Jer. 14 - Bhaibheri Rakachena muChindau

Kuomerwa kweNyika Kunotyisa

¹ Izwi raMambo Mwari rakauya kunaJeremia ngendaa yokuomerwa kwenyika.

² “Judha rinochema nemisiwo yaro inongwendangwenda; vanoata pashi muchidima chakasvipa kakurutu, nokuchema kweJerusarema kunokwira.

³ Vakuru varo vanotuma varanda vavo koochera mvura; vanoguma kuzvinyuka, asi avaoni mvura; vanohwirira nezvidziyo zvisina mvura. Vanotsveruka nokukangaidzwa nokufukidza masoro avo.

⁴ Mavhu akamweka ngokuti kwaiya kusina mvura panyika. Varimi vakangaidzwa, vafukidza masoro avo.

⁵ Kunyazwi shoma yakabereka mwana murubaya inomusiya ngokuti akuna mwenje.

⁶ Mbongoro dzomushango dzinoema pandau dzakakwirira, pasina chiro, dzechifema dutu kudai ngemakava; madziso adzo anokorera kuona ngokuti apana mwenje.”

⁷ O Mambo Mwari, kunyazwi zvishaishi zvedu zvinopupura tisu kutiitire ndaa, chiita ngendaa yezina rako; ngokuti takahwirira sure kazhinji, takashaisha kwouri.

⁸ O Gonda raIsuraeri, muponesi wavo ngomukuwo wokutambudzika, ngenyi wechiita kudai ngomupara munyika iyi, nokudai ngomuhambi unopauka kuata usiku humwe?

⁹ Ngenyi wechidai ngomunhu wakangaidzwa, nokudai ngomunhu unesimba usikaponesi? Asi iwewe, O Mambo Mwari, uri mukati mwedu, nesu tinodaidzwa ngezina rako; usatisiya.

¹⁰ Izvi ndizvo zvinoronza Mambo Mwari ngendaa yevanhu vake, “Ngegwinyiso vakada kuhambahamba, avazi kubata tsoka dzavo; ndizvo Mambo Mwari aavaashiri; zvino unokarakadza zvishaishi zvavo echiorora kushaisha kwavo.”

¹¹ Mambo Mwari wakati kwendiri, “Usakumbirira ava vanhu, kuti vaone zvakanaka.

¹² Kunyazwi vanoera kudya, andizwi kuchema kwavo; kunyazwi vanopira mudiro wokupisha nomunikero, andizviashiri; asi ndinovapedza ngeshoti, ngenzara nenhenda.”

¹³ Zvino ndakati, “A Mambo Mwari, Mwari! Ringira, vaprofeti vanoti kwevari, ‘Amuzooni shoti, nokuti nzara; asi ndinozomupa kunyarara kwegwinyiso kundau iyi.’ ”

¹⁴ Zvino Mambo Mwari wakati kwendiri, “Vaprofeti vanoprofeta zvokunyepa ngezina rangu. Andizi kuvatuma, nokuti kuvapanga nokuti kuereketa kwevari. Vanoprofeta kwomuri chioniso nokufembera zvokunyepa, nechisina shwiro, nokuchengedzera kwemwoyo yavo.

¹⁵ Izvi ndizvo zvinoronza Mambo Mwari ngevaprofeti, vanoprofeta ngezina rangu, vasikazi kutumwa ndini, asi vanoti, ‘Akuzoapo shoti nokuti nzara kunyika iyi.’ Ngeshoti nenzara vaprofeti ava vanozopedzwa.

¹⁶ Nevanhu vevanoprofetera kwevari vanozokandirwa mumapato eJerusarema ngendaa yenzara neshoti. Akuzoapo naumwe kuvatsira, ivo pachavo, vakadzi vavo, vakororo vavo, nevanasikana vavo. Ngokuti ndinozodururira padera pavo kushata kwavo.”

¹⁷ Unozoronza kwevari iri izwi: “Madziso angu ngaaerere masodzi usiku nemasikati, usatendera kuti arekere, ngokuti mhandara, vanhu vangu, waremadzwa kakurutu, ngokuchaiwa kunotyisa vane chironda chakakura.

¹⁸ Dai ndechibuda kuenda kurubaya, ringira, varipo vaya vakaurawa ngeshoti! Dai ndechipotera mudhorobha, ringira, varipo vaya vanorwara ngenzara! Ngokuti veshe vaprofeti nevapristi vanohambahamba munyika vasikazii.”

Vanhu Vanopota Mambo Mwari

¹⁹ Mwarasha yaamho vaJudha here? Mweya wako unonyenya Zioni here? Ngenyi watichaira pashi, pasina kurapwa kwedu? Tinotsvaka kunyarara asi akuna chakanaka, tinoringira mukuwo wokutambiswa, asi ringira kutyiswa!

²⁰ O Mambo Mwari, tinotenda kushata kwedu nokushaisha kwemadzibaba edu, ngokuti takakushaishira.

²¹ Usatinyenya ngendaa yezina rako; usatsverudza chigaro chako choumambo chinouthende; karakadza, usagura chitenderano nesu.

²² Chiripo here chimwari chemadzinza pakati pezvimwari zvisina shwiro chingakona kunaisa mvura? Nokuti matenga angadzasa mvura here? Andiwepi here, Mambo Mwari, Mwari wedu? Taisa gonda redu peuri, ngokuti ndiwe unoita izvi zveshe.