Isa. 9 - Bhaibheri Rakachena muChindau

¹ Asi akuzoapo chidima kwevari avo vaiya mukurwadziwa. Munguva yokutanga wakaunza kutambudzika kunyika yeZebhuruni nenyika yeNafitari, asi munguva ichauya unozoikudza kakurutu ngenjira yeparuandhle seri kweJorodhani, muGarire remadzinza.

Mambo Unozouya

² Vanhu avo vakahamba muchidima vakaona kujeka kukuru; avo vakagara munyika yebvute rokufa, kujeka kwakajeka padera pavo.

³ Wakawanza dzinza, wakawanza kudakara kwaro; vanodakara pamberi pako kudai ngokudakara kwepakucheka, kudai ngokudakara kwevanhu avo vanopaurirana zvakachakatwa.

⁴ Ngokuti wagura joka raivaremera, nemwamba wairemera makhadza avo, ndonga yomutambudzi wavo, iwewe wagura kudai ngezuva raMidhiani.

⁵ Ngokuti magwada eshe evanorwa hondo akatsikatsika, nezvokusimira zvakamwirira ngengazi zvichapishwa kudai ngehuni dzomuriro.

⁶ Ngokuti tabarirwa mwana, mukororo wapuwa kwetiri; noumambo unozogara pamapfudzi ake; nezina rake rinozodudzwa rechiziwi Gota rinoshamisa, Mwari Une-simba, Baba emhera nariini, Muzvare wokunyarara.

⁷ Umambo hwake unozoramba wechikura, kuchaapo kunyarara kusina magumo padendemaro raDhavhidha nepaumambo hwake. Unozouemesa nokuugwinyisa ngokutonga kwakanaka nokururama, kubvira zvinopano mhera nariini. Kugwinyisisa kwaMambo Mwari wehondo kunozoita izvi.

Mambo Mwari Unozoorora Isuraeri

⁸ Mambo Mwari wakatumira izwi rokutonga Jakobe, naro rakawira padera paIsuraeri;

⁹ nevanhu veshe vanozozvizia, Efuremu naavo vanogara muSamaria, asi vanoronza ngokudzikudza nemanyau mumwoyo vechiti,

¹⁰ “Zvidhina zvawa, asi tinozoaka ngamapuwe akatsetswa; mionde yatemerwa pashi, asi tinozoisa misedhare pandau yayo.”

¹¹ Ndizvo Mambo Mwari wamirudzira magaa kuvarwisa, nokumusa magaa avo,

¹² vaAramu ngokumabvazuva, vaFiristia ngokumabirirazuva, navo vamedza Isuraeri ngomuromo wakashama. Ngeizvi zveshe ushungu hwake ahuzi kupetuka, asi nyara yake ichakatambanudzwa nazvinopano.

¹³ Vanhu avazi kutenderukira kwaari uwo wakavachaya, nokuti kutsvaka Mambo Mwari wehondo.

¹⁴ Ndizvo Mambo Mwari unozogura soro raIsuraeri nomuswe, dai romuchindwi netsanga, ngezuva rimwe.

¹⁵ Musharuka nounoremeredzwa ndiye soro, muprofeti unodzidzisa manyepo ndiye muswe.

¹⁶ Ngokuti avo vanovatungamirira vanoita kuti vapauke, naavo vanotungamirirwa ndivo vanosiyiwa mukukangaidzwa.

¹⁷ Ndiyo ndaa Mambo Mwari aazodakariri majaha avo, aazokunguririzve nherera neshirikadzi; ngokuti veshe vasikadi Mwari nevaiti vezvakashata, nemiromo yeshe inoereketa upenzi. Ngeizvi zveshe ushungu hwake ahuzi kupetuka, asi nyara yake ichakatambanudzwa nazvinopano.

¹⁸ Ngokuti kushata kunopisha kudai ngomuriro; kunopedza makato neminzwa, kunopisha matenhere omugwasha, nazvo zvinokwira mumakore kudai ngegore rechiushi.

¹⁹ Kubudikidza ngoushungu hwaMambo Mwari wehondo nyika yakatsva, nevanhu vakaita kudai ngehuni dzomuriro; akuna munhu unozokungurira hama yake.

²⁰ Vanobvuka ngokumudyo, asi vanoita nzara, vanodya ngomuoshwe, asi avaguti; umwe ngaumwe unodya nyama yomuoko wake.

²¹ Manase unodya Efuremu, Efuremu unodya Manase, navo pamwepo vanorwisa Judha. Ngeizvi zveshe ushungu hwake ahuzi kupetuka, asi nyara yake ichakatambanudzwa nazvinopano.