Jakobe 1 - Bhaibheri Rakachena muChindau

Kuchingamidza

¹ Jakobe, muranda waMwari nowaMambo Jesu Kristu, ndinonyorera kumadzinza gumi namairi akapararira, ndinomuchingamidza.

Kugonda noUngwaru

² Hama dzangu, naapo mwogumirwa ngokuedzwa kwembeu zhinji, musakuerenga kuita chiro asi kudakara,

³ ngokuti munozia kuti kuedzwa kwokugonda kwenyu kunobara kusengerera;

⁴ asi kusengerera ngakuanomushando wakaperera, kuti muite vakaperera vabva muzero, musikatami chiro.

⁵ Kudai aripo umwe wenyu unotama ungwaru, ngaakumbire kuna Mwari, uwo unopa kunevanhu veshe ngokuwanzisa, asikakaraidzi, kunozopuwa kwaari.

⁶ Asi ngaakumbire ngokugonda, asikagonondi, ngokuti uwo unogononda wakadai ngefungu roruandhle, rinosundwa ngedutu nokukandirwa apo naapo.

⁷ Uwo munhu asakarira kuti unozoashira chiro kubva kunaMambo;

⁸ munhu unemipinimidzo miiri unotsanduka-tsanduka munjira dzake dzeshe.

Urombo noUpfumi

⁹ Asi hama iri pashi ngaidakare ngokukudzwa kwayo,

¹⁰ negurudza ngaridakare ngokupfaiswa kwaro, ngokuti gurudza rinozopinda kudai ngeruva romwenje.

¹¹ Ngokuti zuva rinobuda pamwepo nokupisha kwaro, rinoomesa mwenje; neruva rawo rinowa pashi, nounaku hwaro hunopera. Ndizvo zvinoita gurudza; rinozonyangarika munjira dzaro.

Kuedza noKuedzwa

¹² Unomuchena munhuwo unoshingirira mukuedzwa. Ngokuti apo aedzwa unozoashira dzungudza rokupona rakagondiswa kwavari vanomuda.

¹³ Munhu apo aedzwa asaronza kuti, “Ndinoedzwa ndiMwari;” ngokuti Mwari aangakoni kuedzwa ngezvakashata, zve, aaedzi munhu kunyazwi ngouri.

¹⁴ Asi munhu weshe unoedzwa apo ookweyiwa ngokuemura kwake nokunyengererwa;

¹⁵ ndizvo apo kuemura kwamera mimba, kunobara kushaisha, nokushaisha apo kwakura, kunobara rufu.

¹⁶ Musachengedzerwa, hama dzangu dzinodikanwa.

¹⁷ Zvipo zveshe zvakanaka, nezvipo zveshe zvakaperera, zvinobva mudenga, zvechidzaka kubva kunaBaba vokujeka, kwaari akuna kutsanduka nokuti kabvuri kokukunukuka.

¹⁸ Ngokuda kwake iye wakatibara ngeizwi regwinyiso, kuti tiite kudai ngemichero yokutanga yezvakasikwa zvake.

Kuzwa noKuita Izwi raMwari

¹⁹ Munosisira kuzwisisa izvi, hama dzangu dzinodikanwa: munhu weshe ngaakasire kuzwa, anonoke kuereketa, anonoke kunyangadzwa;

²⁰ ngokuti kunyangadzwa kwomunhu akushandi kururama kwaMwari.

²¹ Ndizvo mwechirasha tsvina yeshe nokushata kunofashukira, muashire ngokupfaa izwi rakasimwa, rine simba rokuponesa mweya yenyu.

²² Asi itai vaiti veizwi, haiwa vanozwa kwega mwechidzichengedzera.

²³ Ngokuti kudai munhu ari muzwi weizwi, asiri muiti waro, uyu wakadai ngomunhu unoringira hope yake yechibarirwe muchiboniboni;

²⁴ ngokuti unodziona pachake, orooenda, paripo unoriyarwa chiemo chaanacho kuti chakaitawani.

²⁵ Asi uwo unoringira mupango wakaperera wokusunhurika, echiangira kudaro, asikaiti unozwa echiriyarwa, asi muiti womushando, uyu munhu unozofumiswa muzviito zvake.

²⁶ Kudai aripo munhu unokarakadza kuti mudiri, naye asikakoni kubata rurumi rwake, asi unochengedzera mwoyo wake, kudira kwake munhu uyu akuna shwiro.

²⁷ Kudira kwakaperera nokusikazi kusvipiswa pamberi paMwari wedu naBaba ndikwo uku, kuhambira nherera neshirikadzi mukutambudzika kwavo, nokudzingwarira kuti asasvipiswa ngezvenyika.