Isa. 66 - Bhaibheri Rakachena muChindau

Mambo Mwari Unotonga Madzinza

¹ Izvi ndizvo zvinoronza Mambo Mwari, “Denga idendemaro rangu, nenyika chitambarariro chetsoka dzangu; imhatso yakadini zvino yomunondiakira? Indau yakadini yokuzorora kwangu?

² Inini pachangu ndakasika izvi zveshe ngenyara dzangu, ndizvo zviro izvi zveshe ngezvangu,” unoronza Mambo Mwari. “Asi uyu ndiye umwe wendinozoringira, kuneuwo unomweya wakapfaa, unohuta ngeizwi rangu.

³ “Kunyazwi ndiani unouraya kabi wakadai ngouwo unouraya munhu; kunyazwi ndiani unopira kakwai kuita mudiro wakadai ngewagura mutsipa wembwa; kunyazwi ndiani unopira mudiro wezviyo, wakadai ngouwo unopira ngazi yenguruwe kuita mudiro; kunyazwi ndiani unopisha mutombo unegwema rakanaka wakadai ngouwo unopira mudiro wokukarakadza muedzaniso. Ava vakatsanangura njira dzavo, avo mweya yavo inodakara munezvinonyangadza zvavo.

⁴ Ininiwo ndinozotsanangura kuvatambudza, nokuunza zvevanotya padera pavo; ngokuti, naapo pendakadaidza, apana wakapingura, naapo pendakaereketa, avazi kupurutana; asi vakaita izvo zvakashata pamberi pemadziso angu, vakatsanangura chisikazi kundidakadza.”

⁵ Izwai izwi raMambo Mwari, imwimwi munohuta ngeizwi rake: “Hama dzenyu idzo dzinomuzonda, nokumuramba ngendaa yezina yangu, vakati, ‘Ngaakudzwe Mambo Mwari, kuitira kuti tione kudakara kwenyu,’ asi ndivo vanozotsverudzwa.

⁶ Purutana, uzwe bope rinobva mudhorobha, izwi rinobuda mutemperi! Izwi raMambo Mwari, uwo unounzidzira magaa ake.

⁷ Asati arwadziwa, wakabereka; kurwadziwa kwake kusati kwaguma padera pake, wakabereka mwana womurumbwana.

⁸ Ndiani wambozwa chiro chakadai? Ndiani wamboona zviro zvakadai? Nyika ingaberekwa ngezuva rimwe here? Dzinza ringabarwa chiriporipo here? Ngokuti apo Zioni rarwadziwa ngokubereka, rakabereka vana varo.”

⁹ Ndizvo Mambo Mwari unoti, “Ndinozobeura ndani pakubereka, ndisikazoberekesi here? Ndinozoita here inini, uwo unoberekesa, kutsiira ndani?” Unoronza Mwari wako.

¹⁰ “Dakarai imwimwi pamwepo neJerusarema, mudakare naro, imwimwi mweshe munorida; mudakare yaamho naro, imwimwi mweshe munorichemera,

¹¹ kuti muamwe, mugutiswe kubva pamazamo okuembedzerwa kwaro; kuti muamwe yaamho, nokudakara ngouwandu hwouthende hwepaditi raro.”

¹² Ngokuti izvi ndizvo zvinoronza Mambo Mwari, “Ringira, ndinozotutsira kunyarara kweriri kudai ngorwizi, noupfumi hwemadzinza hunozoerera kudai ngorwizi; naapo munozoamwa, munozotengurwa pamioko yaro, nokutengurwa pamabvi aro.

¹³ Kudai ndimai vanoembedzera mwana wavo, ndizvo ndinozomuembedzera; nemwi munozoembedzerwa muJerusarema.

¹⁴ Naapo mwaona, mwoyo yenyu inozodakara; magodo enyu anozokura kudai ngezvisimwa zvakasvipira; zvinozoziikanwa kuti nyara yaMambo Mwari iri kuvaranda vake, noushungu hwake kumagaa ake.”

¹⁵ Ngokuti, ringira, Mambo Mwari unozouya ari mumuriro, anemakarichi ake akatodzana nechimupupuri, echiunza kutseneka kwake kunoushungu, nokukaraidza kwake kunemirazvu yomuriro.

¹⁶ Ngokuti ngomuriro Mambo Mwari unozotonga, neshoti yake padera pevanhu veshe, nevakaurawa ndiMambo Mwari vanozoita vazhinji.

¹⁷ “Avo vanodzichenesa nokudzinasa pachavo, kuti vaende kuminda, vechiteera umwe uri pakati pavo, vechidya nyama yenguruwe, yechinyangadzo, yembeya, vanozopera pamwepo,” unoronza Mambo Mwari.

¹⁸ “Ngokuti ndinozia mishando yavo nemirangariro yavo, ndinouya koounganidza madzinza eshe nendimi dzeshe; navo vanozouya, vaone uthende hwangu,

¹⁹ neni ndinozoemesa chioniso pakati pavo. Kubva kwevari ndinozotumira avo vakapokonyoka kumadzinza, kuTharshishi, Phuti, nokuRudhi, avo vanofura ngeuta; kuTubhari neJavhani, kuzviwi zviri kuretu, izvo zvisati zvambozwa ngembiri yangu, nokuti kuona uthende hwangu; navo vanozoteketesa uthende hwangu pakati pemadzinza.

²⁰ Vanozounza hama dzenyu dzeshe kubva kumadzinza eshe kuita chipo chomudiro kunaMambo Mwari, padera pemahachi, mumakarichi mungoro, padera pemanurusi, napadera pemangamera, kuvaunza kumutunhu wangu wakachena Jerusarema,” unoronza Mambo Mwari, “Kudai ngevana vaIsuraeri vanounza zviyo kuita munikero wavo muzvidziyo zvakasukika kumhatso yaMambo Mwari.

²¹ Neniwo ndinozotora vamweni vavo, kudai ngevapristi nevaRevhi,” unoronza Mambo Mwari.

²² “Ngokuti kudai ngematenga matsva nenyika itsva, zvendinozoita, zvinozogara pamberi pangu,” unoronza Mambo Mwari; “Ndizvo zvinozoita mibarirwana yenyu nezina renyu zvinozogara.

²³ Kubva kumwedzi mutsva, kuenda kumwedzi mutsva, nokubva kuneSabatha rimwe kuguma kuneSabatha rimweni, vanhu veshe vanozouya koodira pamberi pangu,” unoronza Mambo Mwari.

²⁴ “Navo vanozobuda kuringira padera pemiiri yevanhu vakafa, avo vakandimukira; ngokuti honye yavo aizofi, nomuriro wavo auzodzimwi; navo vanozoita chinyangadzo kuvanhu veshe.”