Isa. 7 - Bhaibheri Rakachena muChindau

Izwi Rinouya kunaMambo Ahazi

¹ Mumazuva aAhazi, mukororo waJothamu, mukororo waUzia, mambo waJudha, Rezini, mambo weAramu, naPheka, mukororo waRemaria, mambo waIsuraeri, vakakwira koorwa neJerusarema, asi vakakorera kurinyisa.

² Naapo mhatso yaDhavhidha yazwa kuti Aramu inobatana naEfuremu, mwoyo waAhazi wakazungunyiswa, pamwepo nomwoyo yevanhu vake, kudai ngemiti yegwasha inozungunyiswa ngedutu.

³ Zvino Mambo Mwari wakati kunaIsaya, “Buda wooshongana naAhazi, iwewe naShearijashubhi mukororo wako, kumagumo omugero wegandwa redera, mupato romunda womusuki wezvokusimira,

⁴ wechiti kwaari, ‘Ngwara, unyarare; usatya, usaita kuti mwoyo wako udemere ngendaa yezvitsiki izvi zviiri zvinopwititika, ngendaa youshungu hunotyisa hwaRezini neAramu nomukororo waRemaria.’

⁵ Ngokuti Aramu naEfuremu nomukororo waRemaria vakapangana zvakashata ndiwe vechiti,

⁶ ‘Ngatikwire koorwa naJudha, tirigure ngepakati, tirinyise riite redu, tiite mukororo waTabheeri mambo mukati mwaro.’ ”

⁷ Ndizvo izvi zvinoronza Mambo Mwari, “Azvizoemi, azvizoitiki.

⁸ Ngokuti soro reAramu Dhamasekusi, nesoro iDhamasekusi iRezini. Mukati mwemakore makumi matanhatu nemashanu, Efuremu rinozogurwa kuita zvigurwa, kuti risazoita dzinza.

⁹ Soro raEfuremu iSamaria, nesoro raSamaria mukororo waRemaria. Kudai musikaemi mwakagwinya mukugonda, ngegwinyiso amuzotsimiswi.”

Chioniso chaImanueri

¹⁰ Mambo Mwari wakaereketazve kunaAhazi echiti,

¹¹ “Kumbira chioniso chaMambo Mwari, Mwari wako; ngachidzame kudai ngeSheori, nokuti kukwirira kudai ngedenga.”

¹² Asi Ahazi wakati, “Andizokumbiri, andizoedzi Mambo Mwari.”

¹³ Zvino Isaya wakati, “Izwai zvino, O mhatso yaDhavhidha! Chakanyanya kuita chiro chidoko here kwomuri kurembesa vanhu, kuti murembesewo Mwari wangu?

¹⁴ Ndizvo Mambo Mwari emene unozokupa chioniso. Ringira, mhandwe inozoita mimba, inozobereka mukororo, inozodudza zina rake kuti Imanueri.

¹⁵ Unozodya mafuta omukaka nouchi, panguva yaanozia kuramba zvakashata nokutsanangura zvakanaka.

¹⁶ Ngokuti mwana asati azia kuramba zvakashata nokutsanangura zvakanaka, nyika iyo iri pamberi pako, iyo madzimambo mairi ounotya, inozosiiwa.

¹⁷ Mambo Mwari unozounza mazuva asikazi kumboapo padera pako, nepadera pevanhu vako, nepadera pemhatso yababa ako, kubvira pazuva raakabva ndiro Efuremu kunaJudha, mambo weAsiria.”

¹⁸ Ngeiro zuva Mambo Mwari unozoridzira murudzi nhunzi iri kurupande rwokugumisira rwendwizi dzeEgipite, nenyuchi iri munyika yeAsiria.

¹⁹ Nadzo dzinozouya, dzinozomata dzeshe mumapani omushango, nomumapako, nepadera peminzwa yeshe, nepadera pemapfiba eshe.

²⁰ Ngeiro zuva Mambo Mwari unozopara ngechisvo chinobhadharwa, chakatorwa kubva seri kwoRwizi, ndiye mambo weAsiria soro nebvunzi retsoka, chinozoparazve ndebvu.

²¹ Ngeiro zuva munhu unozorera konyana idzva nemakwai mairi.

²² Unozodya mafuta omukaka ngendaa yokuwanda kwomukaka wedzinobudisa, ngokuti weshe unosara munyika unozodya mafuta omukaka nouchi.

²³ Ngeiro zuva ndau dzeshe apo paisiita mivhini gumi remazana, yaitengwa ngezvigurwa zvesirivha gumi remazana, inozoita makato neminzwa.

²⁴ Vanhu vachaendayo nembita nemisee, ngokuti nyika yeshe inozoita makato neminzwa.

²⁵ Zvimitunhu zveshe zvairimwa ngemapadza, avazogumipo vanotya makato neminzwa, asi zvinozoita ndau yokuushira kabi, nokutsikwa tsikwa ngemakwai.