Jer. 12 - Bhaibheri Rakachena muChindau

Jeremia Unobvunza Mambo Mwari

¹ “Wakarurama, O Mambo Mwari, apo ndinounza ndaa yangu pamberi pako; asi nditendere kuereketa newe ngendaa yangu. Ngenyi njira yevakashata yechibudirira? Ngenyi veshe vanoshanda ngokuchengedzera vechigarisika?

² Iwewe wakavasima, navo vakatsira nzinde, vanokura, nokubereka michero; uri pasinde pemiromo yavo, asi uri kuretu kubva kumwoyo yavo.

³ Asi iwewe, O Mambo Mwari, unondizia; unondiona, unoedza mwoyo wangu, mwoyo wangu uri kwouri. Kweya uvabudise kubanze kudai ngemakwai koourawa. Uvanasirire zuva rokuurawa.

⁴ Nyika inozobonda mukuwo wakadini nezvinokura zvakasvipira zvemarubaya zveshe zvinozofota mukuwo wakadini? Ngendaa yokushata kweavo vanogaremwo mhuka neshiri zvapedzwa, ngokuti vanoti, ‘Aazooni magumo edu.’

⁵ Kudai waremba ngokurumba nevanorumba ngetsoka, ndizvo ungaita marumbirenyi nemahachi? Nokudai wechiwa munyika yokunyarara younogonda kweiri, ndizvo unozoitenyi apo wechihamba mugwasha reJorodhani?

⁶ Ngokuti kunyazwi hama dzako, nevemhatso yababa ako, kunyazwi vakaita ngokuchengedzera kwouri; vanokudaidzira; usavagonda, kunyazwi vechiereketa mazwi akanaka kwouri.”

Kutambudzika kwaMambo Mwari ngendaa yeVanhu vake

⁷ Ndasiya mhatso yangu, ndarasha nhaka yangu; ndakapa mudikani womwoyo wangu munyara dzemagaa ake.

⁸ Nhaka yangu kwendiri yakadai ngemhondoro iri mugwasha, inondibhongera; ndizvo ndakainyenya.

⁹ Nhaka yangu yaita kwendiri kudai ngegodzi rinokara here? Makodzi akaitendenedza kumarutii eshe here? Endai muunganidze mhuka dzeshe dzomushango, ngadziuye dzimudye.

¹⁰ Vaushi vakawanda vaparadza munda wangu wemivhini, vatsikatsika pashi petsoka chikoaniswa changu, vaita kuti chikoaniswa changu chinodakadza chiite shango risina chiro.

¹¹ Vachiita dongo, dongo rinobonda kwendiri. Nyika yeshe yaizwe dongo, asi apana naumwe unopinimidza ndiyo.

¹² Vaparadzi vakwira padera pendau dzeshe dzakakwirira dzeshango; ngokuti shoti yaMambo Mwari inovapedza kubvira kumagumo amwe enyika kuenda kuneamweni; apana naumwe unozoane kunyarara.

¹³ Vakakusha koroni, asi vakakukura minzwa; vakadzipira mukurembesa, asi avazi kuuyirwa ngechiro. Vanozotsverudzwa ngezviyo zvavo ngendaa youshungu hunotyisa hwaMambo Mwari.

Chigondiso chaMwari kuVaakirwana vaIsuraeri

¹⁴ Izvi ndizvo zvinoronza Mambo Mwari ngevaakirwana vangu veshe vakashata, avo vanogwama nhaka yendakaita kuti vanhu vangu Isuraeri vaigare: “Ringira, ndinozovabvita kubva munyika yavo, nokubvita mhatso yaJudha kubva pakati pavo.

¹⁵ Naapo ndapedza kubvita ndinozovaitirazve nyasha nokuvaunzazve, umwe ngaumwe kunhaka yake nokunyika yake.

¹⁶ Nazvino, kudai vechizodzidzira njira dzevanhu vangu ngomwoyo yavo yeshe, kupika ngezina rangu kuti, ‘Kudai ngezvaanopona Mambo Mwari,’ kudai ngezvevakadzidzisa vanhu vangu kupika ndiBhaari, zvino vanozogarisika pakati pevanhu vangu.

¹⁷ Asi kudai dzinza reshe risikazopurutani, ndinozoribvita yaamho nokuparadza dzinza iro,” unoronza Mambo Mwari.