Jakobe 2 - Bhaibheri Rakachena muChindau

Kunyowedzwa ngendaa yoMukheto

¹ Hama dzangu, imwimwi nokuita kwenyu kunomukheto munotenda kuna Jesu Kristu, Mambo wedu wouthende here?

² Ngokuti kudai munhu unendandazi yomukore, naye akasimira zvakanaka echipotera mumhatso yenyu yokudira, munhu murombo unezvokusimira zvine tsvina echipoterawomwo,

³ nemwi kudai mwechiremeredza uwo unosimira zvokufuka zvakanaka mwechiti, “Gara pano pandau yakanaka,” mwechiti kumurombo, “Ema apo,” nokuti, “Gara pashi pechitambarariro chetsoka dzangu,”

⁴ ngokuita kudaro amuzikuita mukheto pakati penyu nokuita vatongi vemipinimidzo yakashata here?

⁵ Purutanai, hama dzangu dzinodikanwa. Mwari aazi kukheta varombo munyika kuti vaite makurudza okugonda nevanogara nhaka youmambo uhwo hwaakagondisa kwavari vanomuda here?

⁶ Asi imwimwi amuzi kuremeredza murombo. Andivopi makurudza anomutambudza here? Andivopi vanomukweya kuenda pazvigaro zvokutongwa here?

⁷ Andivopi vanotuka zina rinoremeredzeka romunodaidzwa ndiro here?

⁸ Asi kudai mwechizadzisa mupango woumambo kudai ngezvakanyorwa kuti, “Unozomuda muakirwana wako kudai ngezvounodzida iwewe pachako”, munoita zvakanaka.

⁹ Asi kudai mwechiita vanomukheto kuvanhu, munoshaisha mwechiitirwa ndaa ngeMipango kuti muri vapauki.

¹⁰ Ngokuti kunyazwi ndiani unozongwarira Mipango yeshe, asi echipumhunwa ngorupande rumwe, iye waita unendaa kweiri yeshe.

¹¹ Ngokuti uwo wakati, “Usazoomba,” wakatizve, “Usazouraya.” Zvino kudai usikaombi, asi wechiuraya, waita mupauki weMipango.

¹² Mwechiereketa nokuita kudai ngevanozotongwa ngeMipango yokusunhurika.

¹³ Ngokuti kutonga akuzoiti nyasha kwaari usikazi kuonisa nyasha. Nyasha dzinodziganzisa dzechinyisa pakutonga!

Kugonda noKuita

¹⁴ Kunodetserenyi, hama dzangu, kudai munhu echironza kuti unokugonda, asi asina mishando? Kugonda ukwo kungamuponesa here?

¹⁵ Kudai hama mwamuna nokuti mukadzi ari mutitinini, echitama zvokudya zvezuva ngezuva,

¹⁶ noumwe wenyu echiti kwaari, “Endai mukunyarara, mwechiita vanodziirwa nokugutiswa,” asi musikavapi zvinotamika kumuiri, kunodetserenyi?

¹⁷ Ndizvo kugonda kwega, kuti kusina mishando, kwakafa.

¹⁸ Asi umweni unozoti, “Iwewe unokugonda, neni ndine mishando. Ndionise kugonda kwako kusina mishando, neni ndinozokuonisa kugonda kwangu ngemishando yangu.”

¹⁹ Unotenda iwewe kuti Mwari ndiumwe; unoita zvakanaka. Kunyazwi namadhimoni anotendawo nokuhuta.

²⁰ Unoda kuoniswa here, iwewe munhu usina shwiro, kuti kugonda kusina mishando kwakafa?

²¹ Abrahama, baba edu, avazi kupembedzwa here ngemishando, apo pevakapira Isaka mukororo wavo kuita mudiro paarita?

²² Unoona kuti kugonda kwakashanda pamwepo nemishando yake, nokugonda kwakaitwa kwakaperera ngemishando.

²³ Nechinyorwa chakazadzisika chinoti, “Abrahama wakagonda Mwari, nakwo kwakaerengerwa kwaari kuti kururama,” naye wakadaidzwa kuti ishamwari yaMwari.

²⁴ Munoona kuti munhu unopembedzwa ngemishando, haiwa ngokugonda kwega.

²⁵ Ngokudaro, Rahabhi chifebi aazi kupembedzwa here ngemishando, apo paakaashira vatumwa nokuvatizisa ngenjira imweni?

²⁶ Ngokuti kudai ngomuiri usina mweya wakafa, ndizvo kugonda kusina mishando kwakafawo.