Jer. 23 - Bhaibheri Rakachena muChindau

Gonda reZvichauya

¹ “Ihehe kuvaushi vanouraya nokuparadza makwai embusho yangu!” Unoronza Mambo Mwari.

² Izvi ndizvo zvinoronza Mambo Mwari, Mwari waIsuraeri, ngendaa yevaushi vanousha vanhu vangu, “Ndimwi mwakaparadza zvifuyo zvangu nokuzvidzinga; amuzi kuzviringira. Ndizvo ndinozoringira padera penyu ngendaa yokushata kwezviito zvenyu,” unoronza Mambo Mwari.

³ “Zvino ndinozounganidza pachangu akasara emakwai angu kubva kunyika dzeshe kwendakaatatanisira, nokuaunzazve kumatanga awo; nawo anozobereka nokuwandisa.

⁴ Ndinozomirudza vaushi padera pawo, avo vanozoausha; nawo aachazotyi nokuti kuvhunduswa, apana narimwe rawo rinozorashika,” unoronza Mambo Mwari.

⁵ “Ringira, mazuva anouya chokwadi,” unoronza Mambo Mwari, “Apo ndinozomirudzira Dhavhidha Dai rakarurama, naye unozotonga paumambo ngokungwara; unozotonga ngokutonga kwakanaka, nokuita zvakarurama munyika.

⁶ Mumazuva ake Judha unozoponeswa, naIsuraeri unozogara ngokungwaririka. Neiri ndiro zina rake raanozodaidzwa ndiro kuti, ‘MAMBO MWARI KURURAMA KWEDU.’

⁷ “Ndizvo, ringira, mazuva anouya,” unoronza Mambo Mwari, “Apo vasikachazoti, ‘Kudai ngezvaanopona Mambo Mwari, uwo wakabudisa vana vaIsuraeri kubva munyika yeEgipite,’

⁸ asi, ‘Kudai ngezvaanopona. Mambo Mwari, uwo wakabudisa nokutungamira rudzi rwemhatso yaIsuraeri kubva munyika yedera, nokubva munyika dzeshe kwendakavadzingira.’ Zvino vanozogara munyika yavo yemene.”

Mazwi aJeremia ngendaa yeVaprofeti

⁹ Mwoyo wangu wapwanyika mukati mwangu ngendaa yevaprofeti, magodo angu eshe anohuta; ndadai ngechiradza, nokudai ngomunhu wanyiswa ngevhini, ngendaa yaMambo Mwari, nendaa yokuchena kwemazwi ake.

¹⁰ Ngokuti nyika yazara ngavaombi; ngendaa yechituko, nyika inobonda, mafuro akanaka omushango aoma. Kuhamba kwavo kwakashata, nesimba ravo arizi kunaka.

¹¹ “Veshe vaprofeti nevapristi avadi Mwari; kunyazwi mumhatso mwangu, ndaona kushata kwavo,” unoronza Mambo Mwari.

¹² “Ndizvo njira dzavo dzinozoita kwevari njira dzinotedza muchidima, umwo vanozosundirwamwo nokuwiramwo; ngokuti ndinozounza kushata padera pavo ngegore rokuororwa kwavo,” unoronza Mambo Mwari.

¹³ Mukati mwevaprofeti veSamaria ndakaona zviro zvinonyangadza; vakaprofeta ndiBhaari nokuita kuti vanhu vangu Isuraeri vapauke.

¹⁴ Asi muvaprofeti veJerusarema ndaona chiro chine tsvina: vanoomba, nokuhamba mumanyepo; vanogwinyisa nyara dzevaiti vezvakashata, kuti kutamike naumwe unopetuka kubva mukushata; veshe vakadai ngeSodhoma kwendiri, nevanogaremwo vakadai ngeGomora.

¹⁵ Ndizvo izvi zvinoronza Mambo Mwari wehondo ngendaa yevaprofeti: “Ringira, ndinozovadyisa muti unovava, nokuvaita kuti vamwe mvura inechanduru; ngokuti kutukisa Mwari kwevaprofeti veJerusarema kwapararira munyika yeshe.”

¹⁶ Izvi ndizvo zvinoronza Mambo Mwari, “Musapurutana kumazwi evaprofeti, avo vanoprofeta kwomuri, vanomunyepera. Vanoereketa zvioniso zvomwoyo yavo, haiwa zvinobva kumuromo waMambo Mwari.

¹⁷ Vanoangira vechiti kwevari vanoshoora izwi raMambo Mwari, ‘Zvinozomunakira;’ vanoti kunoumwe ngaumwe unohamba mukukarakadza kwomwoyo wake wemene, ‘Apana chakashata chinozokugumira.’

¹⁸ “Ngokuti ndiani wakaema mukupangana naMambo Mwari, kuti aone nokuzwa izwi rake? Ndiani wakapurutana izwi rake nokuriteketesa?

¹⁹ Ringira, dutu raMambo Mwari! Rinoushungu, rabuda, chamupupuri chinovhuvhuta; chinozoputika padera pevakashata.

²⁰ Ushungu hwaMambo Mwari ahuzopetuki, metsa aita nokupedza zvaakapinimidza mumwoyo mwake. Mumazuva okugumisira munozonasa kuzvizwisisa.

²¹ Andizi kutuma vaprofeti, asi vakarumba kuenda; andizi kuereketa kwevari, asi vakaprofeta.

²² Asi kudai vakaema mumipango yangu, vaizodai vakateketesa mazwi angu kune vanhu vangu, vangadai vakavatenderudza kubva kunjira dzavo dzakashata, nokubva kuzviito zvavo zvakashata.

²³ Ndiri Mwari wepasinde here, ndisiri Mwari wokuretu?” Unoronza Mambo Mwari.

²⁴ “Uripo here ungahwara mundau dzakafishika, kuti ndisakona kumuona?” Unoronza Mambo Mwari. “Andizadzi denga nenyika here?” Unoronza Mambo Mwari.

²⁵ “Ndazwa zvakaronza vaprofeti avo vanoprofeta manyepo ngezina rangu vechiti, ‘Ndarota, ndarota.’

²⁶ Izvi zvinozogara mukuwo wakaitawani? Mwoyo yevaprofeti inozombopetuka sure, avo vanoprofeta manyepo, avo vanoprofeta kuchengedzera kwemwoyo yavo?

²⁷ Vanoronga kuti vanhu vangu variyarwe zina rangu ngehope dzavo dzevanoronzerana umwe kunoumweni, kudai ngemadzibaba avo vakariyarwa zina rangu ngendaa yaBhaari.

²⁸ Muprofeti unehope dzaakarota, ngaadzironze, asi nouwo unemazwi angu, ngaaerekete mazwi angu ngokugondeka. Kuri pari kuedzana kwezungu nezviyo?” Unoronza Mambo Mwari.

²⁹ “Mazwi angu aazi kudai ngomuriro here,” unoronza Mambo Mwari, “Nokudai ngehamera inoputsa buwe kuti riite chimwe chimwe?

³⁰ Ringirai, ndinozorwisana nevaprofeti, avo vanobirana mazwi angu, umwe noumweni,” unoronza Mambo Mwari.

³¹ “Ringira, ndinorwisana navaprofeti,” unoronza Mambo Mwari, avo vanoshandisa rurumi rwavo vechiti, “Mambo Mwari unoti,

³² ‘Ringirai, ndinorwisana navo vanoprofeta hope dzokunyepa,’ unoronza Mambo Mwari, nokudzironza, nokuita kuti vanhu vangu vapauke ngemanyepo avo nezvisina shwiro, apo ndisikazi kuvatuma, nokuti kuvapanga kudaro; ndizvo avazodetseri vanhu ava nepadoko, unoronza Mambo Mwari.”

Mutwaro waMambo Mwari

³³ “Naapo ava vanhu, vaprofeti, nokuti vapristi, vanozokubvunza vechiti, ‘Ngowenyi mutwaro waMambo Mwari?’ Ndizvo unozoti kwevari, ‘Imwimwi ndimwi mutwaro. Ndinozomurasha kuretu, unoronza Mambo Mwari.’

³⁴ Asi ngendaa yomuprofeti, mupristi, nokuti vanhu veshe, vanoti, ‘Mutwaro waMambo Mwari,’ ndinozoorora uwo munhu nemhatso yake.

³⁵ Ndizvo izvi zvomunozoronza umwe kunoumwe pakati penyu, kuti, ‘Mambo Mwari wakapingura kutinyi?’ Nokuti, ‘Mambo Mwari wakaereketa kutinyi?’

³⁶ Asi amuchazoereketizve ngomutwaro waMambo Mwari, ngokuti izwi romunhu umwe ngaumwe rinozoita mutwaro wake, ngokuti mwakapindura mazwi aMwari unopona, Mambo Mwari wehondo, Mwari wedu.

³⁷ Izvi ndizvo zvomunozobvunza kumuprofeti, ‘Mambo Mwari wakupingura kutinyi?’ Nokuti, ‘Waereketa kutinyi Mambo Mwari?’

³⁸ Asi kudai mwechiti, ‘Mutwaro waMambo Mwari,’ izvi ndizvo zvinoronza Mambo Mwari: Ngokuti mwaereketa mazwi aya okuti, ‘Mutwaro waMambo Mwari,’

³⁹ ndizvo, ringira, inini ndemene ndinozomuriyarwa yaamho, ndinozomurasha kubva mukuona kwangu, imwimwi nedhorobha, rendakamupa nemadzibaba enyu.

⁴⁰ Ndinozounza padera penyu chituko chemhera nariini, nokutsverudzwa kusikaperi, izvo zvisikazoriyarikanwi.”