Isa. 8 - Bhaibheri Rakachena muChindau

Mukororo waIsaya Unoitwa Kudai ngeChioniso kuVanhu

¹ Zvino Mambo Mwari wakati kwendiri, “Tora rusamba rukuru, unyore padera parwo ngepheni romunhu, ‘RaMaheri-sharari-hashibhazi,’

² ruite zvapupu ndini zvinogondeka mukunyora, Uria mupristi, naZekharia mukororo waJebherekhia.”

³ Neni ndakaenda kumuprofeti womukadzi; naye wakaita mimba, akabereka mukororo. Zvino Mambo Mwari wakati kwendiri, “Dudza zina rake kuti, ‘Maheri-sharari-hashibhazi;’

⁴ ngokuti mwana asati azia kuchema kuti, ‘Baba angu,’ nokuti, ‘Mai angu,’ upfumi hweDhamasekusi nezvakachakatwa zveSamaria zvinozotorwa ndimambo weAsiria.”

Mambo weAsiria Unouya

⁵ Mambo Mwari wakaereketazve kwendiri echiti,

⁶ “Ngokuti vanhu ava vakaramba mvura yeShiroa, iyo inoerera padoko padoko, navo vanodakara ndiRezini nomukororo weRemaria,

⁷ ndizvo zvino, ringira, Mambo Mwari unounza padera pavo mvura yorwizi inesimba kuvaparadza, yakawanda, mambo weAsiria, nouthende hwake hweshe; inozomiruka padera pemigero yayo yeshe, nokukukuzva mahumbikumbi arwo eshe;

⁸ inozokukukuzva kupinda ngomuJudha, kudai ngendambi nokudururwa kubva padera; inozoguma nokumutsipa; nokutambanudzwa kwemaphaphiro ake kunozozadza kupamhama kwenyika yako, iwewe Imanueri.”

⁹ Batanai pamwepo, imwimwi vanhu, mupere simba; purutanai, imwimwi mweshe mwenyika dziri kuretu; mudzisunge pachenyu, nemwi mupere simba; dzisungenyi pachenyu nemwi mupere simba!

¹⁰ Panganai pamwepo, asi kunozoizwa kusina shwiro; ereketai izwi, asi arizoemi, ngokuti Mwari unesu.

Mambo Mwari Unongwadza Muprofeti

¹¹ Ngokuti Mambo Mwari wakaereketa kudaro kwendiri apo nyara yake inesimba yaiya padera pangu, akandidzidzisa kuti ndisazohamba munjira mwevanhu ava echiti,

¹² “Musati idumba, zveshe zvavanozoronza vanhu ava kuti idumba; musatya zvevanotya, nokuti kukaruka.

¹³ Asi Mambo Mwari wehondo, ndiye womunozoronza kuti wakachena; ityai iye ega, ngaaitezve womunokaruka ndiye.

¹⁴ Ndiye unozoita ndau yokudira yakachena, buwe rokuvafura ndiro; noruware runopumhunisa kumhatso dzeshe dzaIsuraeri, murau nechindondo kwevari vanogara Jerusarema.

¹⁵ Nevazhinji pakati pavo vanozopumhunwa; vanozowa nokugurwa; vanozoteiwa nokubatwa.”

Kungwadzwa ngendaa yoKubvunza Vakafa

¹⁶ Sunga chapupu, namera chironzo nedzidziso pakati pevadzidzi vangu.

¹⁷ Neni ndinozogarira Mambo Mwari, uwo unofisha hope yake kubva kumhatso yaJakobe, neni ndinozogonda mwaari.

¹⁸ Ringira, inini nevana vowakandipa Mambo Mwari tiri zvioniso nemishamiso mukati mwaIsuraeri zvinobva kunaMambo Mwari wehondo, uwo unogara muMutunhu weZioni.

¹⁹ Naapo vanhu vanozoti kwomuri, “Tsvakai kwevari vanemweya yokufembera, nokuman'anga anomukirwa, naavo vanovhuruvhuta; akudikani here kuti vanhu vabvunze zvimwari zvavo, vakafa ngendaa yevanopona?”

²⁰ Kumupango nokuchapupu! Kudai vasikaereketi kudai ngeizwi iri, indaa yokuti akuna kujeka mukati mwavo.

Nguva yeDambudziko

²¹ Navo vanozohamba kupinda ndimwo, vechitambudzika, vanenzara, naapo vaanenzara; vanozonyangadzwa, vanozotuka mambo wavo, nezvimwari zvavo. Vanozoringira mudenga,

²² nokuti vanozoringira pashi; asi vanozoona kwega madambudziko nechidima, kusvipa kwokurwadziwa; vanozodzingwa muchidima chakakora.