Jer. 10 - Bhaibheri Rakachena muChindau

Kudira Miedzaniso noKudira kweGwinyiso

¹ Izwai izwi raanoereketa Mambo Mwari kwemuri, O mhatso yaIsuraeri.

² Izvi ndizvo zvinoronza Mambo Mwari, “Musadzidzira njira yevemadzinza, nokuti kupera simba ngezvioniso zvomudenga; ngokuti madzinza anopera simba ndizvo.

³ Ngokuti mitoo yevanhu inonyepa; muti unotemwa kubva mugwasha, unotsetswa ngesanho, mushando wenyara dzomutsetsi.

⁴ Vanhu vanounemesa ngesirivha nomukore; vanoukohomera ngezvipikiri nehamera kuti isatsukunuka.

⁵ Miedzaniso yakadai ngezungazunga rokudzinga makunguwo mumunda wemagaka, aikoni kuereketa; inotwarwa, ngokuti aikoni kuhamba. Musaitya, ngokuti aikoni kuita zvakashata, nokuti kuita zvakanaka.”

⁶ Akuna naumwe wakadai ndiwe, O Mambo Mwari; uri mukuru, nezina rako iguru musimba.

⁷ Ndiani usikakutyi, O mambo wemadzinza? Ngokuti kutyiwa ngokwako; pakati pavo veshe vakangwara vemadzinza, nomukati mwoumambo hwavo hweshe, akuna naumwe wakadai ndiwe.

⁸ Asi veshe mabungumupee nemapenzi. Chidzidzo chinoitwa ngemiedzaniso achinaki kupinda chemuti.

⁹ Sirivha yakapfurwa yakaunzwa kubva Tharshishi, nomukore kubva Ufazi. Mushando womupfuri nowenyara dzomuumbi; zvinopfekeswa ngezvakasvipirika nezvakatsvukuruka; zveshe zviri mushando wevamuna ngwazi.

¹⁰ Asi Mambo Mwari ndiye Mwari wegwinyiso, ndiMwari unopona, naMambo wemhera nariini. Paushungu hwake nyika inohuta, madzinza aakoni kuemerera ushungu hwake.

¹¹ Izvi ndizvo zvounoronza kwevari, “Zvimwari zvisikazi kusika matenga nenyika zvinozopera munyika nokubva pashi pematenga.”

Nduyo yoKukudza Mwari

¹² Ndiye wakasika nyika ngesimba rake, wakaemesa nyika ngoungwaru hwake, ngokuzwisisa kwake wakatambanudza matenga.

¹³ Naapo anoereketa izwi rake, kuripo kutinhira kwemvura mudenga, naye unoita kuti mhute ipwititike kubva kumagumo enyika. Unoita mheni nemvura nokubudisa dutu kubva mudura rake.

¹⁴ Munhu weshe uri bungumupee mukuzia kwake; mupfuri weshe unotsverudzwa ngemiedzaniso yake, ngokuti miedzaniso yake ngeyokunyepera, amuna mweya wokufema mukati mwayo.

¹⁵ Aina shwiro, mishando yokuchengedzera; ngomukuwo wokuororwa kwayo inozopera.

¹⁶ Chikoaniswa chaJakobe achizi kudai ndiyo akadi, ngokuti ndiye Mururi wezviro zveshe, naIsuraeri idzinza renhaka yake; Mambo Mwari wehondo ndiro zina rake.

Kubatwa Kunouya

¹⁷ Unganidzai mitwaro yenyu kubva pashi, O imwimwi munogara pashi pokukombwa!

¹⁸ Ngokuti ndizvo izvi zvinoronza Mambo Mwari: “Ringirai, ndinozorasha kubanze avo vanogara munyika iyi ngouyu mukuwo, ndichaunza dambudziko padera pavo, kuti vazvione.”

¹⁹ “Ihehe kwendiri ngendaa yokuremadzwa kwangu! Ronda rangu rakakura. Asi ndakati, ‘Chokwadi uku kuororwa kwangu, kunotamika kuti ndikutware.’

²⁰ Tende rangu raparadzwa, nemapote angu eshe adamburwa; vana vangu vandisiya, apachina; apachina naumwe wokutambanudzazve tende rangu, nokuemesa machira angu omukati mwetende.”

²¹ “Ngokuti vaushi mabungumupee, avabvunzi Mambo Mwari; ndizvo avazi kubudirira nezvifuyo zvavo zveshe zvapararira kweshe.

²² Izwai, bope! Purutana, rinouya, bope guru rinobva kunyika yedera, kuita kuti madhorobha aJudha aite matongo, bako remakava anotyisa.”

²³ Ndinozia, O Mambo Mwari, kuti njira yomunhu aisiri musimba rakepi; munhu paanohamba aangatungamiriri zvitsiko zvake.

²⁴ O Mambo Mwari, nditonge, asi munditonge ngechipimo chokururamisa; haiwa muushungu hwako, ngokuti ungandiparadza.

²⁵ Durura ushungu hwako padera pemadzinza asikakuzii, nepadera vanhu vasikadaidzi zina rako; ngokuti vakaparadza Jakobe, vakamuparadza nokumupedza, vakaita kuti ugaro hwake huite matongo.