Jakobe 4 - Bhaibheri Rakachena muChindau

Ukama neNyika

¹ Kunobva pari kuambana nehasha pakati penyu? Azvibvi kuzvidisiso zvokuemura kwenyu zvinorwisana munhengo dzenyu here?

² Munoemura chiro nemwi musina; ndizvo munouraya. Munoemura chiro nemwi musikakoni kuchihanira; ndizvo munoambana nokurwisana. Amuna, ngokuti amukumbiri.

³ Munokumbira musikaashiri, ngokuti munoshaisha kukumbira, kuti muzvishandise muzvidisiso zvenyu zvokuemura.

⁴ Imwimwi vaombi! Amuzii here kuti ukama nenyika ugaa naMwari? Ndizvo kunyazwi ndiani unoda kuita ukama nenyika, unodziita gaa raMwari.

⁵ Munopinimidza here kuti zvinyorwa zvinoereketa zviro zvisina shwiro zvinoti, “Mweya wakaita kuti ugare mukati mwedu unoshuwira ndurumwa here?”

⁶ Asi unopinda kutipa nyasha dzakawanda; ndizvo zvinoti, “Mwari unorwisana nevanodzikudza, asi unoitira nyasha kunevakapfaa.”

⁷ Ndizvo dzipfaisei pashi paMwari. Irwai naDhiabhorosi, naye unozomutiza.

⁸ Kwedzerai pasinde naMwari, naye unozokwedzera pasinde kwomuri. Shambai nyara dzenyu, imwimwi vashaishi, muchenese mwoyo yenyu imwimwi munemipinimidzo miiri.

⁹ Boorerai, tsumbai nokuchema. Kusheka kwenyu ngakutsanduke kuita kutsumba, nokudakara kwenyu kuita kudzimbirwa.

¹⁰ Dzipfaisei pamberi paMambo naye unozomukurisa.

Kunyowedzwa ngendaa yoKutonga Vamweni

¹¹ Hama, musareyana. Kunyazwi ndiani unoreya umweni, nokuti kutonga umweni wake, unoereketa kurwisana neMipango, naye unotonga Mipango. Asi kudai wechitonga Mipango, auri muiti weMipangopi, asi mutongi.

¹² Umwe ega uri mupi weMipango nomutongi, uwo unesimba rokuponesa nokuparadza. Asi iwewe urianani unotonga muakirwana wako?

Kunyowedzwa ngendaa yoKuganza

¹³ Uyai zvino, imwimwi munoti, “Nyamashi nokuti mangwani tinozoenda kudhorobha rakatikuti, tipedze gore tiriyo, techitengesa tione zvokuuyirwa ndizvo.”

¹⁴ Imwimwi amuzii zvinozoitika nechimangwani. Chiinyi kupona kwenyu? Ngokuti muri mhute inooneka mukuwo mudoodoko, naapo inoparara.

¹⁵ Ngokuti mwaisisira kuronza kuti, “Kudai Mambo echizotenda, tinozorarama nokuita ichi nokuti icho.”

¹⁶ Asi zvino munodziganzisa mukudzikudza kwenyu. Kweshe kudziganzisa kwakadaro kwakashata.

¹⁷ Weshe, zvino, unozia kuita zvakanaka naye asikazviiti, kwaaari kushaisha.