Jer. 24 - Bhaibheri Rakachena muChindau

Zvitundu Zviiri zveMaonde

¹ Mambo Mwari wakandionisa zvitundu zviiri zvemaonde zvakaiswa pamberi petemperi raMambo Mwari. Izvi zvakaitika ngesure apo mambo Nebhukhadhineza weBhabhuroni atora kuvaita vabatwa kubva Jerusarema mambo Jekhonia, mukororo waJehoiakimu mambo waJudha, pamwepo nevatongi vaJudha, vatsetsi, nevapfuri, kuenda navo Bhabhuroni.

² Chitundu chimwe chaiya nemaonde akanaka yaamho, kudai ngemaonde okutanga kuibva, asi chitundu chimweni chaiya nemaonde akashata yaamho, asaidyika ngokuti aiya akanyanya kushata.

³ NaMambo Mwari wakati kwendiri, “Unoonenyi, Jeremia?” Ndakati, “Maonde, maonde akanaka akanaka yaamho; maonde akashata akashata yaamho, aangadyiki, ngokuti akanyanya kushata.”

⁴ Zvino izwi raMambo Mwari rakauya kwendiri rechiti,

⁵ “Izvi ndizvo zvinoronza Mambo Mwari, Mwari waIsuraeri: Kudai ngaaya maonde akanaka, ngokudaro ndinozovaerenga kuti vakanaka avo vakatorwa kubva kuvaJudha kuita vabatwa, avo vendakabudisa mundau iyi kuenda munyika yevaKharadhea.

⁶ Ndinozoisa madziso angu padera pavo kuti vagarisike, ndinozovapetudza kunyika iyi. Ndinozovaaka, andichazovaputsi; ndinozovasima, haiwa kuvabvita.

⁷ Ndinozovapa mwoyo wokundizia, kuti ndini Mambo Mwari; navo vanozoita vanhu vangu, neni ndinozoita Mwari wavo, ngokuti vanozopetuka kwendiri ngomwoyo wavo weshe.

⁸ “Asi izvi ndizvo zvinoronza Mambo Mwari, ‘Kudai ngemaonde akashata, akashata asikadyiki, ndizvo zvendinozoitira Zedhekia, mambo waJudha, vatongi vake, vakasara veJerusarema, avo vakasara munyika iyi, naavo vanogara munyika yeEgipite.

⁹ Ndinozovaita chiro chinotyisa nechakashata kuumambo hwenyika dzeshe kuti vatsverudzwe, kuita chishekedzo, nokutsvinyirwa, nokutukwa kundau dzeshe kwendinozovaisa.

¹⁰ Ndinozotumira shoti, nzara nenhenda pakati pavo, metsa vapedzwe kubva kunyika yendakavapa namadzibaba avo.’ ”