Jer. 21 - Bhaibheri Rakachena muChindau

Kuereketa ngoKunyiswa kweJerusarema

¹ Iri ndiro izwi rakauya kunaJeremia rechibva kunaMambo Mwari, apo mambo Zedhekia atumira kwaari Phashuri mukororo waMarikhia, naZefania mupristi mukororo waMaaseia echiti,

² “Tibvunzirei kunaMambo Mwari, ndapota; ngokuti mambo Nebhukhadhineza weBhabhuroni unoita hondo nesu; pamweni Mambo Mwari ungatiitira mushando unoshamisa, kudai ngezvaanosiita, naye ungazomuita kuti apetuke kubva kwetiri.”

³ Zvino Jeremia wakati kwevari, “Izvi ndizvo zvomunozoronza kunaZedhekia:

⁴ ‘Izvi ndizvo zvinoronza Mambo Mwari, Mwari waIsuraeri: Ringira ndinozopetudza ndonga dzokurwa ndidzo hondo, dziri munyara dzenyu, dzomunoshandisa kurwa ndidzo namambo weBhabhuroni, nokurwisa vaKharadhea vanomukomba ngokubanze kworusvingo, neni ndinozovaunganidza pakati pedhorobha iri.

⁵ Inini pachangu ndinozorwa nemwi, ngenyara yakatambanudzwa nomuoko unesimba, muushungu mukunyangadzwa, nomuushungu hukurutu.

⁶ Ndinozochaya vagari veiri dhorobha, zveshe vanhu nemhuka; zvinozofa ngenhenda huru.’

⁷ Mambo Mwari unoti, ‘Ngesure kwazvo ndinozopa Zedhekia mambo waJudha, nevaranda vake, nevanhu vedhorobha iri, avo vakapona nhenda, kushoti nenzara, munyara yaNebhukhadhineza mambo weBhabhuroni, munyara yemagaa avo, munyara yaavo vanotsvaka kuvauraya. Unozovabaya ngokupinza kweshoti; aazovakunguriri, nokuti kuvaponesa, nokuti kuvaitira nyasha.’ ”

⁸ Unozoti kuvanhu ava, “Unoronza izvi Mambo Mwari: Ringira, ndinoisa pamberi penyu njira yokupona nenjira yokufa.

⁹ Uwo unogara mudhorobha iri unozofa ngeshoti, ngenzara, nenhenda; asi iye unozobuda, nokuwira kuvaKharadhea avo vari kumukomberedza, unozopona, unozoita kuti kupona kwake kuitwe mutengo wehondo.

¹⁰ Ngokuti ndakaemesa hope yangu kurwisa iri dhorobha ngendaa yokushata, haiwa ngendaa yokunaka,” unoronza Mambo Mwari. “Rinozopirwa munyara yamambo weBhabhuroni, naye unozoripisha ngomuriro.”

Kutongwa Kuri Padera peMhatso yoUmambo hwaJudha

¹¹ Kumhatso yamambo waJudha, ronza izvi: “Izwai izwi raMambo Mwari,

¹² O mhatso yaDhavhidha. Izvi ndizvo zvinoronza Mambo Mwari: Tongai kutonga kwakanaka mangwanani, mumusunhure kubva kunyara yomutambudzi weshe wakabirwa, kuti ushungu hwangu husabuda kudai ngomuriro nokupisha, pasina naumwe ungaudzima, ngendaa yokushata kwezviito zvenyu.

¹³ Ringira, ndinorwisana nemwi, O imwimwi vagari vomubani, O buwe romurubaya, unoronza Mambo Mwari; imwimwi munoti, ‘Ndiani ungakona kudzaka kurwa nesu, nokuti ndiani ungakona kupotera muugaro hwedu?’

¹⁴ Asi ndinozomuorora kudai ngemichero yezviito zvenyu, unoronza Mambo Mwari. Ndinozobasa muriro mugwasha mwaro, nawo unozopisha izvo zveshe zvinoritendenedza.”