Jer. 16 - Bhaibheri Rakachena muChindau

Kuda kwaMambo Mwari ngeNdaramo yaJeremia

¹ Izwi raMambo Mwari rakauya kwendiri rechiti,

² “Usazoroora mukadzi nokuti kubara vakororo nokuti vanasikana mundau iyi.

³ Ngokuti izvi ndizvo zvinoronza Mambo Mwari, ngendaa yevakororo nevasikana vanobarwa mundau iyi, nendaa yemadzimai akavabereka, nemadzibaba akavabara munyika iyi:

⁴ vanozofa ngenhenda dzinotyisa. Avazochemwi nokuti kuikwa; asi vanozodai ngemadisa padera penyika. Vanozopedzwa ngeshoti nenzara, nemiiri yavo yakafa inozoita kudya kweshiri dzomudenga, nokwezvikara zvomunyika.

⁵ “Ngokuti izvi ndizvo zvinoronza Mambo Mwari, usaenda mumhatso yokubonda, nokuti kuenda koochema nokuti kugomera ngendaa yavo, ngokuti ndatora kunyarara kwangu kubva kuvanhu ava, unoronza Mambo Mwari, rudo rwangu runenyasha nokukungurira.

⁶ Vakuru nevadoko veshe vanozofa munyika iyi; avazoikwi, apana naumwe unozovachema, akuna kuchekwa, nokuti kuparwa kwesoro kwevari.

⁷ Vanhu avazovaguriri chingwa mukuchema kwavo, kuvaembedzera ngendaa yevakafa; nokuti umwe ungavapa tsani yokumwa kuvaembedzera ngendaa yababa avo nokuti mai avo.

⁸ Auzopoteri mumhatso yedhiri, kugara navo kudya nokumwa.

⁹ Ngokuti izvi ndizvo zvinoronza Mambo Mwari wehondo, Mwari waIsuraeri: ringira, ndinozoita kuti izwi rokusheka, izwi rokudakara, izwi romukwambo neizwi romuroorwa rinyarare mundau iyi mumazuva enyu nomukuona kwenyu.

¹⁰ Naapo wooronzera vanhu ava mazwi aya eshe, navo vanoti kwouri, ‘Ngenyi Mambo Mwari aronza uku kushata kukuru kweshe tisu? Chiinyi kushata kwedu? Chiinyi chishaishi chedu chetashaisha kunaMambo Mwari, Mwari wedu?’

¹¹ Zvino unozoti kwevari, ‘Indaa yokuti madzibaba enyu akandisiya, unoronza Mambo Mwari, akateera zvimwari zvimweni, nokuzvishandira nokuzvidira; vandisiya nokusikangwarira mipango yangu;

¹² nendaa yokuti mwakaita kushata kukuru kwakapinda kwemadzibaba enyu; ngokuti, ringira, munohamba umwe ngaumwe, kuteera kukonza kwomwoyo wake wakashata, nokuramba kupurutana kwendiri.

¹³ Ndizvo ndinozomubvisa kuneiyi nyika kuenda kunyika yomusikazi kuizia, imwimwi nokuti madzibaba enyu; iyoyo munozodira zvimwari zvimweni masikati nousiku, apo pendisikazomuitiri nyasha.’

Kupetuka Kubva muUsungwa

¹⁴ “Ndizvo, ringirai, ngegwinyiso mazuva anouya, unoronza mambo Mwari, apo pasikachazoronzwi kuti, ‘Kudai ngezvaanopona Mambo Mwari, uwo wakabudisa vana vaIsuraeri kubva munyika yeEgipite,’

¹⁵ asi, Kudai ngezvaanopona Mambo Mwari, uwo wakabudisa vana vaIsuraeri kubva munyika yedera, nokubva kunyika dzeshe dzaakavadzingira. Ngokuti ndinozovapetudza kunyika yavo yendakapa kumadzibaba avo.

Kuororwa Kuri Kuuya

¹⁶ “Zvino ndinodaidza vabati vehove vazhinji, unoronza Mambo Mwari, navo vanozodzibata; navo vapedza ndinozodaidza vavhimi vazhinji, navo vanozovhima kubva pamutunhu umwe ngaumwe nepachimutunhu chimwe ngachimwe nomumapako emapuwe.

¹⁷ Ngokuti madziso angu anoringira njira dzavo dzeshe; adzizi kufishika kubva kuhope yangu, nokuti kushata kwavo hakuzi kudzimwa kubva kumadziso angu.

¹⁸ Kutanga ndinozohwirinzira kairi kushata kwavo nokushaisha kwavo; ngokuti vasvipisa nyika yangu ngemiiri yakafa yezviro zvinonyenyisa nezvinonyangadza zvemiedzaniso yavo, nokuzadza nhaka yangu ngezvinonyangadza zvavo.”

Mukumbiro waJeremia woKugonda muna Mambo Mwari

¹⁹ O Mambo Mwari, simba rangu, nebako rangu, utiziro hwangu ngezuva rokutambudzika, madzinza anozouya kwouri, echibva kumagumo enyika echiti, “Ngegwinyiso madzibaba edu akagara nhaka yemanyepo, nezvisina shwiro, nezvisikadetseri chiro.

²⁰ Munhu ungakona kudziitira zvimwari here, izvo zvisitori zvimwari?

²¹ Ndizvo, ringira, ngegwinyiso ndinozovadzidzisa, panguva ino ndichavadzidzisa simba rangu nokugwinya kwangu; navo vanozozia kuti zina rangu ndiMambo Mwari.”