Jer. 19 - Bhaibheri Rakachena muChindau

Jomeya Rakaputsika

¹ Izvi ndizvo zvinoronza Mambo Mwari, “Enda, wootenga jomeya romuumbi. Uunze vakuru vevanhu nevakuru vevapristi,

² enda mubani romukororo waHinomu, pasinde poMusiwo wePotisherdhi, apapo uteketese mazwi endinokuronzera.

³ Unozoti, ‘Izwai izwi raMambo Mwari, O madzimambo aJudha neimwimwi vagari veJerusarema. Izvi ndizvo zvinoronza Mambo Mwari wehondo, Mwari waIsuraeri: Ringira, ndinounza kushata padera pendau iyi, ukwo kunoti, kunyazwi ndiani unokuzwa, nzee dzake dzinozozhararika.

⁴ Ngokuti vanhu vakandiramba, vasvipisa ndau iyi, vakapisha mutombo mukati mwayo kuzvimwari zvimweni, zvisikazi kumboziikanwa ndivo, nokuti madzibaba avo, nokuti madzimambo aJudha; navo vakazarisa ndau iyi ngengazi yevasina ndaa,

⁵ vakaakira Bhaari maarita, kupisha vakororo vavo ngomuriro kuita mudiro wokupisha kunaBhaari, izvo zvendisikazi kupanga nokuti kuemesa, azvizi kumboguma kumukarakadzo wangu.

⁶ Ndizvo, ringira ngegwinyiso, mazuva anouya, unoronza Mambo Mwari, apo iyi ndau isikachazodaidzwi kuti, Thofethi, nokuti bani romukororo waHinomu, asi Bani roKuuraira.

⁷ Nomundau iyi ndinozoita kuti bangano raJudha nereJerusarema riite risina shwiro; ndinozoita kuti vawe ngeshoti pamberi pemagaa avo, ngenyara dzaavo vanotsvaka kuvauraya. Ndinozopa miiri yavo yakafa kuita kudya kweshiri dzomudenga nokwezvikara zvomunyika.

⁸ Ndinozoita kuti iri dhorobha riite matongo, chiro chinoridzirwa murudzi; weshe unopinda ndipo unozoshamiswa, naye unozoridza murudzi ngendaa yokuparadzwa kwaro kweshe.

⁹ Ndinozoita kuti vadye nyama yevakororo vavo neyevanasikana vavo, navo veshe umwe ngaumwe unozodya nyama yomuakirwana wake ngomukuwo wokukombiwa newokutyiswa, ukwo magaa avo neavo vanotsvaka kuvauraya vanozovatyisa ndikwo.’

¹⁰ “Zvino unozopwanya jomeya mukuona kwevanhu vanoenda newe,

¹¹ unozoti kwevari, ‘Izvi ndizvo zvinoronza Mambo Mwari wehondo: Ndizvo ndinozopwanya vanhu ava nedhorobha iri, kudai ngouwo unopwanya chidziyo chomuumbi, kuitira kuti chisazogwamanidzikazve. MuThofethi vanozotsira metsa kutamike nendau yokutsira.

¹² Izvi ndizvo zvendinozoita kundau iyi, nokuneavo vanogaremwo, nokuita kuti iro dhorobha ridai ngeThofethi, unoronza kudaro Mambo Mwari.

¹³ Mhatso dzeJerusarema nemhatso dzemadzimambo aJudha dzinozosvipiswa, kudai ngendau yeThofethi, mhatso dzeshe dzevakapishira padera padzo mutombo kuhondo dzeshe dzomudenga, vakadurura midiro yavo yokumwa kunezvimwari zvimweni.’ ”

¹⁴ Naapo Jeremia auya kubva Tofethi, kwaakatumwa ndiMambo Mwari kuti aprofete, wakaema paruwanze rwemhatso yaMambo Mwari; akati kuvanhu veshe:

¹⁵ “Izvi ndizvo zvinoronza Mambo Mwari wehondo, Mwari waIsuraeri: Ringira, ndinounza padera pedhorobha iri, nepadera pemaguta aro eshe, kushata kweshe kwendakaronza kweriri, ngokuti vakakonzisa mitsipa yavo, kuramba kuti vasazwa mazwi angu.”