Jer. 13 - Bhaibheri Rakachena muChindau

Bhande reJira

¹ Ndizvo izvi zvakaronza Mambo Mwari kwendiri, “Enda, utenge bhande rejira rorukangaza, urisungire pachiunu chako, asi usariisa mumvura.”

² Ndizvo ndakatenga bhande kudai ngeizwi raMambo Mwari, ndikariisa pachiunu changu.

³ Neizwi raMambo Mwari rakauya kwendiri ngokwechipiri rechiti,

⁴ “Tora bhande rounaro, riri pachiunu chako, umiruke, uende kurwizi runozwi Phara, urifishe apapo mubako rebuwe.”

⁵ Ndizvo ndakaenda, ndikarifisha paPhara, kudai ngezvaakandipanga Mambo Mwari.

⁶ Ngesure kwemazuva akawanda, Mambo Mwari akati kwendiri, “Miruka, uende Phara, ubvisepo bhande, rendakakupanga kufishapo.”

⁷ Ndizvo ndakaenda Phara, ndikatsa, ndikatora bhande kubva pandau pandakarifisha. Ringira, bhande raiya raora, risikachadetseri chiro.

⁸ Zvino izwi raMambo Mwari rakauya kwendiri rechiti,

⁹ “Ndizvo izvi zvinoronza Mambo Mwari, ‘Ngenjira iyi, ndinozooresa kudzikudza kwaJudha nokudzikudza kukuru kweJerusarema.

¹⁰ Ava vanhu vakashata vanoramba kuzwa mazwi angu, vanohamba ngemisikazwa mumipinimidzo yomwoyo yavo, vechiteera zvimwari zvimweni kuzvishandira nokuzvidira, ndivo vanozodai ngebhande iri risikachadetseri chiro.

¹¹ Ngokuti kudai ngebhande rinobatira pachiunu chomunhu, ngokudaro ndakaita kuti mhatso yeshe yaIsuraeri nemhatso yeshe yaJudha dzibatire kwendiri,’ unoronza Mambo Mwari, ‘kuti vaite vanhu vangu nokuita mbiri, kukudzwa, nokuirikidzwa. Asi avazi kupurutana.’

Jomeya reVhini

¹² “Ndizvo iwewe unozoereketa izwi iri kwevari kuti, ‘Izvi ndizvo zvinoronza Mambo Mwari, Mwari waIsuraeri: jomeya reshe rinozozadzwa ngevhini.’ Navo vanozoti kwouri, ‘Unopinimidza kuti atizii here ngechokwadi kuti jomeya reshe rinozadzwa ngevhini?’

¹³ Zvino unozoti kwevari, ‘Izvi ndizvo zvinoronza Mambo Mwari: Ringira, ndichazadza ngokudhakwa veshe vanogara munyika ino, madzimambo anogara padendemaro raDhavhidha, vapristi, vaprofeti, navo veshe vanogara muJerusarema.

¹⁴ Ndinozovadhumanisa umwe neumweni, vabereki nevana pamwepo,’ unoronza Mambo Mwari. ‘Andizokunguriri nokuti kuponesa nokuti kuitira nyasha asi kuvaparadza.’ ”

Jeremia Unopanga ngendaa yoKudzikudza

¹⁵ Purutanai muzwe; musadzikudza, ngokuti Mambo Mwari waereketa.

¹⁶ Irikidzai Mambo Mwari, Mwari wenyu, asati aunza chidima, dzisati dzapumhunwa tsoka dzenyu padera pemitunhu inechidima; apo muchatsvaka kujeka, unokupindura kuita bvute rokufa, nokuita chidima chakasvipa.

¹⁷ Asi kudai musikazopurutani, mweya wangu unozochema kundau dzakafishika ngendaa yokudzikudza kwenyu; madziso angu anozochema kakurutu, nemasodzi angu anozoerera, ngokuti zvifuyo zvaMambo Mwari zvatorwa kuitwa hloko.

¹⁸ Ronzai kunamambo nokuna mai ake, “Dzipfaisei, mugare pashi; ngokuti dzungudza renyu rakanaka rawa pashi kubva pasoro renyu.”

¹⁹ Madhorobha okubani akonywa, apana naumwe unoabeura; Judha weshe unotorwa kuitwa hloko, unotorwa yaamho kuitwa hloko.

²⁰ Mirudza madziso ako uone avo vanobva dera Zviri pari zvifuyo zvewakapuwa, zvifuyo zvako zvaiya zvakanaka?

²¹ Unozotinyi apo vaemesa kuita mukuru padera pako uwo wewakadzidzisa kuita mungani wako, kuti atonge padera pako? Auzorwadziwi here kudai ngomudzimai wobereka?

²² Nokudai wechiti mumwoyo mwako, “Ngenyi izvi zviro zvauya padera pangu?” Indaa youwandu hwezvishaishi zvako zvokusimira zvako zvafukurwa nezvisisinho zvako zvaremadzwa.

²³ MuEthiopia ungatsandura here ganda rake, nokuti khamba ringatsandura here maara aro? Zvino iwewewo ungakona kuita zvakanaka, wakarovedzera kuita zvakashata.

²⁴ Ndizvo ndinozokuparadza kudai ngemakoto anotorwa ngedutu rinobva murubaya.

²⁵ Ichi ndicho chikoaniswa chako, chewakapimirwa ndini, unoronza Mambo Mwari, ngokuti wandiriyarwa, ukagonda manyepo.

²⁶ Inini ndemene ndinozofukura chokusimira chako padera pehope yako, nokutsveruka kwako kunozooneka.

²⁷ Ndaona zvinyangadzo zvako nokuomba kwako, nebope rokuomba, nouhure hwako hunotsverudza pazvimitunhu mushango. Ihehe kwouri, O Jerusarema! Metsa riini iwewe usati wacheneswa?