai zvomunoda ndini zvinomunakira.

¹⁵ Kwega ziai ngegwinyiso, kuti mukandiuraya kuti ngechakwadi munozodziunzira ngazi isina ndaa padera penyu, nepadera peiri dhorobha, nepadera paavo vanogaremwo; ngokuti ngegwinyiso Mambo Mwari wakandituma kwomuri kuereketa mazwi aya eshe munzee dzenyu.”

¹⁶ Zvino vatongi nevanhu veshe vakati kuvapristi nokuvaprofeti: “Uyu munhu aazi kusisira kutongerwa rufu, ngokuti waereketa kwetiri ngezina raMambo Mwari, Mwari wedu.”

¹⁷ Nevamweni vevakuru venyika vakamiruka, vakaereketa kumbungano yeshe yevanhu vechiti,

¹⁸ “Mikha weMoreshethi wakaprofeta ngamazuva aHezekia mambo waJudha, akati kuvanhu veshe vaJudha, ‘Izvi ndizvo zvinoronzaMambo Mwari wehondo: Zioni rinozorimwa kudai ngomunda, neJerusarema rinozoita mirwi yematongo, nomutunhu wemhatso unozodai ngendau dzakakwirira dzegwasha.’

¹⁹ Hezekia mambo waJudha nevanhu veshe vaJudha vakamuuraya here? Aazi kutya Mambo Mwari here nokupota nyasha dzaMambo Mwari, naMambo Mwari aazi kurekera here kushata kwaaiya aronga kuunza padera pavo? Asi taa kudziunzira kushata kwakura padera pedu.”

²⁰ Waiyapozve munhu umweni waiprofeta ngezina raMambo Mwari, Uria mukororo waShemaia weKiriathi-jearimu. Wakaprofeta zvakashata ngeiri dhorobha neiyi nyika kudai ngamazwi eshe akadai ngaawo aJeremia.

²¹ Naapo Jehoiakimu mambo nengwazi dzake dzeshe nevatongi veshe vazwa mazwi ake, mambo wakatsvaka kumuuraya; asi apo Uria azwa ichi, wakatya, akatiza, akaenda Egipite.

²² Zvino Jehoiakimu mambo wakatuma vanhu Egipite, Erinathani mukororo waAkhebhori, nevamuna vamweni kuenda naye Egipite.

²³ Vakaunza Uria kubva Egipite, vakamuunza kunamambo Jehoiakimu, uwo wakamuuraya ngeshoti, akakandira muiri wake mumaiba evanhu vasina mbiri.

²⁴ Asi nyara yaAhikamu mukororo waShafani yaiya naJeremia, kuti vasamupira munyara dzevanhu kuti vamuuraye.