Jer. 25 - Bhaibheri Rakachena muChindau

Gaa Rinobva Dera

¹ Izwi rakauya kunaJeremia ngendaa yevanhu veshe vaJudha, mugore rechirongomuna rokutonga kwaJehoiakimu, mukororo waJosia, mambo waJudha, (ndiro raiya gore rokutanga kutonga raNebhukhadhineza mambo weBhabhuroni,)

² iro raakaereketa Jeremia kuvanhu veshe vaJudha, nokuvagari veshe veJerusarema echiti,

³ “Ngokuti pagore remakumi mairi nematatu kubvira pagore regumi nematatu rokutonga kwaJosia mukororo waAmoni, mambo waJudha, metsa pazuva iri, izwi raMambo Mwari raiuya kwendiri, neni ndaindoriereketa kwomuri ngokusikareki, asi imwimwi amuzi kupurutana.

⁴ Kunyazwi Mambo Mwari wakaangira kutumira varanda vake veshe vaprofeti, imwimwi amuzi kupurutana nokuti kuteya nzee dzenyu kuti muzwe

⁵ naapo vechiti, ‘Tenderukai zvino, imwimwi mweshe, umwe ngaumwe wenyu kubva kunjira yake yakashata nokubva kuzviito zvake zvakashata, mugare munyika yaakamupa Mambo Mwari nemadzibaba enyu, kubvira karetu mhera nariini;

⁶ musateera zvimwari zvimweni kuzvishandira nokuzvidira, musanditsenesa kuti ndinyangadzwe ngemishando yenyara dzenyu. Zvino andizomuremadzi.’

⁷ Asi amuzi kundipurutana,” unoronza Mambo Mwari; “Ndizvo mwamusira ushungu hwangu ngemishando yenyara dzenyu yomunodziremadza ndiyo.

⁸ “Izvi ndizvo zvinoronza Mambo Mwari wehondo: Ngokuti amuzi kupurutana mazwi angu,

⁹ ringira, ndinozotumira kumadzinza eshe edera, kunyazwi naNebhukhadhineza mambo weBhabhuroni, muranda wangu, neni ndinozovaunza kuti varwise iyi nyika, nevagari vayo, nemadzinza eshe aya akaitendenedza; ndinozovaparadza yaamho nokuvaita chishamiso chinotyisa, chinoridzirwa murudzi nokuita matongo mhera nariini,” unoronza Mambo Mwari.

¹⁰ “Neni ndinozovadusira kubva kwevari izwi rokusheka nerokudakara, izwi romukwambo neizwi ramakhoti, kurira kwemakuyo nokujeka kwechibani.

¹¹ Nyika yeshe iyi inozoita matongo nechishamiso; naaya madzinza anozoshandira mambo waBhabhuroni makore makumi manomwe.

¹² Zvino apo makore makumi manomwe apera, ndinozoorora mambo weBhabhuroni, neiro dzinza, nyika yevaKharadhea, ngendaa yokushata kwavo,” unoronza Mambo Mwari, “Ndinozoita kuti nyika igare yakaita matongo mhera nariini.

¹³ Neni ndinozoita kuti mazwi angu eshe endakaereketa ngeiyi nyika aitike, zveshe zvakanyorwa muiri bhuku, zvaakaprofeta Jeremia ngaaya madzinza eshe.

¹⁴ Ngokuti madzinza akawanda nemadzimambo makuru anozovasunga muuhloko, neni ndinozovaunzidzira kudai ngezviito zvavo, nokudai ngemishando yenyara dzavo.”

Kutonga kwaMwari padera peMadzinza

¹⁵ Ngokuti izvi ndizvo zvinoronza Mambo Mwari, Mwari waIsuraeri, kwendiri: “Tora tsani yevhini roushungu uhwu kubva munyara mwangu, uite kuti madzinza eshe endinokutuma kwaari aimwe.

¹⁶ Vanozomwa nokuthethereka nokupenga, ngendaa yeshoti yendinozotumira pakati pavo.”

¹⁷ Ndizvo ndakatora tsani kubva munyara yaMambo Mwari, ndikaita kuti madzinza eshe aimwe, endakatumirwa kwaari ndiMambo Mwari:

¹⁸ Jerusarema nemadhorobha aJudha, madzimambo awo nevatongi vawo, kuvaparadza nokuvaita chishamiso, chinoridzirwa marudzi, nokutukwa, kudai ngezvezviri azvo nyamashi;

¹⁹ Faro mambo weEgipite, varanda vake, nevatongi vake, nevanhu vake veshe;

²⁰ vanhu veshe vakabvengedzana, madzimambo eshe enyika yeUzi, madzimambo eshe enyika yeFiristia, Ashikeroni, Gaza, Ekironi, nevakasara veAshidhodhi;

²¹ Edhomu, Moabhi, nevaAmoni,

²² madzimambo eshe eThire, madzimambo eshe eSidhoni, nemadzimambo ezviwi zvoruseri kworuandhle,

²³ Dhedhani, Thema, Bhuzi, naavo veshe vanogunda masoro avo kumarutii,

²⁴ namadzimambo eshe eArabhia, nemadzimambo eshe evanhu vakabvengedzana vanogara munyika yakaoma,

²⁵ madzimambo eshe eZimuri, namadzimambo eshe eEramu, nemadzimambo eshe eMedhia,

²⁶ madzimambo eshe enyika dzedera, dzokuretu nedzepasinde, imweni neimweni, noumambo hweshe hwenyika huri padera pehope yenyika. Nesure kwavo mambo weSheshakhi unozomwa.

²⁷ Zvino unozoti kwevari, “Izvi ndizvo zvinoronza Mambo Mwari wehondo, Mwari waIsuraeri: Imwai, muradze, murutse, nokuwa musikachazomuki, ngendaa yeshoti yendinotuma pakati penyu.

²⁸ Nokudai vechiramba kutora tsani kubva kunyara yako, kuimwa, zvino unozoti kwevari, ‘Izvi ndizvo zvinoronza Mambo Mwari wehondo: Munosisira kuimwa.

²⁹ Wona, ndinotanga kuunza kushata padera pedhorobha rinodaidzwa ngezina rangu, nemwi mungaita matizirenyi kuororwa? Amuzoreki kuororwa akadi, ngokuti ndinodaidza shoti padera pavo veshe vanogara munyika, unoronza Mambo Mwari wehondo.’

³⁰ “Ndizvo iwewe unozoprofeta kwevari mazwi aya eshe, wechiti kwevari, ‘Mambo Mwari unozodaidzira kubva mudenga, nokuereketa ngeizwi rake kubva muugaro hwake hwakachena; unozodaidzira ngesimba kumutanga wake; unozozhambarara kudai ngaavo vanotsikatsika mavhini, kurwisana neavo veshe vanogara munyika.

³¹ Nebope rinozoguma kumagumo enyika; ngokuti Mambo Mwari unendaa huru nemadzinza; unotonga vanhu veshe, unozopa vakashata kushoti, unoronza Mambo Mwari.’ ”

³² Izvi ndizvo zvinoronza Mambo Mwari wehondo: “Ringira, kushata kunopararira kubva kudzinza kuenda kudzinza, nechapupuri chikuru chinomirudzwa kubva kumiganu yenyika.”

³³ Avo vanourawa ndiMambo Mwari ngezuva iro vanozobvira kumagumo enyika metsa kumagumo amweni enyika. Avazochemwi, nokuti kuunganidzwa kuti vaikwe; vanozodai ngemadisa padera pemavhu.

³⁴ Zhambararai, imwimwi vaushi, mucheme; dzimburumbudzei mumarota, imwimwi vakuru vomutanga, ngokuti mazuva okuurawa kwenyu aguma; nemwi munozowa kudai ngechidziyo chakanakisisa.

³⁵ Vaushi avazooni nenjira yokutiza, nokuti vakuru vomutanga kuti vapone.

³⁶ Izwa izwi rokuchema revaushi nerokuboorera revakuru vomutanga! Ngokuti Mambo Mwari wakaparadza mbusho yavo,

³⁷ nougaro hwokunyarara hwakaparadzwa ngendaa yokutyisa kwoushungu hwaMambo Mwari.

³⁸ Kudai ngemhondoro wakasiya ndau yake yokuhwara; ngokuti nyika yavo yaamatongo ngendaa yokutyisa kweshoti, nendaa yokutyisa kwoushungu hwake.