Jer. 17 - Bhaibheri Rakachena muChindau

Chishaishi noKuororwa kwaJudha

¹ Chishaishi chaJudha chakanyorwa ngepeni resimbi, rinemuromo wedhaimondi, chakanangurwa parusamba rwomwoyo yavo, nepadera penyanga dzemaarita avo,

² naapo vana vavo vechikarakadza ngemaarita avo nesika dzavo dzokudira dziri pasinde pemiti yakasvipira iri padera pezvimitunhu zvakareba,

³ pamitunhu iri munyika yorubaya. Upfumi hwako hweshe nemare yako ndinozozvipira kuti zvichakatwe, nendau dzako dzakakwirira ngendaa yokushaisha kwako kuri munyika yako yeshe.

⁴ Ngendaa yokuita kwako unozotorerwa nhaka yako yendakakupa; ndinozoita kuti ushandire magaa ako munyika yousikazii; ngokuti muushungu hwangu wakabaka muriro uwo unozobaka mhera nariini.

Mazwi Akawanda

⁵ Izvi ndizvo zvinoronza Mambo Mwari: “Ngaatukwe uwo unogonda munhu, unoita nyama kugwinya kwake, mwoyo wake unofuratira Mambo Mwari.

⁶ Unozodai ngepfiba riri murubaya, aazooni apo chakanaka choouya, unozogara kundau dzakaoma murubaya, munyika inemunyu, isina vanhu.

⁷ Unomuchena uwo unogonda munaMambo Mwari, uwo kugonda kwake ndiMambo Mwari.

⁸ Unozodai ngomuti wakasimwa pasinde pemvura, uwo unotambaradza nzinde dzawo pasinde porwizi. Usikazotyi kupisha apo kwauya, nemashakani awo anogara akasvipira; usikazotyi ngegore rokuoma, usikarekeri kubereka michero.

⁹ Mwoyo unochengedza kupinda zveshe, wakashata yaamho; ndiani ungauzia?

¹⁰ Inini Mambo Mwari ndinoringisisa mwoyo, ndinoedza zviri mukati kuti ndipe kumunhu umwe ngaumwe kudai ngenjira dzake nokudai ngemichero yezviito zvake. ”

¹¹ Kudai ngechikware chinofungatira mazanda echisikazi kubara ndizvo zvakaita uwo unounganidza upfumi ngenjira isikazi kururama, unozohusiya achipakati pemazuva ake nepakupera kwake unozoita benzi.

¹² O dendemaro rinouthende rakakwidzwa kubvira pakutanga, ndau yedu yokudirira yakachena!

¹³ O gonda raIsuraeri, O Mambo Mwari! Veshe vanokuramba vanozotsverudzwa, avo vanokusiya vanozonyorwa mumavhu, ngokuti vakasiya Mambo Mwari, chinyuka chemvura yokupona.

Jeremia Unokumbira Kudetserwa ndiMambo Mwari

¹⁴ Ndirape, O Mambo Mwari, neni ndinozorapwa; ndiponese neni ndinozoponeswa; ngokuti iwewe uri kukudza kwangu.

¹⁵ Ringira zvevanoti kwendiri, “Riri pari izwi raMambo Mwari? Ngariuye.”

¹⁶ Asi inini andizi kutiza kubva mukuita muushi mumushando wako, nokuti kuemurira zuva rokutambudzika. Iwewe unozia izvo zvakabuda kubva pamiromo yangu, zvaiya pamberi pehope yako.

¹⁷ Usandityisidzira; iwewe uri utiziro hwangu ngezuva rezvakashata.

¹⁸ Ngavatsverudzwe avo vanonditambudza, asi usaita kuti inini nditsverudzwe; ngavapere simba; ngokutya, asi inini ndisapera simba vaunzire zuva rokuparadzwa, vaparadze ngokuparadzwa kwakapetwa.

Ndaa yoKungwarira Sabatha

¹⁹ Izvi ndizvo zvinoronza Mambo Mwari kwendiri: “Enda wooema paMusiwo weVanhu, apo pevanopinda ndipo madzimambo aJudha, neapo pevanobuda ndipo, nepamisiwo yeshe yeJerusarema.

²⁰ Uti kwevari, ‘Izwai izwi raMambo Mwari, imwimwi madzimambo aJudha, navo veshe vaJudha, navo veshe vagari vomuJerusarema, avo vanopinda ngepamisiwo iyi.

²¹ Izvi ndizvo zvinoronza Mambo Mwari: ngendaa yokupona kwenyu ngwarai kuti musatwara mutwaro ngezuva reSabatha, nokuti kuupinza ngepamusiwo weJerusarema.

²² Nemwi musatwara mutwaro kubva nawo mumhatso dzenyu ngezuva reSabatha, nokuti kuita mushando weshe, asi remeredzai zuva rakachena reSabatha, kudai ngezvendakapanga madzibaba enyu.

²³ Asi avazi kupurutana, nokuti kukotamisa nzee dzavo, vakaomesa mitsipa yavo, kuti vasazwa, nokuti kuashira kudzidziswa.

²⁴ Asi kudai mwechinasa kupurutana kwendiri, unoronza Mambo Mwari, nemwi musapotera nomutwaro ngezuva reSabatha ngepamisiwo yedhorobha iri, asi muriremeredze zuva reSabatha rakachena, nemwi musaita mushando naumwe ngeiro zuva,

²⁵ zvino vanozopotera ngepamisiwo yedhorobha iri madzimambo nevakuru, vanogara padendemaro raDhavhidha, vakakwira mungoro nokugadha mahachi, nevakuru vavo, ivo nevakuru vamuna vaJudha, nevagari vomuJerusarema; nedhorobha iri rinozogarwa mhera nariini.

²⁶ Vanhu vanozouya kubva kumadhorobha aJudha, nokundau dzinotendenedza Jerusarema, kubva kunyika yaBhenjamini, kubva Shefera, kubva kunyika yezvimitunhu nokubani, vechiuya nemidiro yokupisha nemibairo nemidiro yezviyo nomutombo unegwema rakanaka, vechizviunza kumhatso yaMambo Mwari midiro yokubonga.

²⁷ Asi kuti musikapurutani kwendiri, musikaremeredzi zuva reSabatha rakachena nokusikatwara mutwaro mwechipinda ngepamisiwo yeJerusarema ngezuva reSabatha, zvino ndinozobasa muriro pamisiwo yaro, nawo unozopedza ngome dzeJerusarema usikazodzimwi.’ ”