Jakobe 3 - Bhaibheri Rakachena muChindau

Kubata Rurumi

¹ Hama dzangu, musaita vadzidzisi vazhinji, mwechizia kuti tinozoashira kutongwa kwakapinda kurema.

² Ngokuti isusu teshe tinoshaisha ngezviro zvakawanda. Kudai aripo usikashaishi pamazwi, ndiye munhu wakaperera, unokona kubata muiri weshe nawo.

³ Zvino kudai techiisa mikhayo mumiromo yemahachi, kuti atipurutane, tinotungamirira muiri wawo weshe.

⁴ Ringirai ngarava, kunyazwi dzakanyakura kudini, dzinohambiswa ngedutu rine simba, dzinotenderudzwa ngechikombe apo paanoda muhambisi wengarava kuti aende.

⁵ Ndizvo rurumi inhengo doodoko, narwo runoganza zvakakura. Wonai kukura kwakaita gwasha rinopishwa ngomuriro wakatsonga!

⁶ Rurumi muriro. Rurumi inyika yakazara ngokushata pakati penhengo dzedu; runosvipisa muiri weshe, runopisha njira yeshe yokupona, narwo runopishwa pacharwo ngomuriro weGehena.

⁷ Ngokuti mbeu dzeshe dzezvikara nedzeshiri nedzezvinotamanda nezviri muruandhle zvinopeteka, nazvo zvakapetwa ngevanhu,

⁸ asi apana munhu ungapeta rurumi, ndirwo chiro chakashata chisikapeteki, chakazara ngoukaira unouraya.

⁹ Ndirwo tinokudza Mambo naBaba, ndirwozve tinotuka vanhu vakasikwa ngomutodzaniso waMwari.

¹⁰ Kubva pamuromo umwewo panobuda kubonga nokutuka. Hama dzangu, azvisisiri kuti izvi zviitike kudaro.

¹¹ Chinyuka chinobudisa here ngomuromo umwe mvura inotapira neinovava?

¹² Hama dzangu, muonde ungabereka here maorivhi, nokuti muvhini ungabereka here maonde? Zve, mvura inemunyu aingakoni kubudisa inotapira.

Ungwaru Unobva muDenga

¹³ Ndiani wakangwara nounozwisisa pakati penyu? Ngaaonise ngokupona kwake kwakanaka mishando yake mukupfaa kwoungwaru.

¹⁴ Asi kuti munendurumwa inovava nokudisisa kwakashata mumwoyo mwenyu, musaganza, musanyepera gwinyiso.

¹⁵ Ungwaru hwakadaro andihwopi hunobva mudenga, asi ngohwomunyika, husina mweya, ngehwemadhimoni.

¹⁶ Ngokuti apo pane ndurumwa nokudisisa kwakashata, paripozve kukangaidzwa nezviito zveshe zvakashata.

¹⁷ Asi ungwaru hunobva mudenga kutanga hwakaperera, zve, hunokunyarara, hwakapfaa, hunoreruka kupotwa, hwakazara ngenyasha nemichero yakanaka, husina mukheto, husina kudziitisa.

¹⁸ Nemichero yokururama inokushwa mukunyarara ngaavo vanoita kunyarara.