Jer. 22 - Bhaibheri Rakachena muChindau

Izwi raJeremia Rinoenda kuMhatso yoUmambo hwaJudha

¹ Izvi ndizvo zvinoronza Mambo Mwari: “Dzaka kumhatso yamambo waJudha, uerekete apo izwi iri

² wechiti, ‘Izwa izwi raMambo Mwari, O mambo waJudha, unogara padendemaro raDhavhidha, iwewe, nevaranda vako, nevanhu vako avo vanopotera ngepamisiwo iyi.’

³ Izvi ndizvo zvinoronza Mambo Mwari: Tongai kutonga kwakanaka, muite zvakarurama, musunhure kubva munyara yomutambudzi weshe wakabirwa. Musaita zvakashata, musaremadza mupara, nherera, nokuti shirikadzi, nokuti kuparadza ngazi isina ndaa mundau iyi.

⁴ Ngokuti kudai mwechipurutana izwi iri ngegwinyiso, zvino madzimambo anozopotera ngepamisiwo yeiyi mhatso kugara padendemaro raDhavhidha, vechigara mungoro nepamahachi, ivo nevaranda vavo, nevanhu vavo.

⁵ Asi kudai musikapurutani mazwi aya, ndinopika ndini pachangu, unoronza Mambo Mwari, kuti mhatso iyi inozoita dongo.

⁶ Ngokuti izvi ndizvo zvinoronza Mambo Mwari ngendaa yemhatso yamambo waJudha: Iwewe wakadai ngeGireadhi kwendiri, nokudai ngesoro reRebhanoni; asi ndinopika ndinozokuita kuti udai ngorubaya, kudai ngedhorobha risikagarwi.

⁷ Ndinozokunasirira vaparadzi kukuparadza, umwe naumwe wavo nezvokurwa ndizvo zvake; vanozotemera pashi misidhare yakanaka, nokuikandira mumuriro.

⁸ Nemadzinza mazhinji anozopinda ngepasinde pedhorobha iri, vanozoti umwe kuneumweni ‘Ngenyi Mambo Mwari akaita zvakadai kudhorobha guru iri?’

⁹ Navo vanozopingura vechiti, ‘Ngokuti vakasiya chitenderano chaMambo Mwari, Mwari wavo, navo vakadira nokushandira zvimwari zvimweni.’ ”

Izwi raJeremia ngendaa yaSharumu

¹⁰ Musachemera uwo wafa, nokuti kumutsumba; asi chemera uwo unoenda kure, ngokuti aachazopetukizve, kuona nyika yechibarirwe chake.

¹¹ Ngokuti izvi ndizvo zvinoronza Mambo Mwari ngendaa yaSharumu mukororo waJosia mambo waJudha, uwo wakatonga pandau yababa ake Josia, uwo wakaenda kubva kundau iyi: Aachazopetukizve pano,

¹² asi unozofireyo kundau yaakatorwa kuitwa mubatwa, aachazoonizve nyika iyi.

Izwi raJeremia ngendaa yaJehoiakimu

¹³ Ihehe kwaari unoaka mhatso yake mukusikarurama, nemakamera ake epadera mukushata; uwo unoshandisa vaakirwana vake asikavapi muthuso, asikavabhadhari ngomushando wavo;

¹⁴ uwo unoti, “Ndinozodziakira mhatso huru, inemakamera epadera makuru, ndechinasira mafasitera, nokunasira padenga ngemisidhari, nokuiseta ngomuara wakatsvuka.”

¹⁵ Zvino kuita mambo here ngokuita misidhari yakawanda? Baba ako avazi kudya nokumwa here, nokutonga kwakanaka, nokuita zvakarurama? Zvino zvakanaka kwaari.

¹⁶ Wakatonga ndaa dzevarombo nedzevatami, zvino zvakanaka kwaari. Uku andikwopi kundizia here? Unoronza Mambo Mwari.

¹⁷ Asi madziso ako nomwoyo wako azvioni chimweni kwega kuemura nokuparadza ngazi isina ndaa, nokuita kutambudza nokupamba.

¹⁸ Izvi ndizvo zvinoronza Mambo Mwari ngendaa yaJehoiakimu, mukororo waJosia mambo waJudha: “Avazomuchemi vechiti, ‘Yoowe, hama yangu!’ Nokuti, ‘Yoowe, hanzvadzi yangu!’ Avazomuchemi vechiti, ‘Yoowe, mambo!’ Nokuti, ‘Yoowe, ukuru hwake!’

¹⁹ Unozoikwa ngokuikwa kwembongoro, iyo inokweiwa nokurashwa kubanze kwemisiwo yeJerusarema.”

Izwi raJeremia ngendaa yeMagumo eJerusarema

²⁰ Kwireyo Rebhanoni, ucheme; nokuboorera muBhashani, boorera kubva paAbharimu, ngokuti vadikani vako veshe vaparadzwa.

²¹ Ndakaereketa kwouri ngomukuwo wokubudirira kwako, asi iwewe wakati, “Andizopurutani.” Uyu ndiwo muitiro wako wokusikapurutana izwi rangu, kubvira muudoko hwako.

²² Dutu rinozoparadza vaushi vako veshe, nevadikani vako vanozoenda muubatwa; ngegwinyiso ngouwo mukuwo munozotsverudzwa nokukangaidzwa ngendaa yokushata kwako kweshe.

²³ O iwewe unogara muRebhanoni, unonasira chisaki chako pakati pemisidhari, kukungurirwa kwakaitawani, apo kurwadziwa kunozouya padera pako, kwakadai ngokurwadziwa kwomukadzi apo oobereka!

Kutonga kwaMwari padera paJehoiakhini

²⁴ “Kudai ngezvendinopona, unoronza Mambo Mwari, kunyazwi kudai mambo Konia mukororo waJehoiakimu waJudha waiya ndandazi yakanangurwa yepanyara yangu yokumudyo, kunyazwi ndaizokubvisapo

²⁵ nokukupira munyara yaavo vanotsvaka kukuuraya, nomunyara yaavo vaunotya, kunyazwi munyara yaNebhukhadhineza, mambo weBhabhuroni, nomunyara yavaKharadhea.

²⁶ Ndinozokurasha namai akakubara munyika imweni kwomusikazi kubarirwa, nemwi munozofiremwo.”

²⁷ Asi avachazohwiriri kunyika yevaidisa kuhwirira.

²⁸ Uyu munhu Khonia hari yakaputsika inoshoorwa here, chidziyo chisikadikanwi ngomunhu weshe? Vanorashwa ngenyi, iye nomubarirwana wake, navo vanorashirwa munyika yevasikazii?

²⁹ O nyika, nyika, nyika, izwai izwi raMambo Mwari.

³⁰ Izvi ndizvo zvinoronza Mambo Mwari, “Nyora, ‘Munhu uyu kudai ngeusina mwana, munhu usikazobudiriri mumazuva ake; ngokuti akuna naumwe worudzi rwake unozobudirira, kugara padendemaro raDhavhidha, nokutonga munyika yaJudha.’ ”