Jer. 20 - Bhaibheri Rakachena muChindau

Kuambana kwaJeremia naPhashuri Mupristi

¹ Zvino Phashuri mupristi, mukororo waIma, uwo waiya nduna huru mumhatso yaMambo Mwari, wakazwa Jeremia echiprofeta izvi zviro.

² Zvino Phashuri wakachaya Jeremia muprofeti, wakamuisa mumanguri aiya paBhenjamini wepadera, Musiwo wemhatso yaMambo Mwari.

³ Ngechimangwanani, apo Phashuri abudisa Jeremia mumanguri, Jeremia wakati kwaari, “Mambo Mwari aazi kukududza kuti Phashuri, asi ‘Kutyisa kwakatendenedza kweshe.’

⁴ Ngokuti izvi ndizvo zvinoronza Mambo Mwari: ‘Ringira, ndinozokuita unodzityisa iwewe pachako nokuvangani vako veshe; navo vanozourawa ngeshoti yemagaa avo, iwewe wakaringira. Neni ndinozopa Judha weshe munyara yamambo weBhabhuroni; unozovatora vari vabatwa kuenda Bhabhuroni, unozovauraya ngeshoti.

⁵ Ndinozopa pfuma yeshe yedhorobha iri, zveshe zverinouyirwa ndizvo, zveshe zvaro zvinomutengo mukuru, noupfumi hweshe hwemadzimambo aJudha, kunyara dzemagaa avo, avo vanozozvichakata, nokuzvitora kuenda nazvo Bhabhuroni.

⁶ Newe Phashuri, navo veshe vanogara mumhatso mwako, munozoenda muubatwa, nemwi munozoguma Bhabhuroni; naapo munozofa, nokuikwa apo, iwewe nehama dzako dzeshe, idzo dzewaprofetera manyepo.’ ”

Jeremia Unogunun'una kunaMambo Mwari

⁷ O Mambo Mwari, wandichengedzera, neni ndakachengedzerwa; iwewe wakagwinya kupinda inini, ukandinyisa. Ndinoshekwa mazuva eshe; veshe vanondiitira jee.

⁸ Ngokuti apo pendinoereketa, ndinodaidzira; ndinosisira kudaidzira ndechiti, “Hohoho nokuparadzwa;” ngokuti izwi raMambo Mwari raita kuti nditukwe nokushoorwa muzuva reshe.

⁹ Kuti ndikati, “Andichazoereketi ndiye, nokuti kuereketa ngezina rake mhera nariini,” zvino mukati mwangu chirimwo chinopisha kudai ngomuriro unobaka, wakakonyerwa mumagodo angu, neni ndaremba ngokushingirira, ndakorera.

¹⁰ Ngokuti ndinozwa vazhinji vanovherevhenza vechiti, “Kutyisa kuri kumarupande eshe.” Vakati, “Muronzenyi! Ngatimuronze.” Vangani vangu veshe vakagarira kukorera kwangu vechiti, “Pamweni ungakona kunyengererwa, nesu tingakona kumunyisa nesu tinozokona kuunzidzira padera pake.”

¹¹ Asi Mambo Mwari uneni, wakadai ngomurwi wehondo unotyisa; ndizvo vanonditambudza vanozopumhunwa, navo avazonyisi akadi. Vanozotsveruka kakurutu, ngokuti avazobudiriri. Kutsverudzwa kwavo kwemhera nariini akuzoriyarikanwi.

¹² O Mambo Mwari wehondo, unoedza vakarurama, unoona mwoyo nomukarakadzo; ngandione kuunzidzira kwako padera pavo, ngokuti kwouri ndaisa ndaa yangu.

¹³ Embai kunaMambo Mwari, kudzai Mambo Mwari! Ngokuti wakanunura mweya womurombo kubva munyara yevaiti vezvakashata.

¹⁴ Ngaritukwe zuva rendakabarwa ndiro! Zuva apo mai angu akandibereka risaano kufumiswa!

¹⁵ Ngaatukwe munhu uwo wakauya neshoko kunababa angu echiti, “Mwana waberekwa kweuri murumbwana,” kuvaita kuti vadakare kakurutu.

¹⁶ Munhuwo ngaadai ngemadhorobha akaparadzwa ndiMambo Mwari, asikaakunguriri; ngaazwe kuchema mumangwanani, nokudaidzira mumasikati,

¹⁷ ngokuti aazi kundiuraya ndichiri mundani; ndizvo mai angu vaizodai vakaita iba rangu, nendani yavo igare yakakura.

¹⁸ Ndakabvirenyi mundani kuti ndione mushando nokusvipo mwoyo, kuti ndipedze mazuva angu mukutsverudzwa?