Jakobe 5 - Bhaibheri Rakachena muChindau

Nyowedzo kuMakurudza

¹ Uyai zvino, imwimwi makurudza, mucheme nokuboorera ngamadambudziko anozouya padera penyu.

² Upfumi hwenyu hwaora nezvokufuka zvenyu zvadyiwa ngounundu.

³ Mukore wenyu nesirivha yenyu zvaane chinguraurwe, nechinguraurwe chazvo chinozoita chapupu chokumuitira ndaa, nacho chinozodya nyama yenyu kudai ngomuriro. Mwakadziunganidzira upfumi hwenyu mumazuva okugumisira.

⁴ Ringira musharo wevashandi avo vakacheka minda yenyu, wemwakasara nawo musikazi kubhadhara ngourimbwi, unodaidzira nokudaidzira kwaavo vakacheka kwakazwika munzee dzaMambo wehondo.

⁵ Mwakararama munyika mukushadaya nomukudakara; mwakakodza mwoyo yenyu ngezuva rokuuraya.

⁶ Mwakamurasha nokumuuraya uwo wakarurama, uwo usikarwisani nemwi.

Kusengerera noKukumbira

⁷ Ndizvo sengererai, hama, metsa kuuya kwaMambo. Wonai murimi unogarira michero inomutengo mukuru yenyika, echisengerera, metsa iashire mvura yokuamba neyokugumisira.

⁸ Nemwiwo itai vanosengerera kudaro. Tsimisai mwoyo yenyu, ngokuti kuuya kwaMambo kwaapasinde.

⁹ Hama, musavhuruvhutirana umwe kunoumweni, kuti musazotongwa. Ringirai mutongi unoema pamisiwo!

¹⁰ Hama, kudai ngechionero chokutambudzika nokusengerera, ashirai vaprofeti vakaereketa ngezina raMambo.

¹¹ Ngegwinyiso tinoti vanomuchena avo vakasengerera. Mwakazwa ngokusengerera kwaJobe, mwakaona kupedzisira kwaMambo, kuti Mambo wakazara ngokukungurira nenyasha.

¹² Asi kupinda zveshe, hama dzangu, musazopika, kunyazwi ngedenga nokuti ngenyika nokuti ngokupika kumweni, asi itai kuti, “Eya” wenyu aite eya, na “Haiwa” wenyu aite haiwa, kuti musapinda mukutongwa.

Mukumbiro woKugonda

¹³ Uripo here pakati penyu unotambudzika? Ngaakumbire. Uripo here pakati penyu unodakara? Ngaaembe nduyo yokukudza.

¹⁴ Uripo here pakati penyu unorwara? Ngaadaidze vakuru vechiara, ngavamukumbirire, vechimudzodza ngemafuta ngezina raMambo.

¹⁵ Mukumbiro wokugonda unozoponesa unorwara, naMambo unozomumusa; kudai akaita zvishaishi, zvinozorekererwa kwaari.

¹⁶ Ndizvo reurirai zvishaishi zvenyu umwe kunoumweni, mukumbirirane umwe kunoumweni, kuti mutambiswe. Mukumbiro womunhu wakarurama une simba guru mukushanda kwawo.

¹⁷ Erija waiya munhu ngechibarirwe waiya akadai tisu, naye wakakumbira kakurutu kuti isazonaya, akuzi kunaya makore matatu nemwedzi mitanhatu.

¹⁸ Wakakumbirazve, nedenga rakanayisa mvura nenyika yakabereka michero yayo.

¹⁹ Hama dzangu, kudai aripo pakati penyu unopauka kubva kugwinyiso noumwe echimutenderudza,

²⁰ munosisira kuzia kuti kunyazwi ndiani unotenderudza mushaishi kubva mukupauka kwake, unozoponesa mweya womushaishi kubva murufu, naye unozofukidza zvishaishi zvakawanda.