Jer. 18 - Bhaibheri Rakachena muChindau

Jeremia paMhatso yoMuumbi weHari

¹ Izwi rakauya kunaJeremia rechibva kunaMambo Mwari rechiti,

² “Miruka udzake kumhatso yomuumbi, naapo ndinozokuita kuti uzwe mazwi angu.”

³ Ndizvo ndakadzaka kumhatso yomuumbi, naapo waiya echishanda mushando wake pavhiri.

⁴ Chidziyo chaaiumba ngedongo chakashaishirwa munyara yomuumbi, naye wakaumba chimweni chidziyo, kudai ngezvaakaona zvakanaka kwaari.

⁵ Zvino izwi raMambo Mwari rakauya kwendiri rechiti,

⁶ “Inini andingakoni kuita ndiwe here, O mhatso yaIsuraeri, kudai ngezvaaita muumbi? Unoronza Mambo Mwari. ‘Ringira, kudai ngedongo riri munyara yomuumbi, ndizvo zvewakaitawo munyara mwangu, O mhatso yaIsuraeri.

⁷ Panguva yendinozoereketa ngendaa yedzinza, nokuti ngendaa youmambo, ndicharibvita nokuripwanyira pashi, nokuriparadza,

⁸ asi kudai iro dzinza, rendakaereketa ndiro rikatenderuka kubva mukushata kwaro, ndinozorekera kuita kushata kwendakapinimidza kuita padera paro.

⁹ Nepamukuwo umweni ndinozoereketa ngendaa yedzinza, nokuti ngendaa youmambo, iro rendinozoaka nokuriemesa,

¹⁰ asi kuti rechiita zvakashata mukuona kwangu, risikapurutani izwi rangu, zvino ndinozorekera kuita zvakanaka zvendakaemesa kuti ndiite kweriri.

¹¹ Ndizvo zvino, erekete kuvanhu vaJudha nokune vagari veJerusarema wechiti, Izvi ndizvo zvinoronza Mambo Mwari: Ringira, inini ndiri muumbi wehari, ndinonasira kushata kunowira padera penyu, nokuronga mazano okumurwisa. Zvino tenderukai umwe ngaumwe wenyu kubva kunjira yake yakashata, munasirise njira dzenyu nezviito zvenyu.’

¹² Asi vanoti, ‘Azvidetseri chiro! Isusu tinozoteera urongwa hwedu, nesu umwe ngaumwe wedu unozoita kudai ngokukonza kwomwoyo wake wakashata.’ ”

Vanhu Vanoramba Mambo Mwari

¹³ Izvi ndizvo zvinoronza Mambo Mwari: “Bvunzai pakati pemadzinza kuti, ‘Ndiani wazwa zviro zvakadai ngeizvi? Mhandwe Isuraeri yaita chiro chakashata yaamho.

¹⁴ Chando cheRebhanoni chingagara chechierera kubva paruware mushango here? Mvura yayo inotonhora inoerera inobva kundau imweni iri kuretu ingapwa here?

¹⁵ Asi vanhu vangu vandiriyarwa, vanopisha mutombo unegwema rakanaka kuzvimwari zvokunyepa, vapumhunwa munjira dzavo, mumapato ekare nokuhamba munjira dzimweni, haiwa mumapato makuru,

¹⁶ vechiita kuti nyika yavo ityise chiro chinoridzirwa murudzi mhera nariini. Veshe vanopinda ngepasinde payo vanotyiswa vechidzungudza masoro avo.

¹⁷ Kudai ngedutu rinobva kumabvazuva ndinozovaparadza pamberi pemagaa. Ndinozovaonisa mushana wangu haiwa hope yangu, muzuva rokutambudzika kwavo kukuru.’ ”

Urongwa hwoKuda Kurwisa Jeremia

¹⁸ Zvino vakati, “Uyai, ngatiite urongwa hwokurwisa Jeremia; ngokuti mipango aizoperi kubva kuvapristi nokuti kupangwa kunobva kunevakangwara, nokuti izwi kubva kunevaprofeti. Uyai, ngatimurwise ngemazwi, tisapurutana kunyazwi ngaari mazwi ake.”

¹⁹ “Purutana kwendiri, O Mambo Mwari, uzwe izwi raavo vanorwisana neni.

²⁰ Kushata kunounzidzirwa ngezvakanaka here? Asi vatsira ndaramo yangu hunza. Karakadza kuema kwangu pamberi pako kuereketa zvakanaka ndivo, nokupetudza ushungu hwako kubva kwevari.

²¹ Ndizvo pinzai vana vavo munzara, vapirenyi kusimba reshoti; vakadzi vavo ngavafirwe ngavana vavo nevamuna vavo. Vamuna vavo ngavaurawe ngenhenda; majaha avo ngavaurawe ngeshoti muhondo.

²² Kuchema ngakuzwike kubva kumhatso dzavo, apo woounza genge padera pavo ngokukasira! Ngokuti vakatsa hunza kuti indibate, vakateya tsoka dzangu ngemirau.

²³ Asi iwewe, O Mambo Mwari, unozia bangano ravo reshe rokuda kundiuraya. Usakungurira kushata kwavo, usadzima zvishaishi zvavo kubva kuhope yako. Ngavarigwe pashi pamberi pako; ita izvi kwevari ngomukuwo wokunyangadzwa kwako.”