Jer. 1 - Bhaibheri Rakachena muChindau

Jeremia

¹ Mazwi aJeremia, mukororo waHirikia, wevapristi vaiya muAnathothi, munyika yaBhenjamini.

² Kwaari izwi raMambo Mwari rakauya ngemazuva amambo Josia, mukororo waAmoni weJudha, ngegore regumi nematatu okutonga kwake.

³ Rakauyazve ngamazuva amambo Jehoiakimu, mukororo waJosia weJudha, metsa kuguma gore regumi narimwe ramambo Zedhekia mukororo waJosia weJudha, metsa mukuwo wokutorwa kweJerusarema kuitwa hloko ngomwedzi wechishanu.

Kudaidzwa kwaJeremia

⁴ Zvino izwi raMambo Mwari rakauya kwendiri rechiti,

⁵ “Ndisati ndakuumba mundani, ndaikuzia; usati wabarwa, ndakakuchenesa, ndikakuemesa kuti uite muprofeti kumadzinza.”

⁶ Zvino ndakati, “A, Mambo Mwari, Mwari! Ringira, ngegwinyiso andikoni kuereketa, ngokuti ndiri mwana mudoko.”

⁷ Asi Mambo Mwari wakati kwendiri, “Usaronza kuti, ndiri mwana mudoko; ngokuti unozoenda kuneavo veshe vendinozokutuma kwevari, newe unozoereketa cheshe chendinozokupanga.

⁸ Usatye hope dzavo, ngokuti inini ndinewe kukununura,” unoronza Mambo Mwari.

⁹ Zvino Mambo Mwari wakatambanudza nyara yake, akagwama muromo wangu. NaMambo Mwari wakati kwendiri, “Ringira, ndaisa mazwi angu mumuromo wako.

¹⁰ Wona, nyamashi ndakuemesa padera pemadzinza nepadera poumambo, kubvita nokuputsa, kuparadza nokudzasa pashi, kuaka nokusima.”

Zvioniso Zviiri

¹¹ Izwi raMambo Mwari rakauya kwendiri rechiti, “Jeremia, unoonenyi?” Neni ndakati, “Ndinoona dai romuti womuarimondi.”

¹² Zvino Mambo Mwari wakati kwendiri, “Wanasa kuona; ngokuti ndinozoringisisa izwi rangu kuriita.”

¹³ Izwi raMambo Mwari rakauya kwendiri ngokwechipiri rechiti, “Unoonenyi?” Ndakati, “Ndinoona hari inoira, nomuromo wayo wechibva kuringira dera.”

¹⁴ Zvino Mambo Mwari wakati kwendiri, “Kushata kunozobva ngedera kuguma padera pevanhu veshe venyika.

¹⁵ Ngokuti, ringira, ndinodaidza marudzi eshe oumambo hwedera,” unoronza Mambo Mwari; “Navo vanozouya, vanozoemesa umwe ngaumwe dendemaro rake pamisiwo yeJerusarema, nepamarukumbati eshe aro anoritendenedza, nokumadhorobha eshe aJudha.

¹⁶ Ndinozoronza kutonga kwangu kwevari ngendaa yokushata kwavo kweshe, avo vakandisiya, vakapisha mutombo unegwema rakanaka pamberi pezvimwari zvimweni, nokudira mishando yenyara dzavo.

¹⁷ Asi iwewe, sunga chiunu chako, umiruke, uerekete kwevari zveshe zvendinokupanga. Usakaruka pamberi pavo, nokuti ndinozokukarudza pamberi pavo.

¹⁸ Ngokuti, ringira, ngeiri zuva ndakakuita kuti udai ngedhorobha rakashosherwa, nokudai ngesika yesimbi, nokudai ngerukumbati rwethusi kunyika yeshe, kumadzimambo aJudha nokuvatongi vayo, nokuvapristi vayo, nokuvanhu venyika.

¹⁹ Vanozorwa newe; asi avazokunyisi akadi, ngokuti ndinewe kukununura,” unoronza Mambo Mwari.