Jer. 11 - Bhaibheri Rakachena muChindau

Jeremia neChitenderano

¹ Izwi rakauya kunaJeremia rechibva kunaMambo Mwari rechiti,

² “Izwa mazwi echitenderano ichi, uerekete kuvanhu vaJudha, nokuvagari vomuJerusarema.

³ Unozoti kwevari, izvi ndizvo zvinoronza Mambo Mwari, Mwari waIsuraeri: Ngaatukwe munhu uwo usikapurutani mazwi echitenderano ichi,

⁴ ichi chendakapanga madzibaba enyu ngeiro zuva rendakavabudisa kubva munyika yeEgipite, kubva muchoto chesimbi ndechiti, ‘Purutanai izwi rangu nokuita kudai ndizvo zveshe zvandakamupanga. Ndizvo munozoita vanhu vangu, neni ndinozoita Mwari wenyu,

⁵ kuti ndizarise kupika kwendakaita kumadzibaba enyu, kuvapa nyika inoerera mukaka nouchi, kudai ngezvinoitika nyamashi.’ ” Zvino ndakapingura, ndikati, “Ngazviitike, Mambo Mwari.”

⁶ Mambo Mwari wakati kwendiri, “Daidzira mazwi aya eshe mumadhorobha aJudha nomumapato eJerusarema wechiti, ‘Izwai mazwi echitenderano ichi nokuaita.’

⁷ Ngokuti ndakangwadza yaamho madzibaba enyu ngeiro zuva randakavabudisa kubva munyika yeEgipite, ndechivangwadza ngokuangira kunyazwi metsa nanyamashi ndechiti, ‘Purutanai izwi rangu.’

⁸ Asi avazi kupurutana nokuti kuteya nzee dzavo, asi vakahamba umwe ngaumwe mumupinimidzo womwoyo wake wakashata. Ndizvo ndakaunza padera pavo mazwi eshe echitenderano endakavapa kuti vaite, asi avazi kuaita.”

⁹ Zvino Mambo Mwari wakati kwendiri, “Mweya wokumukirana unooneka pakati pevanhu vaJudha nepakati pevagari veJerusarema.

¹⁰ Vahwirira mukushata kwemadzibaba avo ekaretu, avo vakaramba kupurutana mazwi angu; vakateera zvimwari zvimweni kuzvidira; vemhatso yaIsuraeri nevemhatso yaJudha vagura chitenderano changu chendakasunga nemadzibaba avo.

¹¹ Ndizvo izvi, ndizvo zvinoronza Mambo Mwari, ‘Ringira, ndinozounza kushata padera pavo ukwo kwevasikazokoni kutiza; kunyazwi vanozodaidzira kwendiri, andizovapurutani.

¹² Zvino madhorobha aJudha nevagari veJerusarema vanozoenda, vanozodaidzira kuzvimwari zvevanopira midiro yomutombo wokupisha unegwema rakanaka, asi azvizovaponesi akadi ngomukuwo wokutambudzika.

¹³ Ngokuti kudai ngouwandu hwemadhorobha enyu zvakawandawo kudaro zvimwari zvenyu, O Judha; kudai ngouwandu hwemapato eJerusarema akawandawo kudaro emwakaemesa anotsverudza maarita okupishira mutombo kunaBhaari.’

¹⁴ Asi iwewe, usakumbirira ava vanhu, nokuti kudaidzira, nokuti kupota ngendaa yavo, ngokuti andizopurutani ngomukuwo wevanodaidzira kwendiri ngendaa yokutambudzika kwavo.”

¹⁵ “Mudikani wangu chiinyi chaachinacho mumhatso yangu, apo akaomba nevazhinji? Mhiko zhinji nenyama yokupira zvingadusa kuparadzwa kwako here? Apo unoita zvakashata unodakara here?

¹⁶ Mambo Mwari wakakudaidza kuti muorivhi wakasvipira, wakanaka, noune michero yakanaka; asi ngokutinhira kukurutu kwechimupupuri unozobasa muriro padera pawo, nematai awo anozopedzwa.

¹⁷ Mambo Mwari wehondo, uwo wakakusima, wakaronza zvakashata ndiwe, ngendaa yokushaisha kwemhatso yaIsuraeri neyaJudha kwevakaita, vakamusa ushungu hwangu ngokupisha mutombo kunaBhaari.”

Urongwa hwoKuuraya Jeremia

¹⁸ NdiMambo Mwari wakandiziisa, neni ndikazvizia; zvino wakandionisa zviito zvavo zvakashata.

¹⁹ Asi ndaiya ndakadai ngekakwai kakapfaa kanounzwa koourawa; neni ndaiya ndisikazii kuti vanoda kundimukira, vakaita urongwa vechiti, “Ngatiparadze muti uyu nemichero yawo, ngatimuuraye kuti abve munyika yevanopona, kuti zina rake risachazokarakadzwa ndiro.”

²⁰ “Asi, O Mambo Mwari wehondo, uwo unotonga ngokururama, unoedza mukarakadzo nomwoyo, ngandione kuunzidzira kwako padera pavo ngokuti kwouri ndakaisa ndaa yangu.”

²¹ Ndizvo izvi zvinoronza Mambo Mwari ngevanhu veAnathothi, avo vanotsvaka kukuuraya vechiti, “Usazoprofeta ngezina raMambo Mwari kuti usafa ngenyara dzedu.”

²² Ndizvo izvi zvinoronza Mambo Mwari wehondo, “Ringira, ndinozovaorora; majaha anozofa ngeshoti; vakororo vavo nevanasikana vavo vanozofa ngenzara;

²³ apana naumwe wavo unozosara. Ngokuti ndinozounza kuparadzwa padera pevanhu vaAnathothi, gore rokuororwa kwavo.”