Jer. 15 - Bhaibheri Rakachena muChindau

Kuparadzwa kweVanhu vaJudha

¹ Zvino Mambo Mwari wakati kwendiri, “Kunyazwi Mosi naSamueri vakaema pamberi pangu, asi mwoyo wangu aungakunukukiri kunevanhu ava. Vabvise pamberi pehope yangu, ngavaende.

² Naapo vanoti kweuri, ‘Tinozoenda kuri?’ Naapo unozovaronzera kuti, ‘Izvi ndizvo zvinoronza Mambo Mwari: Avo vakaemeserwa kufa ngenhenda ngavaende mukufa ngenhenda, naavo vakaemeserwa kufa ngeshoti ngavafe ngeshoti; naavo vakaemeserwa kufa ngenzara ngavafe ngenzara; naavo vakaemeserwa uhloko ngavaende muuhloko.’

³ Neni ndinozoemesa padera pavo mbeu murongomuna dzezvinoparadza,” unoronza Mambo Mwari: “Shoti yokuuraya, imbgwa dzokubaura, shiri dzomudenga, nezvikara zvomushango, kudya nokuparadza.

⁴ Ndinozoita kuti vanyenywe kuumambo hweshe hwenyika ngendaa yaManase mukororo waHezekia mambo waJudha,” ngendaa yaakaita muJerusarema.

⁵ Ndiani unozokuitira nyasha, O Jerusarema? “Nokuti ndiani unozokuchemera? Nokuti ndiani unozokupaukira kubvunza kuti wakadini?”

⁶ Mambo Mwari wakati, “Iwewe wandirasha, uri kuhwirira sure; ndizvo ndatambanudza nyara yangu kwouri nokukuparadza; ndaremba ngokumukungurira.

⁷ Ndavatsera ngorutsero pamisiwo yenyika; ndaita kuti vafirwe ngevanhu, ndaparadza vanhu vangu; avazi kutenderuka kubva kunjira dzavo.

⁸ Shirikadzi dzavo dzawandisa kupinda jecha romuruandhle; ndaunzira vanamai vemajaha muparadzi masikati machena; ndaita kuti kurwadziwa nokutyiswa kuwire padera pavo ngokukasira, nokutyisa kudzake padera pedhorobha.

⁹ Iye wakabereka vana vanomwe wapera simba; wabudisa mweya wake; zuva rake rapota achimasikati; wakatsverudzwa nokukangaidzwa. Nevasara vavo ndinozovapira kushoti pamberi pemagaa avo,” unoronza Mambo Mwari.

Jeremia Unogunun'unira Mambo Mwari

¹⁰ Ihehe kwendiri, mai angu, mwakandibara kuita munhu wokuambana nokuita hasha munyika yeshe! Andizi kumbokweretesa munhu kuti ndiuyirwe, nevanhu avazi kundikweretesa kuti vauyirwe; asi veshe vanondituka.

¹¹ Mambo Mwari wakati, “Chokwadi ndapindira kukugwinyisa mukupona kwako, kuti uite zvakanaka; ngegwinyiso ndapanga magaa padera pako ngomukuwo wezvakashata, nomukuwo wokutambudzika.

¹² Uripo ungagura simbi nethusi, simbi inobva dera here?

¹³ Upfumi hwako nemare yako ndinozozvipa kudai ngezvakachakatwa pasina mutengo, ngendaa yezvishaishi zvako zveshe, munyika yako yeshe.

¹⁴ Ndinozokuita kuti ushandire magaa ako kunyika yousikazii, ngokuti muushungu hwangu muriro wabaswa, unozopisha mhera nariini.”

¹⁵ “O Mambo Mwari, ndiwe unozia; ndikarakadze, ndihambire, undiunzidzire vanonditambudza. Mukusengerera kwako usandirasha kuretu; zia kuti ngendaa yako ndinotukwa.

¹⁶ Mazwi ako akaonwa, neni ndakaadya; nemazwi ako akaita kwendiri kudakara nokudakadzwa kwomwoyo wangu; ngokuti ndinodaidzwa ngezina rako, O Mambo Mwari, Mwari wehondo.

¹⁷ Andizi kugara pakati nokuti kudakara mumushongano wevanosheka; ndakagara ndega pashi peuremu wenyara yako, ngokuti waiya wandizadza ngoushungu.

¹⁸ Kurwadziwa kwangu kunoangira ngenyi, bonje rangu aripori, rinoramba kuporeswa? Ngegwinyiso iwewe wakadai ngechinyuka chokunyepera, nokudai ngemvura inopwa?”

¹⁹ Izvi ndizvo zvinoronza Mambo Mwari, “Kudai wechitenderuka, ndinozokupetudza, newe unozoema pamberi pangu. Kudai wechiteketesa zvakanaka, haiwa zvakashata, unozoita kudai ngomuromo wangu. Ndivo vanozopetuka kwouri, haiwa iwewe kupetuka kwevari.

²⁰ Neni ndinozokuita kunevanhu ava kudai ngorukumbati rwethusi; vanozorwa newe, asi avazokunyisi akadi, ngokuti ndinewe kukuponesa nokukununura,” unoronza Mambo Mwari.

²¹ “Ndinozokununura kubva kunyara yewakashata, nokukuripira kuti ubve munyara yevanotyisa.”