Jer. 2 - Bhaibheri Rakachena muChindau

Kungwarira kwaMwari vaIsuraeri

¹ Izwi raMambo Mwari rakauya kwendiri rechiti,

² “Enda, udaidzire mukuzwa kwevanhu veJerusarema wechiti, unoronza izvi Mambo Mwari: Ndinokarakadza, ngenyasha dzoutsva hwako, norudo rwako petakatanga kuroorana, apo wainditeera mushango, munyika yaiya isikazi kusimwa.

³ Isuraeri waiya akachena kunaMambo Mwari, mitanguro yemichero yake. Veshe avo vakaidya vakaitwa vanendaa; kushata kwakauya padera pavo,” unoronza Mambo Mwari.

Chishaishi cheMadzibaba aIsuraeri

⁴ Izwai izwi raMambo Mwari, O mhatso yaJakobe, nemhuri yeshe yemhatso yaIsuraeri.

⁵ Ndizvo izvi zvinoronza Mambo Mwari, “Kushatanyi kwevakaona madzibaba enyu mwendiri, kwakaita kuti vaende kuretu kubva kwendiri, nokuteera zviro zvoupenzi, nokudziita pachavo vasina shwiro?

⁶ Avazi kuronza kuti, uri pari Mambo Mwari uwo wakatikwidza kubva kunyika yeEgipite, wakatitungamira mushango, mukati mwenyika yakaomerwa nemarindi, munyika yakaoma, nechidima chikurutu, mukati mwenyika isikazi kuhambwa ngomunhu naumwe, isikagarwi ngomunhu?

⁷ Ndakamuunza kunyika yezvakawanda, kuti mudye michero yayo nezviro zvayo zvakanaka. Asi apo mwapindamwo, mwakasvipisa nyika yangu, nokuita kuti nhaka yangu iite chinyangadzo.

⁸ Vapristi avazikubvunza kuti, ‘Uri pari Mambo Mwari?’ Naavo vanobata mipango avazi kundizia; vaushi vakapauka kubva kwendiri, vaprofeti vakaprofeta ndiBhaari, vakateera zviro zvisikadetseri chiro.

Mambo Mwari Unoitira Vanhu vake Ndaa

⁹ Ndizvozve ndinomuitira ndaa, unoronza Mambo Mwari, nokuitira ndaa vana vevana venyu.

¹⁰ Ambukai kuzviwi zveSaipurasi, muone; tumai kuKedha, munase kuringira zvakanaka, muone kuti chakambowayo here chiro chakadaro.

¹¹ Riripo here dzinza rakachicha zvimwari zvaro kunyazwi akuna zvimwari? Asi vanhu vangu vakachicha uthende hwavo kuti vatore icho chisikadetseri chiro.

¹² Shamiswai ngeichi, imwimwi matenga, mutye kakurutu, mukaruke kakurutu, unoronza Mambo Mwari.

¹³ Ngokuti vanhu vangu vaita kushata kuiri: vandisiya inini chinyuka chemvura yokupona, vadzitsira zvinyuka zvinerutwe, zvisikagari nemvura.

Musharo woKusikagondeka kwaIsuraeri

¹⁴ Isuraeri ihloko here? Wakabarwa ngehloko here? Unopambwa ngenyi zvino?

¹⁵ Mhondoro dzamubhongera, dzabhonga kakurutu. Vakachakata nyika yake; madhorobha ake aamatongo, asina unogaramwo.

¹⁶ Padera pazvo zveshe vanhu veMempfisi, neveThafanehesi vakagura dzungudza resoro rako.

¹⁷ Auzi kudziunzira izvi padera pako here, ngokusiya Mambo Mwari, Mwari wako, apo akakutungamirira munjira?

¹⁸ Zvino unouyirwa ngenyi ngokuenda Egipite, koomwa mvura yeNaire? Nokuti unouyirwa ngenyi ngokuenda Asiria, koomwa mvura yeYufratesi?

¹⁹ Kushata kwako kwemene kunozokuorora, nokupetuka sure kwako kunozokuitira ndaa. Zia nokuona kuti chiro chakashata nechinovava kweuri kusiya Mambo Mwari, Mwari wako; kutyisa kwangu akurimwopi mukati mwako,” unoronza Mambo Mwari wehondo.

Isuraeri Unoramba Kudira Mambo Mwari

²⁰ Ngokuti ngomukuwo wekare wakagura joka rako, muzvisungo zvako; newe wakati, “Andidi kukushandira! Padera pezvitunhu zveshe, nepashi pemiti yeshe yakasvipirika wakaatapo, wechiita uhure.

²¹ Asi ndakakusima uri muvhini wakanaka; waiya mbeu yakanaka. Ndizvo wakaita mashandukirenyi kuita muvhini weshango?

²² Kunyazwi unodzishamba ngesoda, wechishandisa sipo yakawanda, asi muara wokushata kwako kundoripo pamberi pangu, unoronza Mambo Mwari.

²³ Ungaita maronzerenyi kuti, andizi kusvipiswa, andizi kuteera vanaBhaari? Ringira njira yako mubani, uzie icho chowaita; wakadai ngengamera doko rinorumbisa apo neapo munjira dzaro,

²⁴ mbongoro yomushango isikazi kupetwa, inofemba kudutu ngokuda kwayo; ngomukuwo wayo wokudisisa mwamuna ndiani ungairambidza? Idzo dzeshe dzinoitsvaka adzizodzirembesi; ngenguva yomwedzi wayo dzinozoiona.

²⁵ Rambidza rutsoka rwako kuti rusahamba rusina gwada, nemukuro wako kubva kunenyota; asi unoti, ‘Azvidetseri, ngokuti ndakada vapara, neni ndinozovateera.’ ”

Isuraeri Unosisira Kuororwa

²⁶ “Kudai ngembavha inotsverudzwa apo yabatwa, ndizvo mhatso yaIsuraeri inotsverudzwa; ivo, madzimambo avo, vatongi vavo, vapristi vavo nevaprofeti vavo,

²⁷ vechiti kumuti, ndiwe baba angu, nokubuwe, ndiwe wakandibereka. Ngokuti vakandifuratira mishana yavo, haiwa hope dzavo. Asi ngomukuwo wokutambudzika kwavo vanoti, uya utiponese!

²⁸ Asi zviri pari zvimwari zvenyu zvemwakadziitira? Ngazviuye kuti zvechikona kumuponesa ngomukuwo wokutambudzika kwenyu; ngokuti unazvo zvakawanda zvimwari kudai ngokuwanda kwemadhorobha ako, iwewe Judha.

²⁹ Ngenyi mwechindigunun'unira? Imwimwi mweshe mwakandimukira, unoronza Mambo Mwari.

³⁰ Ndakachayira pasina chiro vana venyu; avazi kuashira kupangwa. Shoti yenyu yemene ndiyo yakauraya vaprofeti venyu kudai ngemhondoro inokara.

³¹ Nemwi, O mubarirwana, wonai izwi raMambo Mwari. Ndaita rubaya kunaIsuraeri here nokuti ndaita nyika yechidima? Ngenyi zvino vanhu vangu vechironza kuti, takasunhurika, atizouyizve kwouri?

³² Mhandwe ingariyarwa here zvinemeso zvayo nokuti makhoti zvokufuka zvake? Asi vanhu vangu vakandiriyarwa mazuva asikaerengeki.

³³ Kunakanyi kwakaita utungamiriri hwako hwokutsvaka vadikani! Ndizvo kunyazwi nokuvakadzi vakashata wakadzidzisa njira dzako.

³⁴ Ngazi yevarombo vasina ndaa inooneka pazvokufuka zvako, kunyazwi auzi kuvabata vechipwanya kupinda mukati. Asi padera peizvi zveshe,

³⁵ unoti, ‘Andina ndaa, ngegwinyiso ushungu hwake hwabva kwendiri!’ Zvino ndinokupinza mukutongwa ngokuti unoti, andizi kushaisha.

³⁶ Unohambahamba kakurutu ngenyi kutsvaka njira imweni? Iwewe unozotsverudzwa ngeEgipite, kudai ngezvewakatsverudzwa ngeAsiria.

³⁷ Kubvira apo unozobudawo nenyara dzako wakadziisa padera pesoro rako, ngokuti Mambo Mwari waramba avo vounogonda, newe auzobudiriri kubudikidza ndivo.”